Ding Bilang 29 - Ing Mayap a Balita Biblia

Ding Ain king Piesta ning Bayung Banua

¹ King mumunang aldo na ning kapitung bulan, mitipun kayu ban samba. E kayu magobra king aldong iti. Tiupan la ring trumpeta king aldong iti.

² Miyain kayung mabanglung ain-a-durulukan para king Ginu. Ini ing kekayung iyain: metung a biserung toro, metung a lalaking tupa, pitung lalaking tupa a pabanua tua a alang dipektu.

³ Abayanan yu iti king ain-a-binutil: atlung kilung arinang sinamut king larung olibo king balang toro; aduang kilu king balang lalaking tupa,

⁴ at metung a kilu para king balang biserung tupa.

⁵ Miyain kayu namang metung a lalaking kambing para ain-a-kapamayaran-king-kasalanan da ring memalen.

⁶ Iyain la reting ain subali pa karetang aldo-aldo ain-a-durulukan at ing ain-a-binutil ampon ain-a-inuman. Babie tula kanaku, ing Ginu, ing mabanglung bau da reting ain-a-durulukan.

Ding Ain king Aldo ning Pamanisi at Pangapatawaran

⁷ King kapulung aldo na ning kapitung bulan, mitipun kayu ban samba. E kayu mamangan at magobra.

⁸ Miyain kayung mabanglung ain-a-durulukan para king Ginu: metung a biserung toro, metung a lalaking tupa at pitung lalaking tupa a pabanua tua. Sukat la ngang alang dipektu. Babie tula king Ginu ing bau na niting ain-a-durulukan.

⁹ Abayanan yu iti king ain-a-binutil: atlung kilung arina a sinamut king larung olibo para king toro, aduang kilu para king lalaking tupa,

¹⁰ at metung a kilu para king balang biserung tupa.

¹¹ Miyain kayu namang metung a lalaking kambing para king ain-a-kapamayaran-king-kasalanan da ring memalen. Iyain la reting ain subali pa king aldo-aldo ain-a-durulukan kayabe ning ain-a-binutil ampon ain-a-inuman.

Ding Ain king Piesta da ring Dalungdung

¹² King kalabing limang aldo na ning kapitung bulan, mitipun kayu ban samba. E kayu magobra. Pagselebran ye iting piesta para king Ginu kilub ding pitung aldo.

¹³ King mumunang aldo miyain kayung mabanglung ain-a-durulukan para king Ginu: labing atlung biserung toro, aduang lalaking tupa, at labing apat a lalaking tupa a pabanua tua. Sukat la ngang alang dipektu.

¹⁴ Abayanan yu iti king ain-a-binutil: atlung kilung arinang sinamut king larung olibo king balang toro, aduang kilu king balang lalaking tupa,

¹⁵ at metung a kilu king balang biserung tupa. Abayanan yu naman iti king ain-a-inuman.

¹⁶ Miyain kayu namang metung a lalaking kambing bilang ain-a-kapamayaran-king-kasalanan da ring memalen. Iyain la ngan deting ain subali pa ketang aldo-aldo ain-a-durulukan kayabe ning ain-a-binutil at ain-a-inuman.

¹⁷ King kaduang aldo, miyain kayung labing aduang biserung toro, aduang lalaking tupa, at labing apat a lalaking tupa a pabanua tua at alang dipektu.

¹⁸ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

¹⁹ Miyain kayu namang metung a lalaking kambing bilang ain-a-kapamayaran-king-kasalanan da ring memalen. Iyain la ngan deting ain subali pa ketang aldo-aldo ain-a-durulukan kayabe ning ain-a-binutil at ain-a-inuman.

²⁰ King katlung aldo, miyain kayung labing metung a biserung toro, aduang lalaking tupa, at labing apat a lalaking tupa a pabanua tua at alang dipektu.

²¹ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

²² Subali pa kareting aldo-aldo ain, miyain kayu namang metung a lalaking kambing bilang ain-a-kapamayaran-king-kasalanan da ring memalen.

²³ King kapat a aldo, miyain kayung apulung biserung toro, aduang lalaking tupa, at labing apat a lalaking tupa a pabanua tua at alang dipektu.

²⁴ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

²⁵ Subali pa kareting aldo-aldo ain, miyain kayu namang metung a lalaking kambing bilang ain-a-kapamayaran-king-kasalanan da ring memalen.

²⁶ King kalimang aldo, miyain kayung siam a biserung toro, aduang lalaking tupa, at labing apat a lalaking tupa a pabanua tua at alang dipektu.

²⁷ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

²⁸ Subali pa kareting aldo-aldo ain, miyain kayu namang metung a lalaking kambing bilang ain-a-kapamayaran-king-kasalanan da ring memalen.

²⁹ King kanam a aldo, miyain kayung walung biserung toro, aduang lalaking tupa, at labing apat a lalaking tupa a pabanua tua at alang dipektu.

³⁰ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

³¹ Subali pa kareting aldo-aldo ain, miyain kayu namang metung a lalaking kambing bilang ain-a-kapamayaran-king-kasalanan da ring memalen.

³² King kapitung aldo, miyain kayung pitung biserung toro, aduang lalaking tupa, at labing apat a lalaking tupa a pabanua tua at alang dipektu.

³³ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

³⁴ Subali pa kareting aldo-aldo ain, miyain kayu namang metung a lalaking kambing bilang ain-a-kapamayaran-king-kasalanan da ring memalen.

³⁵ King kawalung aldo, mitipun kayu ban samba. E kayu magobra.

³⁶ Miyain kayung mabanglung ain-a-durulukan para king Ginu: metung a biserung toro, metung a lalaking tupa, at pitung lalaking tupa a pabanua tua at alang dipektu.

³⁷ Abayanan yu iti king ain-a-binutil at ain-a-inuman, agpang king bilang da ring toro, ding lalaking tupa, at ding biserung tupa, agpang king mitakdang kautusan.

³⁸ Subali pa kareting aldo-aldo ain, miyain kayu namang metung a lalaking kambing bilang ain-a-kapamayaran-king-kasalanan da ring memalen.

³⁹ Ila deti ring tuntunan tungkul karing ain-a-durulukan, ain-a-binutil, ain-a-inuman, at ain-ning-pamisulusulu. Iyain yu la reti karing mitakdang piestang pagselebran subali pa karetang pengaku yung ain o kusang lub a ain.

⁴⁰ Sinabi na la ngan Moises karing memalen na ning Israel ding sablang utus na ning Ginu karela.