Ding Bilang 20 - Ing Mayap a Balita Biblia

Ing Danum a ibat king Batu

¹ King mumunang bulan miras la king ilang ning Zin ding memalen na ning Israel at migkampu la king Kades. Karin ya mete at mikutkut i Miriam.

² Ala lang danum a ainum, inya misanmetung la laban kang Moises at Aaron.

³ Lepitan de i Moises at ngarang migreklamu, Mayap pang mete na kami naman kanitang mete la ding kamaganak mi king arapan na ning Ginu!

⁴ Obat dela mu ke pa keting ilang? Dela mu kami keti ban mate at ding sese ming animal?

⁵ Obat leko mu kami Ehipto at dela keting lugal a ala kang akua nanuman? Ala kang apangan; alang higera o ubas o bungang granada at alang danum a ainum!

⁶ Kanita i Moises at i Aaron likuan da la reting tau at minta la arap na ning Toldang tuknangan ning Ginu, at migsakab la king gabun at sinlag ya ing makasilo nang panga-atyu ning Ginu.

⁷ Ngana ning Ginu kang Moises,

⁸ Kuanan me ing tukud a makabili arap ning Kaban ning Kasunduan at kaybat ika ampon i Aaron tipunan yu la ring memalen. At king arapan da, magsalita ka king batu at lumual ing danum para karing tau at karing sese rang animal.

⁹ Memintu ya i Moises at kinua ne ing tukud.

¹⁰ Tinipun na lang Moises at Aaron ding memalen na ning Israel arap ning batu at nganang Moises karela, Makiramdam kayu, ikayung mapag-rebeldi! Buri yung palto kaming danum king batung ite?

¹¹ Kaybat na nita, tinas neng Moises ing tukud at saka ne berug mekatadua ing batu at minagus ing dakal a danum. Minum la ngan ding tau at ding sese rang animal.

Ing Parusa kari Moises at Aaron

¹² Pengamanuan na la ning Ginu ri Moises at Aaron. Ngana, Uli na ning e kayu lubus menalig kanaku ban ipakilala ing kabanalan ku king akakit da reting tau, e yu na la malyaring panimunan king paglakbe rang palub king gabun a pengaku kung ibie karela.

¹³ Ila deti ring danuman ning Meriba nung nukarin milyari ing pamagreklamu da ring memalen na ning Israel laban king Ginu at nung nu na pepakit ning Ginu ing kabanalan na.

E la Mekadalan Edom ding Israelita

¹⁴ Manibat Kades, peparala yang tubud i Moises ban makikit king ari na ning Edom at sabian da ing anti kaniti: Iti ing pasabi da ring kamaganak mung Israelita. E makalingad keka ing sablang kasakitan a delanan mi.

¹⁵ Minta la Ehipto ding makatua mi at karin la menuknangan kilub ding makabang panaun. Oneng ding tau Ehipto pepasakitan da la ampon ikami.

¹⁶ Inya sinaingsing kaming meniawad saup king Ginu. Pekibatan na kami ning Ginu at mitubud yang anghel at ya ing milual kekami king Ehipto. Atyu kami ngeni keni Kades, ing balen lele na ning angganan ning kekang kayarian.

¹⁷ Paintulutan mu kami sanang dumalan king kekang kayarian. E kami dumalan karing kekayung marangle o mulahan ubas o minum karing talaga yu. Ing bukud mung dalanan mi ya ing Dalan ning Ari. E ke magbandang wanan o kayli anggang e kami milual king kekayung sasakupan.

¹⁸ Nganang mekibat ning ari ning Edom, E kayu malyaring dumalan king kekaming kayarian. Panabakan da kayu kabud dumalan kayu!

¹⁹ Mekisabi lang pasibayu ring Israelita. Ngara, Manatili kami mung bukud dumalan king Dalan ning Ari at bayaran mi nung sakaling ikami o ring sese ming animal minum kami king danum yu. Ing bukud ming nasa ya ing makadalan kami. Paintulutan yu kami sana.

²⁰ Ngana ning ari, E malyari! At kaybat penimunan na la ring dakal nang sundalus a pakasandata ban lusuban da la ring Israelita.

²¹ Inya menaliwa lang dalan ding Israelita, uling e na la peintulutan ning ari ning Edom ing dumalan king kayarian na.

Ing Pangamate nang Aaron

²² Manibat king Kades, miglakbe la ring memalen na ning Israel at miras la king Bunduk ning Hor,

²³ ing angganan na ning gabun ning Edom. At ngana ning Ginu kari Moises at Aaron,

²⁴ E na magluat at mate ne i Aaron. E ya milub king gabun a binie ku karing memalen na ning Israel, uling ya ampon ika e yu tiparan ing utus ku inyang atyu kayu karing danuman na ning Meriba.

²⁵ Ituki meng mukiat king babo na ning Bunduk ning Hor i Aaron at i Eleazar a anak na.

²⁶ Karin mu ilukas ing imalan-pari a susulud nang Aaron at kaybat isulud mu kang Eleazar uling mate ya karin i Aaron.

²⁷ Memintu ya i Moises at minukiat la king bunduk king akakit da ring Israelita.

²⁸ Likas neng Moises ing imalan nang Aaron at pepasulud na iti kang Eleazar. At mete ya i Aaron karin king babo ning Bunduk ning Hor. Kaybat kinuldas la king bunduk.

²⁹ Inyang abalitan na ning mabilug a balen ing pangamate nang Aaron, menangis la kilub ding atlung pulung aldo.