Amos 4 - Ing Mayap a Balita Biblia

¹ Pakiramdaman yu iti, ikong babaing tau Samaria a tataba anti ding baka a pataban karin king Bashan. Ikayu ding manggipit karing maina at manabusu karing pakakalulu, at mamilit karing asawa yu king e ra kayu sa paburen kagigisanan alak!

² Anti na ning banal ya ing Ginung Dios, pengaku na ing anti kaniti: Datang la ding aldo a kaladkaran da kayu karing kalawit; mangari yang asan a metaga ing balang metung kekayu.

³ Ikaladkad da kayu king malapit diling busbus na ning pader at karin da kayu inabu.

Ing E na Pangabiasa ning Israel

⁴ Ngana ning Ginung Dios, Memalen ning Israel, sulung, munta kayu at gawang kasalanan king banal nang lugal ning Betel! Munta kayu naman karin Gilgal at gawa kayung kasalanan anggang binit yu. Sulung, magdala kayung animal a kekong iyain balang abak at idala yu la ding kekong sikapulu balang katlung aldo!

⁵ Sulung, iyain yu la ding kekong tinape ating lebadura bilang kekong ain-a-kapasalamatan king Dios at pagparangalan yu la ding aliwa yu pang ain! Uling iti ing bage a tutu yung kapad daraptan.

⁶ Aku ing peparatang danup karing sabla yung siudad, makanyan man e kayu migbalik lub kanaku.

⁷ E ku pepauran inyang kailangan da ring kekong tanaman ing uran. Pepauran ku king metung a siudad, oneng ali ku king aliwa. Miyuranan ya ing metung a marangle, oneng melangi ya ing aliwang marangle.

⁸ Uli na ning maina na la king kau, minta la ding dakal a tau da ring siudad king metung a siudad nung nu ra asahan ing manakit lang danum, oneng e mekagyu karela. Makanyan man e kayu migbalik lub kanaku.

⁹ Peparatang kung angin a mapali ban malanat ing kekong tanam. Gisan da lang pengan ding durun ding kekong mulahan at tamnanan ubas ampon ding kekong tanaman a higera at olibo. Makanyan man e kayu mu rin migbalik-a-lub kanaku.

¹⁰ Peparatang kung pesti kekayu antimo itang peparatang ku king Ehipto. Pete ku la ding kayanakan yung lalaki king labanan at kinua ku la ding kekong kabayu. Kitmuan ku la ding kekong arung king buluk da ring bangke libutad da ring kekong kampu. Makanyan man e kayu migbalik lub kanaku.

¹¹ Pete ku la ding mapilan kekayu antimo ing depat ku karing tau na ning Sodoma at Gomorra. Mengari la ding mitagan kekayu king milalablab a dutung a mesagip king silab. Makanyan man e kayu pa mu rin migbalik-a-lub kanaku, nganang sasabi ning Ginu.

¹² Uli na niti, O memalen ning Israel, parusan da kayu. Uli na ning daptan ku ing anti kaniti, magsadia kayung marap king atul ku!

¹³ Ing Dios ya ing linalang karing bunduk at king angin. Pabalu na karing tau ing isipan na; alilan ne ing aldo king bengi. Lalakad ya angga na karing wakas ning yatu. Iti ya ing lagyu na: Ginung Dios a Mayupaya!