Ding Dalit 56 - Ing Mayap a Balita Biblia

Ing Pamanalig king Ginu

¹ O Dios ko, malunus ka kaku, uling lulusuban da ku kalupa kung tau; patitingapun liligaligan da ku.

² Ala lang patugut kaku dadakurak; tutu lang dakal ding kakung kalaban.

³ Neng tatakut ku, ika ing panaligan ku, O Ginung Mayupayang tutu.

⁴ Ing amanu't pangaku ning Dios kakung pasalamatan at panaligan; pengaku na kakung pupurian. Ba't kalupa kung tau kaku yang pitakutan?

⁵ Patitingapun ala lang daraptan, aku ing karelang pasakitan; ala lang aliwang pag-imbutan nune mu ing kakung kasiran.

⁶ Miyabe-abe lang manenaya ban aku ing karelang tambangan; parati rang lalawan ing kakung gagawan.

⁷ O Dios ko, parusan mu la sana, uli ning e mayap a dapat da; king kekang mua lupigan mu la.

⁸ Balu mu nung nu karakal ing kakung problema; lua kung tinulu balu mu la; king kekang libru iti ngan kekang linista.

⁹ Kakung kalaban mamulayi la ngan kabud kekang damdaman kakung kapaniausan. Iti ing kakung paniwalan: ing Dios aku ing papanigan na.

¹⁰ Ing amanu't pangaku ning Dios siguradu nang daptan; kaku yang purian uling pangaku na tuparan na.

¹¹ King Dios ku binili ing kakung kapanaligan, inya ala kung sukat pigaganakan. Ba't kalupa kung tau kaku yang pitakutan?

¹² Ding pengaku ku keka, O Dios, sukat ku lang tuparan, ain ning kapasalamatan keka kaku lang ibie.

¹³ Linigtas mu ku king kamatayan; e mu pepaburen ing tanggap kung kabiguan, inya arap mu maglakad kung kayantabe ning sala a kekang babie.