Ding Dalit 139 - Ing Mayap a Balita Biblia

Ing Ganap-Makibalu at Manatiling Panga-atyu ning Dios

¹ O Ginu, sinuri mu ku at kakilala mu ku!

² Balu mu ing sablang gagawan ku; agyang keng marayu aintindian mu ing isipan ku.

³ Akakit mu ku, magobra ku man o makapaynawa; balu mu ing sablang gagawan ku.

⁴ Bayu ne pa asabi ning asbuk ku ing amanu, balu mu na ing sabian ku.

⁵ Atyu ka king makapadurut kaku, at king kekang upaya ingatan mu ku.

⁶ Alang makalingad king bie ku keka; ing kabiasnan mu lalagpas king kaisipan ku.

⁷ Nu ku mo malyaring munta ban takasan da ka? Nukarin da ka malyaring asalikutan?

⁸ Mukiat ku man king banuang matas atyu ka karin; nung magkera ku man king tuknangan da ring mete, karin atyu ka mu rin!

⁹ Sulapo ku man lampas king aslagan, manuknangan ku man king pekamalaut a lugal king albugan,

¹⁰ karin atyu ka ba mu kung tairan; atyu ka karin ban aku ing kekang saupan.

¹¹ Malyaring aduan ku king dalumdum ing isalikut na ku o kaya king sala a makapadurut kaku ing maging dalumdum,

¹² oneng ing dalumdum e maralumdum keka, ing bengi masalang antimong aldo. Ing sala at ing karalumduman parehu keka.

¹³ Ika ing linalang king sablang dake ning katawan ku; inubug mu ku king atian nang ima ku.

¹⁴ Pasalamatan da ka uling kailangan kang pitakutan, at pagmumulalan ing dapat mu! Balu ku iti king mabilug kung pusu.

¹⁵ Inyang miyuyubug ku king mitmung kaingatan king atian nang ima ku, inyang daragul ku king palanakan, ita keka e lihim.

¹⁶ Balu mu ing kaba ning bie ku, uling iti makasulat king libru mu bayu ku pa man magumpisang mangisnawa, inyang deti metung man ala pang linto.

¹⁷ O Dios, e ku la abut isipan ding isipan mu; karakal dang tuto!

¹⁸ Nung kaku lang bilangan, maygit la kabilangan kesa karing binutil. At nung miras na ku king karelang angganan, atyu ku pa mu rin king kekang siping.

¹⁹ O Dios, sana gisanan mu na lang e mayap a tau! Sana lakuan da na ku ding taung tampalasan!

²⁰ Ding taung deti e mayap ing sasabian da tungkul keka; magsalita lang e mayap a bage laban king lagyu mu.

²¹ O Ginu, tutu ku lang kasaman detang ating mua keka! Pikakasaman ku la detang keka lalaban!

²² Kasaman ku la king mabilug kung pusu; bibilang ku lang anting kakung kalaban.

²³ Surian mu ku, O Dios, at pakibaluan mung isipan ku; subukan mu ku at kilalanan ing kakung isipan.

²⁴ Lawan mu nung ating e mayap kaku, at tairan mu ku king dalan papunta king bie alang angga.