Ding Bilang 21 - Ing Mayap a Balita Biblia

Ing Tagumpe da ring Israelita karing Cananeo

¹ Abalitan na ning ari ning Arad, ing metung karing Cananeong ari a manuknangan king Negeb, ing dumalan la Atarim ding Israelita. Kayabe da ring sundalus na lisuban da la ring Israelita at abihag da la ring mapilan karela.

² Inya ginawa lang panata king Ginu ring Israelita. Ngara, Nung saupan mu kaming sambutan mi la reting tau, lasawan mi la ring siudad da.

³ Mebisa ya ing Ginu at seupan na lang sambutan da la ring Cananeo at ding siudad da. Inaus deng Horma ing lugal a ita.

Ing Ubingan a Megawa king Tangsu

⁴ Meko la king Bunduk ning Hor ding Israelita at tintunan de ing dalan papunta king Dagat da ring Timbu ban alisian de ing Edom. Oneng meinip la ring Israelita king pamaglakbe ra.

⁵ Inya migsalita lang laban king Dios at kang Moises. Ngara kang Moises, Leko mu kami wari king Ehipto ban pamaten mu keti king disyerto nung nu alang pamangan at danum? Sinawa na kami kaniting alang kwentang pamangan!

⁶ Inya peparala yang kamandagan a ubingan ing Ginu at penuktuk da la ring Israelita. Dakal la mu rin ding mete karela.

⁷ Inya lepitan de ring Israelita i Moises at ngara, Moises, mikasala kami king Ginu at keka inyang migsalita kaming laban king Ginu at keka. Aduan mu king Ginu king ilako na la sana deting kamandagan a ubingan. Inya menalangin ya i Moises para karing tau.

⁸ At nganang mekibat ning Ginu, Gawa kang ubingan a tangsu. Kaybat ibili me king metung a asta ban e ya mate potang akit ne ning ninumang metuktuk ubingan.

⁹ Inya ginawa yang tangsung ubingan i Moises at binili ne king metung a asta. At e ya mate ing ninumang matuktuk ubingan a kamandagan a lumawe kaniting tangsung ubingan.

Manibat king Bunduk ning Hor angga king Moab

¹⁰ Tiglus da ring memalen na ning Israel ing pamaglakbe ra; miras la Obot at karin la migkampu.

¹¹ Kaybat meko la karin at migkampu la king Iyeabarim, ing ilang a lugal dane aslagan ning Moab.

¹² Miglakbe no naman at migkampu la king Kapatagan ning Zered.

¹³ Minalis la at migkampu king dane norti ning Ilug ning Arnon, king ilang a lugal a mamangga king bansa da ring Amoreo. Ing Arnon ya ing pilatan na ning bansa da ring Moabita at ding Amoreo.

¹⁴ Inya masasabi king Libru tungkul karing Pamakipaglaban ning Ginu ing anti kaniti: ...ing balen na ning Waheb sakup ning Sufa at ding kapatagan na; ing Ilug ning Arnon

¹⁵ at ing baidbid da ring kapatagan a dudulung king Ar at papunta king angganan na ning Moab.

¹⁶ Meko la karin at miglakbe lang papunta king Beer, ing talaga nung nu na sinabi ning Ginu kang Moises ing anti kaniti: Tipunan mu la ring tau at dinan ku lang danum.

¹⁷ Kanita kinta de ring Israelita iting kanta: Sumibul ka, O talaga, at kanta ing kekeng isalubung king kekang danum

¹⁸ Ing talaga a kilkul ding prinsipi at pekalalam ding taung marangal, kayabe ning karelang setro at tukud. Kaybat da king ilang a ita, minta la king Matana at

¹⁹ sindu ra ing pamaglakbe at miras la kareting lugal: Nahaliel, Bamot,

²⁰ at ing kapatagan sakup da ring Moabita, tulid ning taluktuk ning Bunduk ning Pisga a durungdung king disyerto.

Simbut na la ning Israel di Aring Sihon at Aring Og

²¹ Peparala lang tubud ding Israelita kang Aring Sihon a Amoreo. Ngara deting tubud king ari,

²² Paintulutan yu ke sanang dumalan king kekayung kayarian. E kami dumalan karing kekayung asikan o mulahan ubas o kumang danum karing talaga yu. Tuntunan mi ya ing Dalan ning Ari angga king milual kami king kekayung kayarian.

²³ E na la peintulutan lumabas Aring Sihon. Tinipun na la ring sundalus na at lisuban da la ring Israelita karin king ilang ning Jahaz.

²⁴ Linaban la ring Israelita at apate da la ring dakal karing sundalus nang Aring Sihon at sekupan de ing bansa da manibat king Ilug ning Arnon angga king Jabok a miraras angga Ammon, uling matibe ya kuta ing angganan na ning Ammon.

²⁵ Inya ding Israelita sekupan da la ngan ding siudad da ring Amoreo pati na ing Hesbon at ding balen a makapadurut. Karin la menuknangan.

²⁶ Ing Hesbon ya ing siudad nang Aring Sihon a Amoreo. Ya ing mekilaban king milabas a ari na ning Moab, at ya mu rin ing mekabihag king kayarian na a miraras angga king Ilug ning Arnon.

²⁷ Inya ding poeta kakanta ra: Munta kayu king Hesbon; kekayu yang larinan ing siudad nang Aring Sihon.

²⁸ Ing aping ibat king Hesbon mikakalatang at silaban ne ing Ar ning Moab, at liklak ding bunduk-bundukan ning Arnon.

²⁹ Makalunus kayu, memalen ning Moab! Ala na kayung akarapat, O memalen ning Kemos! Memanakas la ring anak mung lalaki at mebihag ding anak mung babai king gamat nang Sihon a Amoreo.

³⁰ Inya lahi ra ala na king Hesbon at pati na king Dibon, uli ning silab a miras angga Medeba.

³¹ Inya menuknangan la ring memalen na ning Israel king sakup da ring Amoreo.

³² Kaybat na nita, mitubud yang tauan na i Moises ba reng tiktikan at pagaralan nung makananu reng lusuban ing siudad ning Jazer. At abihag de pati na ring balen a makapadurut. Tinabi da la ring Amoreong manuknangan karin.

³³ Kaybat minta la king Bashan, oneng i Og a ari karin at ding sundalus na lebanan da la inyang akatagpu da la karin king Edrei.

³⁴ Kanita ngana ning Ginu kang Moises, E ka tatakut, uling saupan da ka ban masambut ya i Og at ding sundalus na at ing kayarian na. Daptan mu kang Og itang depat mu kang Sihon a Amoreo at ari na ning Hesbon.

³⁵ Inya pete re at ding anak na ampon ding sundalus na; alang miligtas metung man at sinakup de ring Israelita ing gabun na.