Ding Bilang 22 - Ing Mayap a Balita Biblia

Pepayaus ne ning Ari ning Moab i Balaam

¹ Tiglus da ring memalen na ning Israel ing pamaglakbe ra at miras la king kapatagan na ning Moab dane aslagan ning Jordan sumangid ning Jerico.

² Ikit na ning aring i Balak a anak nang Zipor ing sablang depat da ring Israelita karing Amorita.

³ Mitakutan ya at ding kabalen na karing Israelita.

⁴ Ngara ding Moabita karing manimuna da ring Midianita, Gisanan da reting dakal a Israelitang deti ing sablang makapaligid kekatamu antimo nung makananung gigisanan dang kakanan ding baka ing dikut. Inya i Balak a anak nang Zipor at ari ning Moab,

⁵ peparala na la ring tubud na kang Balaam a anak nang Beor ning Petor a malapit king Ilug ning Eufrates ning bansang Amaw. Ngara ding tubud, Ating dakal a taung ibat Ehipto; lalaganapan de ing mabilug a bansa at manuknangan la ngening kasalukuyan king sumangid ning kayarian mi.

⁶ Munta ka keni ngeni mu rin at isumpa mu la ban sambutan mi la at atabi reting taung mas mayupaya kesa kekami. Balu ku king misusuerti la ring bibendisyunan mu at madadamalas la retang susumpa mu.

⁷ Inya ding manimuna na ning Moab at ning Midian minta la kang Balaam at magdala lang salaping pamayad king kasuyuan na. Sinabi ra kang Balaam itang pasabi nang Balak.

⁸ Nganang Balaam karela, Keti na kayu matudtud ngening bengi at bukas ku na sabian kekayu ing nanumang sabian ning Ginu kanaku. Inya karin la metudtud ding tubud.

⁹ Dinatang ya ing Dios kang Balaam at ngana, Ninu reng taung den a kayabe mu?

¹⁰ Pekibat nang Balaam, Ding tau pung tinubud nang Aring Balak a anak nang Zipor at ari ning Moab.

¹¹ Pasabi na king atin pung taung dinatang ibat Ehipto a ngeni laganap nang manuknangan makapadurut king kayarian na. Pasumpa na la kanaku ban sambutan na la king labanan at ban atabi na la.

¹² Ngana ning Dios kang Balaam, E ka sukat makiabe kareng taung den; binendisyunan ku la ring taung binggitan da keka, inya e mo susumpa.

¹³ Inya itang kabukasan pintalan na lang Balaam deting tubud at ngana karela, Muli na kayu. E na ku buring tuki kekayu ning Ginu.

¹⁴ Minuli la ring tubud a manimuna na ning Moab at ngara kang Balak, E ya pu bisang tuki kekami i Balaam.

¹⁵ Inya pasibayu yang peparalang mas dakal a tubud i Balak kang Balaam at deti lalu lang kagalang-galang.

¹⁶ Mekikit la kang Balaam at ngara, Balaam, pasabi nang Balak a anak nang Zipor king e mu sana paintulut ing mika ating sagabal king pamunta mu karin,

¹⁷ uling maragul ing iyablas ku keka at daptan ku ing nanumang aduan mu. Dapat a mayap, tuki na ka ban isumpa mu la ding taung mebanggit na keka.

¹⁸ Nganang Balaam karing tubud nang Balak, Agyang pang ibie na ngan kaku ing gintu at pilak ning palasyu na, e ku rin mabisa uling e ku malyaring salangsangan dit' man ing utus na ning Ginung kanakung Dios.

¹⁹ Ipakisabi kung mayap king keti na kayu pa munaman ngening bengi ban abalu ku nung atin ya pang buring sabian kanaku ing Ginu.

²⁰ Ketang benging ita ngana ning Dios kang Balaam, Nung dinatang la reting tubud ban agkatan da kang tuki karela, mabisa ka, oneng ita mung pasabi ku ya ing sabian mu.

²¹ Inya itang kabukasan, sidia neng Balaam ing asno na at tinuki ya karing tubud a manimuna na ning Moab.

I Balaam at ing Asno na

²² Mimua ya ing Dios kang Balaam, uling tinuki ya karing tubud nang Balak. Inya sebatan ne ning anghel ning Ginu. Makasake ya kanita i Balaam king asno na, kayabe na la ding adua nang ipus.

²³ Ikit ne ning asno na ing anghel na ning Ginu; makatalakad ya king dalan at atin yang tatalnan a espada. Inya linisia yang dalan ing asno at minta ya king marangle. Berug neng Balaam ing asno ban mibalik king dalan.

²⁴ Kanita minta ya ing anghel ning Ginu ketang makitid a dalan pilatan da ring mulahan ubas a maki pader.

²⁵ Inyang ikit ne ning asno ing anghel ning Ginu siniksik ya king pader at mesipit ya bitis i Balaam. Inya berug neng pasibayu.

²⁶ Migpauna ya ing anghel ning Ginu at sebatan neng pasibayu ketang lugal a ala neng alusutan ing asno.

²⁷ Inyang ikit neng pasibayu ning asno ing anghel ning Ginu, migkera ya iti. Mikapali ya buntuk i Balaam, inya pemarug ne king tukud na.

²⁸ Kanita ne dininan upaya ning Ginu ing asno ban makapagsalita ya. Inya ngana ning asno kang Balaam, Obat berug mu kung makatatlu? Ninanan da ka wari?

²⁹ Nganang mekibat Balaam, Uling paglokuan mu ku. Nung atin ku mung espada, siguru pete da na ka!

³⁰ Ngana ning asno kang Balaam, Aliwa wari aku ing parati mung sasaken manibat na inyang malati ka? Atin na ku waring gewang makanyan keka? Nganang Balaam, Ala naman.

³¹ Kanita ne biklat a mata ning Ginu i Balaam ban akit ne ing anghel a makatalakad king dalan; tatalnan ne ing makabagut a espada. Diku neng Balaam ing buntuk na at migsakab ya king gabun.

³² Ngana ning anghel ning Ginu, Obat berug meng mekatatlung besis ing kekang asno? Inya sebatan ke ing dalan uling e kailangan ing pamaglakbe mu.

³³ Ikit na ku ning asno mu at linisian na kung mekatatlung besis. Nung e ya mu linisia, siguradung apate ra ka, oneng ya ali ke.

³⁴ Nganang Balaam, Mikasala ku. E ku balu ing makatalakad ka pala king dalan ban sabatan mu ku. Nung isipan mung mali ing lakad ku, muli na ku.

³⁵ Ngana ning anghel ning Ginu, Sulung, tuki ka kareting tau, pero ita mung pasabi ku ya ing sabian mu. Inya tikian na lang Balaam ding tubud nang Balak.

I Balak at i Balaam

³⁶ Inyang abalitan nang Balak ing paniatang nang Balaam, seganan ne karin king Ar, ing siudad lele na ning Ilug ning Arnon a angganan ning Moab.

³⁷ Nganang Balak kang Balaam, Obat e ka dinatang inyang minunang parakit da ka? Bala mu galang ing e ra ka agyung parangalan?

³⁸ Nganang mekibat Balaam, Oyni, atyu na ku arapan mu, oneng ala kung upayang magsalita subali mu ketang pasabi na kanaku ning Dios.

³⁹ Kaybat tinuki ya i Balaam kang Balak ban munta king balen ning Huzot.

⁴⁰ Karin ya pepapate baka at tupa i Balak at binie na ing mapilan a karni kang Balaam at karing manimuna a kayabe na.

⁴¹ Itang kabukasan, tiki neng Balak i Balaam king matas a lugal ning Bamot Baal nung nukarin na la malyaring abatiawan Balaam ding mapilan a tapuk da ring memalen na ning Israel.