Ding Bilang 30 - Ing Mayap a Balita Biblia

Ding Tuntunan tungkul karing Panata

¹ Nganang migsalitang Moises karing manimuna da ring tribu da ring memalen na ning Israel, Iti ya ing inutus na ning Ginu.

² Potang gawa yang panata ing metung a lalaki o mengaku ya king Ginu, tuparan na; e na sisiran ing amanu na.

³ Nung gawa yang panata o mengaku ya king Ginu ing metung a dalagang atyu pa king sakup nang tata na

⁴ at iti abalu nang tata na oneng e ya tutul i tata na, kanita manatili ya ing panata o pangakung gewa na.

⁵ Nung tumutul ya ing tata na king aldo abalitan na ing gewa nang panata o pangaku, mawalan yang bisa ing panata na o pangaku. At ala yang pakibatan king Ginu, uling tinutul ya i tata na.

⁶ Nung talasawa ya ing babai inyang ginawa yang panata o pangakung e naman laus king pusu na,

⁷ at iti abalu na ning asawa na ing panata na o pangaku oneng e ya tutul, kanita manatili ya ing panata o ing pangaku na.

⁸ Nung tumutul ya ing asawa na king aldo abalitan na, mawalan yang bisa ing panata na o pangaku at ala yang pakibatan king Ginu.

⁹ Sukat dang tuparan ding babaing mebalu o babaing diborsiadu ing panata o pangakung gewa da uling iti manatili ya.

¹⁰ Nung gawa yang panata ing metung a babaing talasawa king Ginu o mangaku ya,

¹¹ oneng e ya bubulad at e tinutul inyang abalitan na iti ning asawa na, kanita manatili ya ing panata o pangaku na.

¹² Nung abalitan na ning asawa na at tinutul ya, mawalan yang bisa ing panata na o ing pangaku na. Ala yang pakibatan king Ginu, uling tinutul ya ing asawa na.

¹³ Nanumang panata o pangaku ning asawang babai, apayalan nang bisa ning asawa na.

¹⁴ Nung e ya tutul ing asawang lalaki king aldo abalu na, manatili ya ing panata o pangaku na king Ginu.

¹⁵ Nung sakaling pawalan nang bisa ning asawang lalaki kaybat nang linabas ning mapilan a aldo, kanita ya na ing mika pakibatan.

¹⁶ Ila deti ring kautusan na ning Ginu a binie na kang Moises tungkul karing babaing gagawang panata o pangaku, dalaga la man o talasawa.