Ding Dalit 5 - Ing Mayap a Balita Biblia

Ing Panalangin para king Panatag a Kabilian

¹ O Ginu, pakiramdaman mu ku, pansinan mu sa ing saingsing ku.

² O ari ku at Dios ku, saingsing ku pakiramdaman mu, uling keka mamaus ku.

³ Neng abak pakiramdaman mu ku; uling keka mamaus ku, at panayan ku ing saup mu.

⁴ Dios kang e matula king e ustu; kapilan man ing e ustu e mu katulan.

⁵ E mo man buring akakit ding taung palalu; kasaman mo ngan ding e mayap a tau.

⁶ Keka lang papaten ding malaram, at kasaman ding taung mapaglinlang ampon tampalasan.

⁷ Oneng aku, uling tutu mu kung kaluguran, malaus ku king bale mu; king mitmung takut samba ku kilub ning banal mung Templo.

⁸ O Ginu, ituru mu kaku ing kekang katuliran, uling dakal lang kakung kalaban; pakit meng masala kaku ing kekang kaburian ba keng mayan atuparan.

⁹ Uling alang mayayakit a katutuan karing asbuk ding kakung kalaban, mitmu lang kapanyiran; kutkutan la waring e mitambunan; pamanyunu ing karelang sasabian.

¹⁰ Atulan mu la't parusan, O Dios ko; sablang babalakan da ya sanang ikabigu ra. King arap mu itabi mu la, uli ning linaban la keka, at ning dakal dang pamikasala.

¹¹ Oneng ding sablang lalapit keka tumula la, at keka ikanta da kapilan man ing tula ra, at ding sablang malugud keka keka lang ingatan ban magkanta la king tula da.

¹² O Ginu, ika ing babie bendisyun king taung makatuliran; ing lugud mu ya ing kalasag na.