Ding Bilang 5 - Ing Mayap a Balita Biblia

Ding Taung E Malinis

¹ Nganang migsalita ning Ginu kang Moises,

² Iyutus mu karing memalen na ning Israel ing palakuan da la king kampu ding sablang maki sakit lepra o ating tulu, at ing ninumang e malinis uli na ning mekatagkil yang mete tau.

³ Itabi ye, lalaki ya man o babai, ban e ya mirinatan ing kampu nung nu ku makatuknang.

⁴ Memintu la ring Israelita at tinabi da la ngan palual king kampu.

Ing Pamamayad king E Ustung Arapat

⁵ Ngana ning Ginu kang Moises,

⁶ Sabian mu iti karing memalen na ning Israel, Ing ninuman, lalaki ya man o babai, ing gawang e ustu king kalupa nang tau, e ya meging tapat kanaku, ing Ginu.

⁷ Inya sukat nang kilalanan king mikasala ya at sukat yang mamayaran ganap king diptananan nang e ustu, at patubuan ne pang beinti por sientu.

⁸ Nung mete ne ing diptananan nang e ustu at ala yang bitasang kamaganak, kanita ibie la ring bayad kanaku, ing Ginu, king kapamilatan na ning pari. Karagdagan ya iting bayad king lalaking tupa a ibie na ning mikasala para king pangapatawaran na ning depat nang e ustu.

⁹ Ing nanumang iyain dang makabukud ding Israelita kanaku, ing Ginu, mangaintulid king paring tinanggap kaniti.

¹⁰ Tanggapan na ning pari ing nanumang bage sagradung iyain da at iti maging bandi na.

Ing Lalaking Magsuspetsa king Asawa na

¹¹ Nganang migsalita ning Ginu kang Moises,

¹² Sabian mu karing memalen na ning Israel: Nung ginawa yang e ustu ing metung a babaing talasawa at e ya meging tapat king asawa na,

¹³ at mekipangatawan ya king aliwang lalaki king e na kamalayan ning asawa na, oneng e ya meyakit king aktu, marinat ne agyang alang menakit king depat na.

¹⁴ Nung magsuspetsa ya ing asawang lalaki at mengalalu ya king asawa nang dinatan na ing sarili na o mangalalu ya agyang ing asawang babai e ya gagawang e mayap,

¹⁵ kanita idala ne ing asawa na king pari. Magdala yang aduang takal a arinang sebada a e na tigtugan larung olibo at e na dininan insenso, uling iti ain ne ning lalaking magsuspetsa king asawa na ban lunto ing katutuan.

¹⁶ Ituki ne kanita ning pari ing babai king altar at karin ne iyarap king Dios.

¹⁷ Mibulus yang sagradung danum king lulanan a kapsa at samutanan nang ditak a alikabuk a kinua na king lapag ning Toldang tuknangan ku, ing Ginu.

¹⁸ King arapan ku, ing Ginu, isalbag ne buak ning pari ing babai at saka na ibili king gamat na ning babai ing ain a arina, ing ain tungkul king pamangalalu. Talnan ne ning pari karing gamat na ing lulanan a ating danum a mapait, ing danum a magdalang sumpa.

¹⁹ Pasumpan ne kanita ning pari ing babai king anti kaniting amanu: Nung e ka pin mekipangatawan king aliwang lalaki at nung e mu dinatan ing sarili mu kabang atyu ka lalam nang upaya ning asawa mu, e ka numanu balang kaniting danum a magdalang sumpa.

²⁰ Nung ginawa kang kataksilan king asawa mu, agyang atyu ka lalam ning upaya na, at dinatan mu ing sarili mu, at mekipangatawan ka king e mu asawa,

²¹ mananu na sanang ing Ginu gawan neng kasumpa-sumpa ing lagyu mu karing kabalen mu. Langi ya sana itang atyu pilatan da ring puad mu at lumbag ka atian.

²² Iti sanang danum a magdalang sumpa a inuman mu managlus king mabilug mung katawan; langi ya itang atyu pilatan da ring puad mu at lumbag ya ing atian mu. At ipakibat na ning babai, Amen, Amen.

²³ Isulat ne ning pari iting sumpa at wasan king danum a mapait.

²⁴ Ipainum na ing danum a mapait king babai, ing danum a magdalang sumpa, at pasakitan ne atian niti.

²⁵ Bayu na ipainum ing danum kuanan na ning pari ing ain arina king gamat ning babai. Iting ain arina tungkul ya king pamangalalu at iyain ne king Ginu ning pari karin king altar.

²⁶ Kuma yang kasakmal king arina at silaban na iti king altar. Kaybat, kanita na ipainum ing mapait a danum king babai.

²⁷ Nung mekipangatawan ya ing babai king e na asawa, mait ing danum king atian na, langi ya itang atyu king pilatan da ring puad na at lumbag ya atian. Inya maging kasumpa-sumpa ya karing kabalen na.

²⁸ Nung e ya mekipangatawan king aliwang lalaki, e ya numanu balang at mika anak ya.

²⁹ Iti ya ing tuntunan a tukian tungkul king asawang lalaki a mangalalu

³⁰ king ing asawa na mekipangatawan ya. Patalakaran ya ing babai arap ning altar at daptan na ning pari itang parapat na ning kautusan.

³¹ E ya sukat magdusa ing lalaki, nung mikasala ya ing asawa na; ing asawa na ya ing magdusa.