Ding Bilang 8 - Ing Mayap a Balita Biblia

Ding Sulu na ning Toldang Tuknangan ning Ginu

¹ Ngana ning Ginu kang Moises,

² Sabian mu kang Aaron king neng sisindian na la ring pitung sulu, ayusan na la reti king pitutumpakan-sulu ban ing sala ra tutud king arapan.

³ Memintu ya i Aaron; inayus na la ring sulu ban munie lang sala arapan na ning pitutumpakan-sulu, antimo ing inutus ning Ginu kang Moises.

⁴ Megawa ya king pinukpuk a gintu ing pitutumpakan-sulu pati na ring tangke na at sampaga. Gewa ne iting Moises agpang ketang pilulupan a pepakit na ning Ginu.

Ing Pangalinis at Pangatalaga da ring Levita

⁵ Ngana ning Ginu kang Moises,

⁶ Ikalilua mu la ring Levita karing aliwang Israelita at linisan mu la agpang king kautusan.

⁷ Anti kaniti ing daptan mu king pamaglinis karela: pisikan mu la king danum a panlinis, labahasan ya ing mabilug dang katawan, at papipi mu karela ing imalan da.

⁸ Kaybat na nita, papagdalan mu lang metung a biserung toro bilang ain-a-durulukan at ing ain-a-binutil a arinang sinamut king larung olibo. Magdala la namang metung pang biserung toro para ain-a-kapamayaran-king-kasalanan.

⁹ Kaybat idala mu la reting Levita king arapan na ning Toldang tuknangan ku at iyarap king akakit da ring makatipun a Israelita.

¹⁰ Itumpak da la kanita ring gamat da ring memalen na ning Israel king buntuk da ring Levita potang yarap mu la kanaku, ing Ginu,

¹¹ at italaga na lang Aaron kanaku ding Levita bilang ain a makapasubali da ring Israelita ban agampanan da ing kasuyuan kanaku.

¹² Itumpak da la kanita ding gamat da ring Levita karing buntuk da ring aduang biserung toro; miyain ya itang metung bilang ain-a-kapamayaran-king-kasalanan at ing kadua bilang ain-a-durulukan ban milapit la kanaku.

¹³ Kaybat na nita, iyain mu la bilang ain a makapasubali kanaku, at itutuk mu la kang Aaron at karing anak nang lalaki bilang kasaup da.

¹⁴ Makanyan mu lang ikalilua ding Levita karing memalen na ning Israel. Maging kanaku la kanita ding Levita.

¹⁵ Potang ayari mu na lang alinis at ayain bilang ain kanaku, malyari na la kanitang sumuyu king Toldang tuknangan ku.

¹⁶ Lubus lang miyabie kanaku bilang kalibe da ring lalaking pangane anak da ring Israelita,

¹⁷ uling kanaku la ding sablang anak a pangane da ring memalen na ning Israel, tau ya man o animal; kewani ku na la reti para kanaku kanitang pete ku la ring anak a pangane da ring tau Ehipto.

¹⁸ Ding pinili ku ila ring Levita at aliwa ring pangane anak da ring memalen na ning Israel

¹⁹ at tituk ku la kang Aaron at karing anak nang lalaki bilang regalu da ring Israelita ban sumuyu king Toldang tuknangan ku, at ban gawang pamisut para karing memalen na ning Israel. King anti kaniting kasuyuan milisia la ding memalen na ning Israel king nanumang kapahamakan, nung lumapit la king Banal a Lugal.

²⁰ Inya i Moises at Aaron at ing mabilug a memalen na ning Israel telaga da la ring Levita, agpang king inutus na ning Ginu karela.

²¹ Ding mismung Levita ilang miglinis king karelang pangatau at pinipi ra ing karelang imalan. Kaybat na nita, telaga na lang Aaron bilang ain a makapasubali king Ginu at depatan na ing kasuyuan pamisut ban luminis la.

²² Kaybat na nita, linub na la ring Levita king Toldang tuknangan na ning Ginu ban gampanan da ing karelang katungkulan lalam nang pamamahalang Aaron at ding anak nang lalaki. Tiparan na ing sablang inutus na ning Ginu kang Moises tungkul karing Levita.

²³ Ngana pa ning Ginu kang Moises,

²⁴ Iti ing makatungkul karing Levita: manibat king idad a aduang pulu't lima, sukat na lang sumuyu king obra na ning Toldang tuknangan ku.

²⁵ Tuknang ne king pamagobra na potang miras ne king idad limang pulu.

²⁶ Kaybat na nita, malyari na lang saupan ding kalupa nang Levita king obra da king Toldang tuknangan ku, oneng e ya malyaring makapagobrang dili-dili na. Iti ing kaayusan tungkul king kasuyuan da ring Levita.