Daniel 2 - Ing Mayap a Balita Biblia

Ing Peninap nang Nebucadenesar

¹ Meninap ya ing Aring Nebucadenesar. Milyari iti king kadua nang banua ning pamag-ari na. Tutu yang meligalig angga king e ya mipapatudtud.

² Inya pepayaus na la ding mamamanula na, ding salamangkeru, ding enkantador, at ding Caldeo ban datang la at ipalino ra ing peninap na. Inyang dinatang la at tinalakad arap ning ari,

³ ngana karela, Maliligalig ku kaisipan tungkul king apaninap ku. Buri kung abalu ing kabaldugan na.

⁴ Pekibatan de ing ari king salitang Aramaico. Ngara, Makamal a Ari, mananu na sanang ing Kekayung Kamalan mie ya kapilan man. Sabian yu ing peninap yu at ibie mi ya kabaldugan kekayu.

⁵ Ngana ning ari karela, Inari ku na king lub ku king sukat yeng sabian kanaku ing paninap at kaybat ibie ye kabaldugan kanaku. Nung e yu agawa iti pamaklian da kayu bitis ampon gamat at paglasakan ku la ding bale yu.

⁶ Nung malyari yeng sabian at ibie kabaldugan, dinan da kayung regalu at maragul a dangalan. Ngeni, sabian ye kanaku nung nanu ya ing paninap at nung nanu ya kabaldugan.

⁷ Pasibayu reng pekibatan ing ari. Ngara, Nung sabian ya mu kekami, Makamal a Ari, ing apaninap yu, ibie mi ya kabaldugan kekayu.

⁸ Kaniting pekibat da, ing ari sinabi na, Ngaku na eh! Pakikuanan yu mung mika panaun kayu, uling apansinan yu king inari ku na king lub ku

⁹ king ibie ku kekayu ngan ing parusa, nung e ye sabian kanaku ing apaninap ku. Pikayari yu king isundu yu ing pamagsalitang kalaraman kanaku uling asahan yu king ibayu na la ning panaun ding dakal a bage. Sabian ye kanaku ing apaninap ku, at kanita abalu ku king malyari yu namang sabian ing kabaldugan na kanaku.

¹⁰ Pekibat ding Caldeo, Ala metung mang tau king yatu a malyaring sumabi kekayu king buri yung abalu. Ala pang ari, agyang pang ing pekamayupaya, a miniawad anti kanyan karing mamamanula, salamangkeru, at karing Caldeo.

¹¹ Tutu yang mabayat ing kayaduanan ning Kekayung Kamalan. Ala metung mang makagawa kaniti para kekayu subali mu ding dios, at e la manuknangan deti libutad da ring tau.

¹² King pekibat da, mibua ya mua ing ari at inutus na ing paten la ngan ding mangabiasa na ning kayarian ning Babilonia.

¹³ Inya miparala ya ing kautusan para paten la ngan pati na i Daniel at ding kakaluguran na.

Pepakit na ning Dios kang Daniel nung nanu ya Kabaldugan ing Paninap

¹⁴ Kanita pintalan neng Daniel i Ariok, ing kumander da ring guardia na ning ari a miyutusan ganap king pamakamate. Pekaingat nang migsalita at

¹⁵ kitang na kang Ariok nung nanu ing sangkan obat pepalual ne ning ari ing anti kanitang kabagsik a kautusan. Inya sinabi nang Arioc kang Daniel ing mepalyari.

¹⁶ Kanita mu rin agad yang meko i Daniel at mekapaniawad yang kapaintulutan king palasyu king mirinan ya pa sanang ditak pang panaun ban kanita malyari nang asabi king ari nung nanu ya kabaldugan ing apaninap na.

¹⁷ Kaybat na nita, minuli ya bale na i Daniel at belita na karing kakaluguran nang di Ananias, Misael, at Azaria nung nanu ing milyari.

¹⁸ Sinabi na karela king manalangin la king Dios ning banua ban maniawad saup tungkul king misteryu ning peninap ning ari ban e la mate at ding aliwa pang mangabiasa na ning Babilonia.

¹⁹ King bengi mu ring ita mipabalu ya ing misteryu kang Daniel king kapamilatan na ning metung a vision. At pinuri ne ing Dios ning banua. Ngana,

²⁰ Biasa ya ing Dios at mayupaya ya! Purian ya king kapilan pa man.

²¹ Atyu la king gamat na ding oras at ding panaun; ya ing tutuldu karing ari, at ya naman ing mikukuldas kareti. Ya ing babie kabiasnan at beluan.

²² Ya ing papabalu karing bage lihim ampon mangalalam; balu na itang makasalikut king karalumduman, at ya mismu makapadurut ya king sala.

²³ O Dios da ring kakung makatua, pupurian da ka at parangalan. Dininan mu kung kabiasnan at sikanan; pekibatan mu ing kakung panalangin, at pepakit mu kekami nung nanung sabian mi king ari.

Selita neng Daniel king Ari ing Paninap at Pepalino ne Iti

²⁴ Inya minta ya i Daniel kang Ariok, ing inutusan ning ari a makamate karing mangabiasa na ning Babilonia. Ngana, E mu la pa papaten ding mangabiasa na ning Babilonia. Ituki mu ku at sabian ke king ari ing kabaldugan na ning apaninap na.

²⁵ Agad-agad neng delang Ariok i Daniel king arapan ning Aring Nebucadenesar. Nganang migsalitang Ariok king ari, Atagpuan ke ing metung karing bihag tamung Judio a malyaring makaibie kamalinawan king kekayung apaninap.

²⁶ Nganang sinabi ning ari kang Daniel (a mayayaus munamang Beltesasar), Malyari meng sabian at ibie kabaldugan ing kanakung apaninap?

²⁷ Mekibat ya i Daniel, Makamal a Ari, alang biasa, salamangkeru, mamamanula o astrologo a malyaring makapagsalita kekayu tungkul kanyan.

²⁸ Oneng ating Dios king banua a pepabalu karing bage makalihim. Makamal a Ari, pepayabut na kekayu ning Dios ing mapalyari king panaun a daratang. Ngeni sabian ku ne kekayu ing apaninap yu, ing vision a ikit yu kabang matudtud kayu.

²⁹ Makamal a Ari, kabang matudtud kayu, apaninap yu ing bage tungkul king panaun a daratang at pepakit na kekayu ning Dios a papabalu karing bage makalihim: itang bage a mapalyari.

³⁰ Ngeni, mipabalu ya kanaku ing bage makalihim, e uling mas biasa ku karing aliwa, ban kanita malyari neng abalu ning Kekayung Kamalan ing kabaldugan ning kekayung apaninap, at aintindian yu la ding bage a dinatang king kaisipan yu.

³¹ Makamal a Ari, king kekayung paninap ikit yeng makatalakad arapan yu ing metung a maragul a estatua; masala ya ampon maningning at makatakut yang lalawan.

³² Megawa ya ing buntuk na king purung gintu; megawa ya king pilak ing salu na at ding gamat na, tangsu ya ing awakan na ampon ding balakang na,

³³ bakal la ding bitis na, at megawa la king bakal at pila ding talampakan na.

³⁴ Kabang lalawan ye, mibagsak ya ing maragul a tipak a batu agyamang alang tinagkil, at digpa ya karing bitis a bakal ampon pila ning estatua at mebalbal la.

³⁵ Kanita mu rin, misambulat ing bakal, ing pila, ing tangsu, ing pilak ampon ing gintu at meging anting alikabuk king pidadaran neng kaleldo. Pinaid na ngan ning angin at alang bakas a melakuan. Oneng meragul yang anting bunduk ing batu at tikpan ne ing mabilug a yatu.

³⁶ Iti ya ing kekayung apaninap, Makamal a Ari. Ngeni sabian ku naman kekayu ing kabaldugan na.

³⁷ Makamal a Ari, ikayu ing maragul dili karing heganaganang ari. Gewa na kayung ari ning Dios ning banua at dininan na kayung upaya, sikanan, at dangalan.

³⁸ Gewa na kayung talapanibala karing tau king yatu at karing animal ampon ayup. Ikayu itang buntuk a gintu.

³⁹ Kaybat yu ating lunto aliwang kayarian; e ne kasing dagul ning kekayu at kaybat na nita ing katlu, ing kayarian ning tangsu a sumakup king mabilug a yatu.

⁴⁰ At kaybat na nita, mika kapat a kayarian; kasing sikan ne ning bakal a manaspak at mamalbal king heganagana. At nung makananu yang mamirasung mangalati ing bakal, makanyan na lang pamirasuan mangalati ampon lasawan ding minunang kayarian.

⁴¹ Ikit yu naman king kapitna pila la at kapitna bakal la ding bitis ampon taliring bitis. Iti mangabaldugan king mapitna ya ing kayarian. Mika atin yang bage sikanan ning bakal, uling ating bakal a makasamut king pila.

⁴² Pawaga da ring taliring bitis a kapitna bakal at kapitna pila king atin yang dake masikan ing kayarian, at atin yang dake maina.

⁴³ Ikit yu naman king makasamut ya ing bakal king pila. Iti mangabaldugan king magkapilit la ding pamuntuk na ning kayarian a ita ing pisanmetungan da la ring karelang pamilya king kapamilatan ning pamiyayasawa ra, oneng e ra agawa iti antimo nung makananung e ya malyaring misamut ing bakal king pila.

⁴⁴ King kapanaunan da ring pamuntuk a reta, mitatag yang metung a kayarian a alang kapupusan ing Dios ning banua. E ya malyaring masambut iti, nune lubus na lang lasakan ding kayarian at kaybat na nita, manatili ya kapilan man.

⁴⁵ Ikit yu nung makananung ibat king matas menabu ya ing metung a batu a ala namang tinagkil, at nung makananu neng tiran ing estatuang megawa king bakal, tangsu, pila, pilak, at gintu. Ing maragul a Dios sasabian na kekayu, Makamal a Ari, ing mapalyari king daratang a panaun. Selita keng alang kulang at alang labis ing kekayung apaninap, at binie ku kekayu ing tune nang kabaldugan.

Dininan neng Regalu ning Ari i Daniel

⁴⁶ Kanita mu rin migsakab ya i Aring Nebucadenesar arapan nang Daniel. Kaybat, inutus na king dinan deng ain-a-pamangan at aliwa pang ain a katanggap-tanggap i Daniel.

⁴⁷ Ngana ning ari, Ing kekang Dios ya ing Dios da ring dios, ing Ginu da ring ginu, at ya ing babie kamalinawan karing makalihim a bage.

⁴⁸ Kanita dininan neng matas a katungkulan i Daniel at dininan neng dakal a makapagmulalang regalu; gewa neng talapanibala king probinsia ning Babilonia, at gewa neng pamuntuk da ring tagapayu ning palasyu.

⁴⁹ King kayaduanan nang Daniel king ari, di Sadrac, Mesac, at Abednego megawa lang talapanibala karing miyayaliwang katatagan ning probinsia ning Babilonia; oneng menatili ya i Daniel king palasyu ning ari.