Deuteronomio 12 - Ing Mayap a Balita Biblia

Ing Bukud Lugal a Pisasamban king Dios

¹ Ila deti ring kautusan at tuntunan a sukat yung pagkapilitan pamintuan king gabun a pengaku nang ibie ning Ginung kekayung Dios karing makatua yu. Tuparan yu la ngan deti kabang mabie kayu.

² Lasakan yu la ngan king gabun a sakupan yu ding sablang lugal nung nukarin da la sasamban ding tau ding kikilalanan dang dios a atyu karing taluktuk da ring bunduk, karing bunduk-bundukan at karing lalam da ring tanaman.

³ Lasakan yu la ding karelang altar at pamalbalan ding sagradu rang asias. Silaban ye ing simbulu ning karelang diosang i Asera at panabakan ding dinukit dang larawan at kalisan la ding lagyu ra.

⁴ E yu sukat pakiapusan ing pamanyamba ra king pamanyamba yu king Ginung kekayung Dios.

⁵ Ituldu ne ing metung a lugal a pilinan na king gabun a sakup na ning metung karing tribu yu. Karin kayu munta at samban ye.

⁶ Karin yu idala ing ain-a-durulukan, ding ain-sakripisyu, at ding miyayaliwa pang ain antimo ding sikapulu, ing laus lub a ain, at ing pangane anak da ring sese yung animal.

⁷ Ketang lugal mu ring ita karin kayu miyabe-abe mangan arapan ning Ginung kekayung Dios bilang kapurian at kapasalamatan king bendisyun a binie na kekayu at karing pamilya yu.

⁸ E yu na malyaring daptan itang daraptan tamu antimo ngeni; itang sarasarili tamung ayus ning pamanyamba,

⁹ uling e kayu pa miras king gabun a babie na ning Ginung kekayung Dios nung nukarin tamu malyaring makapagpaynawa.

¹⁰ Potang mekadalakit na kayu king Ilug ning Jordan at manuknangan na king gabun a babie na ning Ginung kekayung Dios bilang mana yu, iligtas na kayu karing kalaban yu at dinan na kayung kapayapan.

¹¹ Kanita mamili yang metung a lugal ing Ginung kekayung Dios nung nukarin ye malyaring samban. Karin yu idala ing sablang inutus kung idala yu: ding ain-a-durulukan at ding miyayaliwang ain-sakripisyu; ding kekayung sikapulu, ding kekayung ain, at ding aliwa pang ain a penata yung ibie king Ginu.

¹² Ikayu, ding anak yu at ipus sukat kayung tumula arapan ning Ginu. Tumula kayung abe ding Levita a manuknangan karing kekayung balen, uling ala lang dake deti king gabun a bandian yu.

^13-14 Mingat kayu uling e bala namung lugal malyaring gamitan king pamiyain yung ain-a-durulukan. Iyain yu ing kekayung ain ketang lugal na ning metung karing kekayung tribu a pilinan na ning Ginu. Keta mung lugal a ituldu na karin yu iyain at tuparan ing sablang iyutus kung daptan yu.

¹⁵ Malyari kayung makamate karing sese yung animal at mangan king karni ra king isanu mang balen nung nukarin kayu manuknangan. Makapangan kayu anggang bisa kayu agpang king babie na kekayu ning Ginu. Malyari yang mangan ing taung mituring malinis at e malinis karing animal antimo ing usa o ing antelope.

¹⁶ E yu malyaring kanan ing daya; iti kailangan itugtug king gabun anting danum.

¹⁷ E yu la malyaring kanan karing kekayung lugal ding sikapulu karing kekayung pupul o ing alak at larung olibo o ding pangane karing sese yung animal o ding ain a penata yu o ding kusa yung ain o nanumang ain.

¹⁸ Ikayu at ding anak yu ampon ipus at ding Levitang manuknangan king balen yu, malyari yu la mung kanan deti king arapan na ning Ginung kekayung Dios, oneng keta mung lugal a pinili na ning Ginung kekayung Dios. At sukat kayung tumula king Ginung kekayung Dios king sablang depat yu.

¹⁹ E yu la sana paburen ding Levita kabang mabibie kayu king gabun yu.

²⁰ Potang idagul na ne ning Ginung kekayung Dios ing gabun a kekayung sakup, antimo ing pengaku na kekayu, at uling bisa kayung mangan karni, ngayung sumabi, Mangan kung karni, malyari kayung mangan anggang bisa kayu.

²¹ Nung marayu kayu ketang lugal a pinili na ban misamban ya, malyari yeng paten ing isanu man karing sese yung animal a binie na kekayu ning Ginu. At malyari yung kanan ing karni king balen yu, antimo ing inutus ku na kekayu. Mangan kayu anggang bisa kayu.

²² Kanan ye antimo nung makananu yeng kakanan ing usa o ing antelope. Malyari yang mangan ing taung mituring malinis at ing e malinis.

^23-24 Mu pin e ye malyaring kanan itang karning ating daya, uling atyu king daya ing bie. E yu sukat kakanan ing bie a atyu king daya. Itugtug yu ing daya king gabun anting danum.

²⁵ E yu kakanan iti at mibendisyunan kayu at ding maging lahi yu.

²⁶ Oneng ding ain a banal at ding ain a pengaku yung iyain king Ginu, sukat lang idala ketang lugal a pilinan na.

²⁷ Ding ain-a-durulukan, ing laman at daya iyain la king altar ning Ginung kekayung Dios. Itugtug ing daya king altar, at malyari yung kanan ing laman.

²⁸ Pagkapilitan yu la sanang tuparan deting panabilin a sasabian ku kekayu ban mibendisyunan kayu at ding maging lahi yu king kapilan pa man, uling daraptan yu itang mayap at matulid king akakit na ning Ginung kekayung Dios.

Ing Babala Laban king Pamanyambang Idolo

²⁹ Lasakan na la ning Ginung kekayung Dios ding bansang luluban yu ban sakupan, inya kuanan yu ing lugal da at karin kayu manuknangan.

³⁰ Potang melasak na la, mingat kayu ban e yu apakiapusan ing dapat da. E na kayu mangutang pa nung makananu da lang sasamban ding kikilalanan dang dios ban e yu apakiapusan ing pamanyamba ra.

³¹ E ye sukat sasamban ing Ginung kekayung Dios king paralan na ning karelang pamanyamba karing kikilalanan dang dios. Uling king pamanyamba ra karing kikilalanan dang dios daraptan da ing sablang makasumami a pikakasaman na ning Ginu angga na king sisilaban da la ring anak dang lalaki at babai ban iyain karing kikilalanan dang dios.

³² Pamintuan yu lang mitmung kaingatan ding sablang kautusan a sinabi ku kekayu. E yu la daragdagan at e yu la naman babawasan.