Daniel 9 - Ing Mayap a Balita Biblia

Ing Panalangin nang Daniel para karing Kabalen na

¹ Sekupan neng Dario a tau Media at anak nang Asuero ing kayarian ning Babilonia.

² Kanitang mumunang banua ning pamag-ari na kasalukuyan ku lang pagaralan ding librung sagradu, at mimisip ku tungkul karing pitung pulung banuang manatili yang lasak-lasak ing Jerusalem, agpang king sinabi na ning Ginu kang propeta Jeremias.

³ At taimtim kung menalangin king Ginung Dios; menalangin ku king Dios, mig-ayunu, misulud imalan a magaspang, at linukluk ku king abu.

⁴ Menalangin ku king Ginung kanakung Dios at kilala ku la king arapan na ding kasalanan da ring kabalen ku. Ngaku, Ginung Dios, mitmu kang dangalan at ikami gagalangan da ka. Tapat ka king kasunduan mu at papakit kang lugud a e kukupas karetang malugud keka at tutupad karing kekang kautusan.

⁵ Mikasala kami, meging makasalanan kami, ginawa keng kamalian. E mi tiparan ing inutus mung gawan mi at gilutan mi ing mayap a pepakit mu kekami.

⁶ E ke mekiramdam karing talasuyu mung propeta a migsalita king lagyu mu karing ari mi, karing pamuntuk mi, karing makatua mi, at king mabilug mung bansa.

⁷ Ika, Ginu, parati mung gagawan ing matulid, oneng maralas ing lalapastanganan mi ing sariling dangalan mi. Yan ing katutuan tungkul kekaming atyu manuknangan Judea at Jerusalem at pati na ding Israelita a kekang kinalat karing bansang makalapit at makarayu uling e la meging tapat keka.

⁸ Ginu, ginawa lang makarine ding kekaming ari, ding pamuntuk mi, at makatua mi at mikasala la keka.

⁹ Mapaglunus ka at mapamatawad agyang linaban kami keka.

¹⁰ E ke mekiramdam keka, O Ginung kekaming Dios, inyang sinabi mu kekaming mibiebie kami agpang karing kautusan a binie mu king kapamilatan da ring talasuyu mung propeta.

¹¹ E na la tiparan ning mabilug a Israel ding kekang kautusan at gilutan na ka at e ya mekiramdam karing amanu mu. Mikasala kami keka; inya naman pepagpa mu la kekami ding sumpa a misulat king Batas nang Moises a kekang talasuyu.

¹² Tiparan mu itang sinabi mung gawan mu kekami at karing pamuntuk mi. Perusan meng mabayat ing Jerusalem maygit ketang pepagpa mu karing aliwang siudad ning yatu,

¹³ pepagpa mu la ngan kekami ding parusang misulat king Batas nang Moises. Agyang ngeni, O Ginung kekaming Dios, e ke migkapilit para pamatulan da ka king kapamilatan ning e mi pamangawang kasalanan o king pamanuki mi king katutuan mu.

¹⁴ Ika, O Ginung kekaming Dios, makasadia kang parusan mu kami at gewa mu ita, uling parati mung daraptan ing matulid at e ke mekiramdam keka.

¹⁵ O Ginung kekaming Dios, pepakit mu ing kekang upaya king kapamilatan ning pamilual mu king kekang balen ibat Ehipto, at angga man ngeni e makakalinguan ing upaya mu. Mikasala kami; e mayap ing gewa mi.

¹⁶ Iningat mu kami king milabas a panaun, inya e na ka sa mimimua king Jerusalem. Ya ing siudad mu, ing banal mung bunduk-bundukan. Ding tau karing makasiping a bansa linawe reng mababa ing Jerusalem ampon ding kekang memalen uli da ring kekaming kasalanan, at uli da ring e ustung bage a depat da ring makatua mi.

¹⁷ O kekaming Dios, pakiramdaman mu sa ing kanakung panalangin at pamakisabing mayap. Italakad meng pasibayu ing Templo mung melasak; larinan me ban abalu na ning balang metung at metung king ika pin ing Dios.

¹⁸ Makiramdam ka kekami, O Dios, lawan mu kami at akit mu ing kaligaligan mi ngeni at ing kasakitan ning siudad a magdala king lagyu mu. Manalangin ke keka uling mapaglunus ka, e uling ginawa keng mayap.

¹⁹ Ginu, pakiramdaman mu kami. Ginu, patawaran mu kami. Ginu, pakiramdaman mu kami at kimut na ka sa! E mu yantala ban abalu na ning balang tau king ika Dios ka! Bandi me ing siudad at ding tau.

Melino neng Gabriel ing Ula

²⁰ Sindu ku ing pamanalangin, ing pamangilala ku karing kasalanan ku, at ing kasalanan da ring kabalen kung Israelita ampon ing pamakisabi kung mayap king Ginung kanakung Dios king italakad ne sanang pasibayu ing banal nang Templo.

²¹ Kabang manalangin ku, i Gabriel, ing anghel a ikit ku king minunang vision, susulapo yang dinatang king lugal nung nu ku karin. Oras na kanita para king pamiyain king ain-sakripisyu ning kabengian.

²² Ngana kanaku, Daniel, dinatang ku keti ban saupan da kang makaintindi king ula.

²³ Inyang megumpisa kang mekisabing mayap king Dios, pekibatan na ka. Kaluguran na ka, inya dinatang ku ban sabian ku keka ing pakibat. Ngeni makiramdam ka kabang mamalinawan ke ing vision.

²⁴ Pitung besis a tiapitung pulung banua ya ing kaba ning panaun a tikda ning Dios para mayatbus la king kasalanan at king e mayap ding kekang kabalen at ing banal a siudad. Mipatawaran ing kasalanan at mag-ari ing alang anggang hustisia ban ing vision at ing ula mipaltutu, at mitalaga yang pasibayu king Dios ing banal a Templo.

²⁵ Pansinan mu at paka intindian iti: Manibat king oras ning panga-ibie ning utus para italakad yang pasibayu ing Jerusalem angga king paniatang ning pamuntuk a pinili na ning Dios, pitung besis a tiapitung banua ing lumabas. Pasibayu yang malarin ing Jerusalem at mika dalan at mangatibe dipensa, at talakad yang pitung besis a tianam apulu't aduang banua. Oneng maging panaun ne ning kaligaligan.

²⁶ At king kawakasan ning panaun a ita paten de ing pamuntuk a pinili ning Dios king paralan a e makatuliran. Malasak ya ing siudad at ing Templo king kapamilatan da ring dakal a sundalung lulusub ning metung a mayupayang pamuntuk. Ing kawakasan datang anti ing albug, darala na ing gera at kasiran a sidia ning Dios.

²⁷ Itang pamuntuk a ita mika atin yang matatag a pamakikasundu karing dakal a tau kilub ding pitung banua, at potang mepitna nang linabas iting panaun, ipatuknang na ing pamiyain ain-sakripisyu at ain. Mibili ya ing Makapangilabut a Kasiran king matas nang diling lugal ning Templo, at manatili ya karin angga king itang mibili karin dasnan ne ning kawakasan a sidia ning Dios.