Ding Bilang 10 - Ing Mayap a Balita Biblia

Ding Pilak a Trumpeta

¹ Ngana ning Ginu kang Moises,

² Gawa kang aduang trumpeta king pinukpuk a pilak at gamitan mu la king pamaniaus karing tau ban mitipun la at potang lumakad na la.

³ Potang agnan da lang tiupan, mitipun la arapan mu ding sablang memalen na ning Israel king pasbul ning Toldang tuknangan ku.

⁴ Nung metung ya mu ing tiupan da, ding mitipun arapan mu ila ring manimuna da ring tribu.

⁵ Potang makuyad ya ing mumunang tiup ning trumpeta, ding tribung maka kampu king dane aslagan ila ring maglakbe.

⁶ Potang ing tiup ning kaduang trumpeta ya ing maramdam, ding tribung maka kampu king dane mauli ila ring maglakbe. Makuyad la ring tiup ning trumpeta tungkul king pamaglakbe.

⁷ Makayaliwa ya at makaba ing tiup da ring trumpeta potang ausan lang mitipun ding memalen na ning Israel.

⁸ Katungkulan da ring pari a anak nang Aaron ing tiupan da la ring trumpeta, at ala nang aliwa pang tumiup nung e mu ila king sablang panaun.

⁹ Potang lumusub la ding kalaban yung manalipit kekayu king kekayung lugal, tiupan yu la ring trumpeta at aku, ing Ginung kekayung Dios, saupan da kayu at iligtas.

¹⁰ Karing aldo na ning kekayung pamagpiesta, antimo ing Piesta ning Bayung Bulan, tiupan yu la naman ding trumpeta neng yayain yu la reng kekayung ain-a-durulukan at ain-ning-pamisulusulu. At aku, ing Ginung kekayung Dios, saupan da kayu.

Ing Pamangalag dang Tolda ring Israelita

¹¹ King kaduang pulung aldo ning kaduang bulan na ning kaduang banua ning paglako ra Ehipto, mitas ya ing biga babo ning Toldang tuknangan ning Ginu.

¹² Inya meko la ring Israelita king disyerto ning Sinai at miglakbe la. Migdatun ya ing biga karin king ilang ning Paran.

¹³ Iti ya ing mumuna rang pamaglakbe agpang king utus ning Ginu kang Moises.

¹⁴ Makaayus ing pamitukituki da ring tribu neng maglakbe la. Ing mumuna ila ring tapuk na ning tribu nang Juda a panimunan nang Nason, ing anak nang Aminadab. Atin lang bandera.

¹⁵ Ing katuki na ya ing tribu nang Isacar a panimunan nang Netanel, ing anak nang Zuar,

¹⁶ at ing tribu nang Zebulun a panimunan nang Eliab, ing anak nang Helon.

¹⁷ Katuki da la ring anak da ri Gerson at Merari; ila ring talapagdala king kelag dang Toldang tuknangan ning Ginu.

¹⁸ Ding katuki da ila ring tapuk na ning tribu nang Ruben a panimunan nang Elizur, ing anak nang Sedeur. Atin ya namang bandera ing tapuk da.

¹⁹ Ing katuki na ya ing tribu nang Simeon a panimunan nang Selumiel, ing anak nang Zurisadai.

²⁰ Ing katuki da ya ing tribu nang Gad a panimunan nang Eliasaf, ing anak nang Deuel.

²¹ Ing katuki da king paglakbe ila ring pamilya nang Kohat ning tribu nang Levi. Ila ring magdala karing sagradung kasangkapan. Makatalakad ne ing Toldang tuknangan ning Ginu bayu la miras ketang lugal nung nu la tuknang.

²² Ding katuki da ila ring tapuk na ning tribu nang Efraim a panimunan nang Elisama, ing anak nang Amiud. Atin la namang bandera.

²³ Ing katuki da ya ing tribu nang Manase a panimunan nang Gamaliel, ing anak nang Pedazur.

²⁴ Ing katuki da ya ing tribu nang Benjamin a panimunan nang Abidan, ing anak nang Gideoni.

²⁵ Tauli ya ing tribu nang Dan a panimunan nang Aiezer, ing anak nang Amisadai. Ya ing pekapun da ring tribung pakasandata a peka dipensa king kagulutan.

²⁶ I Pagiel, ing anak nang Ocran, ya ing manimuna king tribu nang Aser at

²⁷ i Aira, ing anak nang Enan, ya ing manimuna king tribu nang Neftali.

²⁸ Iti ya ing kaayusan da ring memalen na ning Israel neng maglakbe la.

²⁹ Nganang migsalitang Moises kang Hobab, ing bayo na, Makasadia na kaming maglakbe papunta ketang lugal a pengaku nang ibie kekami ning Ginu. Tuki na ka kekami at e ra ka paburen uling masanting karin.

³⁰ Nganang Hobab, E ku bisa. Mas mayap ing muli na ku king balen kung tibuan at karing kamaganak ku.

³¹ Oneng nganang Moises, Dapat a mayap, e mu kami sana lalakuan. Ika mu ing bukud makibalu king ilang nung nu kami magkampu, inya ika mu ing makaturu king dalanan mi.

³² Dakayanan da ka king nanumang bendisyun a ibie ning Ginu kekami, nung tuki ka kekami.

Ing Pamaglakbe da ring Memalen na ning Dios

³³ Miglakbe lang atlung aldo ring Israelita kaybat deng likuan ing Sinai, ing sagradung bunduk ning Ginu. Makauna ya karela ing Kaban ning Kasunduan ning Ginu king pamaglakbe ra ban manintun lugal a pipagpaynawan da.

³⁴ At atyu tulid da ing biga na ning Ginu neng aldo maglakbe la.

³⁵ Neng bitbitan da ne ing Kaban ning Kasunduan, sabian nang Moises, Talakad na ka, O Ginu, at itabi mu la ring kalaban mu; paburen mung mamulayi la ding masama keka.

³⁶ At neng tuknang na la king paglakad da, sabian nang Moises, Mibalik na ka, O Ginu, karing libu-libung pamilya nang Israel.