Daniel 8 - Ing Mayap a Balita Biblia

Ing Vision nang Daniel tungkul king Tupang Lalaki at ing Kambing

¹ Kanitang katlung banua ning pamag-ari nang Belsazar, ikit ke ing kaduang vision.

² King vision kabud ku na ikit ing sarili ku king siudad ning Susa a makapadurut pader king probinsia ning Elam. Makatalakad ku lele ning Ilug ning Ulai.

³ At karin lele ning ilug ikit ke ing metung a tupang lalaking ating aduang makabang sagu; mas makaba ya at bayu ing metung kesa king metung.

⁴ Linawe ke ing tupang lalaki. King kapamilatan da ring sagu na manyagudsud ya king dane albugan, norti, at mauli. Alang animal a makasabat o makaligtas king upaya na. Gewa na itang buri na at meging palalu ya.

⁵ Kabang pibulebulayan ku nung nanu ing kabaldugan na niti, mabilis yang dinatang ing metung a kambing a ibat king albugan; e la sasayad ding bitis na king gabun king kasalusu na. Atin yang metung a kapansin-pansin a sagu pilatan da ring mata na.

⁶ Sinulung ya papunta king tupang lalaking ikit kung makatalakad lele ning ilug at siguran ne king mabilug nang sikanan.

⁷ Pegumasdan ku ing pamaglusub na king tupang lalaki. Tune yang mua, inya segudsud ne at apakli na la ding adua nang sagu. Ala yang sikanan ing tupang lalaki ban lumaban. Mibalugse ya king gabun at medamusak ya at ala metung man a malyaring makapagligtas.

⁸ Lalu yang meging palalu ing kambing, oneng mepakli ya ing sagu na king kasusukdulan ning upaya na. Linto la king lugal na ding apat a kapansin-pansin a sagu; tutuldu ya ing balang metung karing miyayaliwang direksyun.

⁹ Tinubu ya king metung karing apat a sagu ing metung a malating sagu, at mamabut ing kayupayan na angga king mauli at king aslagan ampon king Gabun a Mipangaku.

¹⁰ Meragul ya at tutung mesikan ban lusuban na la ding sundalus ning banua, ding batuin, at inatsa na la king gabun ding mapilan at pindamusak na la.

¹¹ Selangsangan ne pati ing Prinsipi da ring sundalus ning banua; pepatuknang na ing aldo-aldo ain a miyabie arap na at lesakan ne ing Templo.

¹² Mikakasala la ding tau karin lugal king iyain da la aldo-aldo ding ain, at miyugse ya king gabun ing tune relihiun. Migtagumpe ya ing sagu king heganaganang gewa na.

¹³ Kaybat na nita, dimdam keng mengutang ing metung a anghel king kalupa nang anghel. Ngana, Angga kapilan la manatili deting bage a meyakit king vision? Nu pa anti kaluat bayu ya miyalilan ing makasumaming kasalanan king aldo-aldo pamiyain ain-sakripisyu? Angga kapilan kaya ing madadakurak la ring sundalus ning banua at ing Templo?

¹⁴ Dimdam keng mekibat ing aliwang anghel. Ngana, Manatili kilub ding libu at dinalan limang pulung aldo, at king panaun a ita e la miyain ding ain para bengi at ain para abak. Kaybat na nita, malarin yang pasibayu ing Templo.

Melino neng Anghel Gabriel ing Vision

¹⁵ Pigkapilitan keng paki-intindian ing vision nung nanu ya kabaldugan. Kabud-abud ating metung a taung tinalakad arapan ku.

¹⁶ Dimdam ke ing metung a bosis a mamaus lipat ning Ilug ning Ulai. Ngana, Gabriel, malinawan mu ing kabaldugan ning ikit na.

¹⁷ Dinatang ya i Gabriel at tinalakad ya lele ku at misakab ku king gabun king pangatakutan ku. Ngana kanaku, Anak ning tau, makiramdam ka king kabaldugan ning vision. Atin yang pangataid ing vision king kawakasan ning yatu.

¹⁸ Kabang magsalita ya, mipase ku king gabun; milako ku male tau. Oneng dimput na ku at telakad

¹⁹ at ngana, Papakit ku keka ing maging bunga ning mua ning Dios. Tungkul ya ing vision king oras ning kawakasan.

²⁰ Ing ikit mung tupang lalaking ating aduang sagu lalarawan na la ding kayarian ning Media at Persia.

²¹ Lalarawan ne ning kambing ing kayarian ning Grecia, at ing kapansin-pansin a sagu pilatan da ring mata na ya ing mumunang ari.

²² Ding apat a sagu a linto inyang mepakli ya ing mumunang sagu lalarawan da la ring apat a kayarian a kaulian ning kayarian potang mapirake ya; oneng e na la kasing sikan ning mumunang kayarian.

²³ Potang malapit na ing kawakasan da ring kayarian at meging tutu na lang e mayap at sukat na lang miparusan, ating lunto metung a aring maki kesiasan buntuk; mabagsik ya at mapaglinlang.

²⁴ Maging mayupaya ya oneng e king kapamilatan na ning sarili nang kayupayan. Ya ing sangkan king katakut-takut a kasiran at maging matagumpe ya king heganaganang gagawan na. Ibagsak na ing kasiran karing mangayupayang lalaki at pati na karing mismung memalen na ning Dios.

²⁵ Uli na ning mautak ya, magtagumpe ya king mapaglinlang nang pamamaralan. Lawan nang maragul ing sarili na at lasakan na lang alang kapiadian ding tau. Salangsangan nia naman pati ing maragul diling Ari da ring sabla, oneng mapate ya agyang e magamit ing nanumang sikanan tau.

²⁶ Matupad ya ing vision tungkul karing ain neng bengi at ain neng abak a mipalino na kekayu. Oneng ilihim mu pa mu ngeni, uling maluat pa mung panaun bayu matupad iti.

²⁷ Tune kung melungkut at mesakit a lub kilub da ring mapilan a aldo. Kaybat mibangun ku at mibalik king obra a tituk na kanaku ning ari, oneng giluan na ku isip ning vision at e ke aintindian.