2 Samuel 5 - Ing Mayap a Balita Biblia

Meging Ari ya i David king Israel at Juda

¹ Kanita pintalan de ring sablang tribu ning Israel i David karin king Hebron at ngara, David, laman mu kami at daya.

² Ika ing menimuna king Israel king sabla nang pamakilaban kanitang i Saul ya ing kekaming ari. Ngana keka ning Dios, David, ika ing magpastul king balen kung Israel at ika ing manimuna karela.

³ Inya pintalan de ring sablang manimuna ning Israel i Aring David king Hebron at king arapan ning Ginu ginawa ne mang kasunduan karela i David. Linian deng laru i David at ya ing meging ari ning mabilug a Israel.

⁴ Atlu yang pulung banua inyang maging ari ya, at mig-ari ya kilub ding apat apulung banua.

⁵ Pitu at kapitnang banua yang mig-ari king Juda kabang atyu ya king Hebron. Linipat ya king Jerusalem at karin ne pemahalan ing mabilug a Israel at ing Juda kilub ding atlung pulu't atlung banua.

⁶ Minta ya i Aring David at ding tauan na king Jerusalem ban lusuban da la ring Jebuseong manuknangan karin. Ngara ding Jebuseo kang David, E ka malyaring lungub keti; agyu ra kang itabi agyang deng mung bulag at pile. (

⁷ Makanyan man, ikua neng abihag David ing kuta ning Zion, at iti ya ing meging pikabaluan a Siudad nang David.)

⁸ King aldo mu ring ita, nganang David karing tauan na, Kailangan yang mukiat king pidadalanan ning danum ing ninumang bisang maniambut karing Jebuseo ban alusuban la ring bulag at pile a tutu kung kasaman. (Iti ing sangkan nung inya masasabi: E la milub king bale ning Ginu ding bulag at pile.)

⁹ Inyang mebihag ne ing kuta, karin ne menuknangan i David at inaus neng Siudad nang David. Telakad ne ing siudad king paligid na niti magumpisa ketang lugal a mitambakan king dane aslagan ning bunduk-bundukan.

¹⁰ Lalu yang meging mayupaya i David uling patnubayan ne ning Ginung Dios a Mayupaya.

¹¹ Pepadala yang tubud kang David ing Aring Hiram ning Tiro. Magdala lang trosung sedro, kalpinteru, at kanteru ban gawan de ing palasyu nang David.

¹² At kanita na akilalang David king tune neng telaga ning Ginu bilang ari ning mabilug a Israel at paragulan ne ing kayarian na alang-alang karing memalen na ning Dios.

¹³ Inyang meko ya king Hebron ban lumipat king Jerusalem, kinangwa ya pang babaing maging asawa na at kasese, at mikayanak yang dakal a lalaki at babai.

¹⁴ Oreti ding anak nang mibait king Jerusalem: Samua, Sobab, Natan, Solomon,

¹⁵ Ibar, Elisua, Nefeg, Jafia,

¹⁶ Elisama, Eliada, at i Elifelet.

Ing Tagumpe karing Filisteo

¹⁷ Inyang abalitan da ring Filisteo king i David ya ing mepiling ari ning mabilug a Israel, lege ra ing mabilug dang sikanan ba reng bihagan. Oneng abalitan nang David iti, inya meko ya ketang matas a lugal a ita at kinuldas yang minta king metung a matibe kuta.

¹⁸ Dinatang la ring Filisteo king Kapatagan ning Refaim at karin da kinalat king makapadurut ing sarili da.

¹⁹ Nganang mengutang David king Ginu, Lusuban ku la ring Filisteo? Papagtagumpen mu ku kaya karela? Nganang mekibat ning Ginu, Wa, lusuban mu la at papagtagumpen da ka karela.

²⁰ Inya minta ya i David king Baal Perazim at karin na la simbut ding Filisteo. Ngana, Keng panakit ku anti yang masikan a albug ing Ginu inyang liban na la ring kanakung kalaban. Iti ing sangkan nung inya meyaus yang Baal Perazim ing lugal a ita.

²¹ Alakuan da la ring idolo da ring Filisteo inyang tinakas la, at kinua na lang David at ding tauan na.

²² Kaybat na nita, mibalik la ring Filisteo king Kapatagan ning Refaim at sekupan deng pasibayu.

²³ Pasibayu neng kitnan David ing Ginu, at nganang mekibat ning Ginu, E yu la lulusuban keng lugal mung yan; nune lumigid kayu king kagulutan da at kanita yu la lusuban ketang lele da ring tanaman a balsamu.

²⁴ Potang damdaman yu na karing babo da ring tanaman a balsamu ing karelang pamagmartsa, kanita yu la biglang salakayan, uling kimut kung makauna kekayu ban sambutan la ring sundalus da ring Filisteo.

²⁵ Tiparan nang David itang inutus na ning Ginu, at ikua na lang lisuban manibat king Geba angga king Gezer.