Ding Bilang 18 - Ing Mayap a Balita Biblia

Ing Katungkulan da ring Pari at Levita

¹ Ngana ning Ginu kang Aaron, Ika, ding anak mu, at ding Levita ilang ating pakibatan king nanumang mararapat king Toldang tuknangan ku. At pangaras king katungkulan da ring pari, ika at ding anak mung lalaki ing maki pakibatan.

² Iyabe mu la ring kamaganak mu, ding king tribu nang Levi, ban sumaup magobrang kayabe mu kabang susuyu ka at ding anak mu king Toldang tuknangan ku.

³ Sukat dang tuparan ding Levita ing katungkulan da keka at antimu rin ing katungkulan da king Toldang tuknangan ku. E la sukat lalapit karing sagradung kasangkapan ning Banal a Lugal o ning altar. Mate la at ika kabud linapit kayu.

⁴ Bukud mung ila at ala nang aliwa pang maging kasaup mu king obra king Toldang tuknangan ku.

⁵ Bukud mung ika at ding anak mu ing mamahala king Banal a Lugal at king altar ban e na ku mimua karing memalen na ning Israel.

⁶ Lawan mu, aku ing memili karing Levitang kamaganak mu bilang regalu keka. Mitalaga la kanaku ban daptan da ing katungkulan da king Toldang tuknangan ku.

⁷ Bukud mung ika at ding anak mu ing ganap king katungkulan pari, itang ating kaugnayan king altar at king nanumang atyu king Kabanal-banalan a Lugal. Ila deti ring pakibatan mu, uling binie ku keka bilang regalu ing panga-pari. Paten ya ing ninumang e karapatdapat lalapit king altar.

Ing Dake da ring Pari

⁸ Ngana ning Ginu kang Aaron, Babie ku la keka ding sablang makabukud a ain a babie da kanaku ding memalen na ning Israel a e meduluk bilang ain. Babie ku la keka at karing anak mu bilang dake yu angga king kapilan pa man.

⁹ Keka at karing anak mu ing makatuking peka sagradung e meduluk king altar: ding ain-a-binutil, ding ain-a-kapamayaran-king-kasalanan o ain-a-kapaglarinan-king-kasalanan. Mangaintulid keka iting ain at karing anak mung lalaki.

¹⁰ Kilalanan mu iti bilang sagradu at sukat mung kanan king banal a lugal, at ding makapangan mu kaniti ila ring lalaki.

¹¹ Keka la mu rin at karing pamilya mu ding aliwa pang makabukud a ain a babie da kanaku ding Israelita. Babie ku la deti keka at karing anak mu king kapilan pa man. Malyari na lang kanan ning ninuman king pamilya mu, nung malinis ya, agpang king kautusan.

¹² Babie ku la naman keka ding mumunang pekamasanting a bunga da ring tanaman da ring Israelita a iyain da kanaku balang banua: larung olibo, alak, at pamangan.

¹³ Kekayu ngan yan at malyari nang kanan ning ninuman king pamilya mu, nung malinis ya, agpang king kautusan.

¹⁴ Kekayu ngan ing sablang penata rang ibie kanaku ding Israelita.

¹⁵ Keka na la naman ding balang mibait a pangane anak o sese animal a tatalaga da ring Israelita kanaku. Kailangan mu lang tanggapan ding alagang panatbus da king pangane rang anak at king pangane sese rang animal a mituring e malinis.

¹⁶ Potang pabulan ne ing anak kanita re atbusan king alagang limang pirasung pilak, agpang king timbangan ning santuaryu.

¹⁷ E ra la malyaring atbusan salapi ding pangane baka, tupa, at kambing; mitalaga la reti para kanaku at sukat ipisik king altar ing daya ra at dulukan ing taba ra bilang ain-a-pamangan. Babie tula kanaku, ing Ginu, ing bau na niti.

¹⁸ Mangaintulid kekayu ing karni, antimo ing pitsu at ing wanan a puad a karelang iyain.

¹⁹ Babie ku keka at karing anak mu ing sabla rang makabukud a ain a babie da kanaku ding Israelita bilang katuliran yu king kapilan pa man. Iti ing kasunduan ku kekayu a manatili king kapilan pa man.

²⁰ Ngana pa ning Ginu kang Aaron, E ka tanggap nanumang pibandian o dake king gabun a mipangaku at ala kayung mana nanuman. Aku, ing Ginu, ing dake yu at ing mana yu.

Ing Dake da ring Levita

²¹ Ngana ning Ginu, Ing dake da ring Levita ila ring sikapulu a babie da kanaku ring memalen na ning Israel. Iti ya ing ablas king kasuyuan da king Toldang tuknangan ku.

²² E na la malyaring lumapit ding e Levita king Toldang tuknangan ku ban e la mikasala at e mate.

²³ Manibat ngeni ding Levita ilang manibala king kasuyuan king Toldang tuknangan ku, at ila ring ating pakibatan kaniti. Tuntunan ya iti a sukat ipatupad kekayu at karing lahi yu king sablang panaun. Wa, ala lang dake ding Levita king gabun a mipangaku,

²⁴ uling ing binie kung dake karela ya ing sikapulu na ning balang Israelita a babie na kanaku bilang ain a makabukud. Iti ing sangkan nung inya sinabi ku karela ing ala lang dake king gabun a mipangaku.

Ing Sikapulu da ring Levita

²⁵ Ngana ning Ginu kang Moises,

²⁶ Sabian mu karing Levita king neng tanggapan da na la ring sikapulu karing memalen na ning Israel a babie ku karela, sikapuluan da la naman deti bilang makabukud dang ain kanaku, ing Ginu.

²⁷ Maging katumbas ne ning makabukud a ain da ing ain da ring aliwang tribu a memupul trigu o ubas.

²⁸ King makanyan a paralan ila man iyain de ing karelang makabukud a ain a mangaintulid king Ginu king kapamilatan da ring sikapulung tinggap da karing memalen na ning Israel. Iti namang sikapulu karing sikapulu miyabie ya kang Aaron a pari.

²⁹ Kuanan de ing ibie ra manibat king pekamasanting nang dake ning tinggap da.

³⁰ Sabian mu pa karela king potang iyain da na ing pekamasanting nang dake king sikapulu da ring memalen na ning Israel, karela na itang mitagan antimo nung makananung ing metung a ortelanu maging bandi na itang mitagan kaybat nang inain ing sikapulu na.

³¹ Kaybat ila at ding pamilya ra malyari da nang kanan nu mang lugal a buri da, uling ita ing ablas king kasuyuan da king Toldang tuknangan ku.

³² E la mikasala nung kanan da iti, nung ing pekamasanting nang dake ya ing inain da. Pero mate la, nung lapastanganan da la ring sagradung ain da ring memalen na ning Israel.