Ding Bilang 19 - Ing Mayap a Balita Biblia

Ing Abu ning Baka a kule Malutu

¹ Ngana ning Ginu kari Moises at Aaron,

² Iti kautusan ya at tuntunan a patupad ku. Iyutus yu karing memalen na ning Israel ing magdala la kekayung baka a kule malutu a alang dipektu at e pa mipasuluranan paud.

³ Ibie ya iti kang Eleazar a pari at kaybat idala ya lual ning kampu. Paten ya karin iting baka king arapan nang Eleazar.

⁴ Kaybat na nita, i Eleazar a pari kuma yang daya king kapamilatan da ring taliri na at ipisik nang pitung besis iting daya king dane arapan ning Toldang tuknangan ku.

⁵ Dulukan ya ing baka king akakit nang Eleazar, pati na ing balat, laman, daya, at bituka.

⁶ Kaybat ing pari kuma yang dutung a sedro, hisopo, at malutung tali at iyatsa na la reti libutad na ning api nung nu ya durulukan ing baka.

⁷ Kaybat pipian na ing imalan na at saka ya mandilu. Malyari ne kanitang lungub king kampu, oneng manatili ya pa mu ring e malinis angga itang bengi, agpang king Kautusan.

⁸ Sukat na namang pipian ing imalan na nitang lalaking dinuluk king baka at mandilu ya, oneng manatili ya pa mu ring e malinis angga itang bengi, agpang king Kautusan.

⁹ Ing lalaking tumipun king abu ning baka sukat yang malinis, agpang king Kautusan, at ibili na iti king malinis a lugal lual na ning kampu. Isinup iting abu ban agamit da ring memalen na ning Israel king pamisadia king danum a gamitan ban linisan itang e melinis, agpang king Kautusan, uling itang baka ain ya para king kapamayaran king kasalanan.

¹⁰ Pipian na ning lalaking menipun king abu ning baka ing imalan na, oneng manatili yang e malinis angga itang bengi, agpang king Kautusan. Manatili ya iting tuntunan king kapilan pa man para karing Israelita at para karing dayuan a makipamalen karela.

Ing Tinagkil king Bangke ning Tau

¹¹ Maging marinat ya kilub ding pitung aldo ing ninumang tagkil king bangke ning tau, agpang king kautusan.

¹² Sukat nang linisan ing sarili na king kapamilatan na ning danum a makatungkul kaniti king katlu at king kapitung aldo. Kaybat na nita, malinis ne. Pero e ya malinis nung e na linisan ing sarili na king katlu at king kapitung aldo.

¹³ Ninuman ing tagkil king bangke ning tau at e na linisan ing sarili na king danum a para kaniti, dirinatan ne ing Toldang tuknangan ku at sukat yang itiwalag king balen ning Israel, uling e ya miglinis. Inya manatili yang e malinis.

¹⁴ Oyni ing tuntunan potang ing metung a tau mete ya king toldang tuknangan: ding sablang atyu karin o ding lungub karin e la malinis kilub ding pitung aldo.

¹⁵ Mituring yang e malinis ing isanu mang kasangkapan a makabuklat o alang takap.

¹⁶ Ninumang atyu king marangle ing tagkil king mete king tabak o king bangke ning tau o tagkil butul mete o king kutkutan, mituring yang e malinis kilub ding pitung aldo.

¹⁷ Ban milako king anti kaniting kabilian, ing taung mituring e malinis kuma yang ditak a abu king dilukan a baka a kule malutu at miyain bilang ain-a-kapamayaran-king-kasalanan. Ibili na iting abu king lulanan a ating kasaklu-saklung danum.

¹⁸ Kaybat kuma yang tangke ning hisopo ing taung tuturing nang malinis ning kautusan, itiltil ne king danum at pisikan ne ing Tolda, ding sablang kasangkapan, ding sablang taung atyu kilub, antimu rin ing taung mekatagkil king butul o king bangke ning taung metepete re man iti o ali o ing kutkutan.

¹⁹ At pisikan ne ning taung tuturing nang malinis ning kautusan ing mituring a e malinis king katlung aldo at king kapitung aldo. Sukat nang pipian ning taung e malinis ing imalan na at mandilu ya. At malinis ne pangayalbug ning aldo.

²⁰ Nung ing taung mituring a e malinis e ya maglinis king kapamilatan na ning danum a paglinis, manatili yang e malinis. Itiwalag ya pa king balen na ning Israel uling dinatan ne ing Toldang tuknangan ku, ing Ginu.

²¹ Iti tuntunan yang sukat tuparan king kapilan pa man. Sukat nang pipian ing imalan na ning taung memisik king danum a paglinis at ituring yang e malinis angga itang bengi ing ninumang taung mekatagkil kaniting danum.

²² Ituring yang e malinis ing nanumang tigkilan na ning taung e malinis, at ing ninumang tagkil karing tigkilan na manatili yang e malinis angga itang bengi.