2 Samuel 24 - Ing Mayap a Balita Biblia

Ing Sensus

¹ Pasibayung mikaluku ing mua ning Ginu king Israel, at ginamit ne i David ban parusan na la ring memalen na. Ngana, Bilangan mu la at ilista bilang ding memalen na ning Israel at Juda.

² Inya inutusan neng Aring David i Joab at ding aliwa pang opisyal da ring sundalus. Ngana karela, Puntalan yu la ding sablang tribu na ning Israel manibat king Dan angga Beerseba at gawa kayung sensus ban abalu ku ing bilang da ring memalen.

³ Nganang Joab, Mananu na sanang lalu na lang parakalan ning Ginung kekong Dios ding memalen at akit da sa ding mata yu iti. Obat buri yung mabilang la ring memalen?

⁴ Oneng ing buri ning ari ya ing mepalyari, inya memintu ya at ding kalupa nang opisyal ban bilangan la ding memalen na ning Israel.

⁵ Lipatan de ing Ilug ning Jordan at migkampu la king dane mauli ning Aroer, ing siudad a atyu libutad ning kapatagan king sakup ning Gad. Manibat karin minta la king dane norti papunta king Jazer.

⁶ Kaybat da karin, minta la king Gilead at king Kades, ing gabun da ring Hiteo. Manibat karin minta la king Dan at kaybat minta la king albugan papunta Sidon.

⁷ Kaybat na nita, minta la king makakutang siudad ning Tiro dane mauli, at tinaglus la karing siudad da ring Heveo at Cananeo. Ing katataulian a lugal a pintalan da ya ing Beerseba, king dane mauli ning Juda.

⁸ Libutan de ing mabilug a bansa kilub ding siam a bulan at aduang pulung aldo, at kaybat mibalik na la king Jerusalem.

⁹ Minie yang ulat i Joab kang Aring David tungkul king bilang da ring memalen a mitala. Walu lang dalan a libu ding sundalus king Israel at makasadia lang makilaban; lima no mang dalan a libu ding king Juda.

¹⁰ Oneng meligalig ya i David kaybat neng abalu ing sensus da ring memalen. Nganang David king Ginu, Maragul ing depat kung kasalanan uli na ning merapat a pamagsensus. O Ginu, patawaran mu ku sana king depat kung kamangmangan.

¹¹ Inyang migising ne itang kabukasan, dinatang kang David ing mensahi na ning Ginu king kapamilatan na ning propetang i Gad, ing propeta nang David. Ngana kang David,

¹² Puntalan me i David at sabian mu ing anti kaniti: Atlung bage ing yapag ku keka. Mamili kang metung mu kareti at iti marapat keka.

¹³ Pintalan neng Gad i David at sinabi na itang pasabi na ning Ginu. Nganang mengutang, Danup king bansa kilub ding atlung banua o atlung bulan kang salasalikut karing kekang kalaban o atlung aldo salut king bansa mu? Pakaisipan yu iting bage nung isanu ing ibie kung pakibat king Ginung mitubud kanaku.

¹⁴ Nganang David, E ku balu ing daptan ku. Anti na ning malunusan ya ing Ginu, ya na ing balang mamarusa kekatamu kesa king ding memalen ilang mamarusa kanaku.

¹⁵ Inya peparala yang salut a makamate karing tau king mabilug a Israel a megumpisa king aldong ita angga ketang aldo a mitakda. Pitung pulung libu la ring taung mete.

¹⁶ Migbayu ya isip ing Ginu inyang malapit na na lang pamuksan a bie ning anghel ding memalen na ning Jerusalem. Ngana king anghel, Tuknang na ka. E mu na tataglus pa! Atyu kanita ing anghel king pidadaran nang Arauna a Jebuseo.

¹⁷ Nganang David king Ginu inyang ikit na lang pamaten na la ning anghel ding memalen, Aku ing mikasala. Tune e mayap ing depat ku. Ala lang kasalanan deting tau. Aku at ing pamilya ku ing parusan yu.

¹⁸ At king aldong ita pintalan neng Gad i David at sinabi na, David, munta ka king pidadaran nang Arauna at gawa kang altar para king Ginu.

¹⁹ Inya memintu ya i David king utus ning Ginu at minta ya kang Arauna, antimo ing sinabi nang Gad.

²⁰ Inyang matyo ya i Arauna ikit neng palapit i Aring David at ding opisyal na. Seganan na la at pekaduku na king ari bilang pamamie galang.

²¹ Nganang mengutang Arauna, Makamal a Ari, ba't mipasyal kayu keti? Pekibat nang David, Mipasyal ku keti ban saliwan ke ing lugal ning pidadaran mu ban pitalakaran keng altar para king Ginu. Kanita tuknang na ing makamate salut karing tau.

²² Nganang Arauna kang Aring David, Kuanan yu pu ing buri yu at iyain king Ginu itang isipan yung karapatdapat. Oren pu deng baka at dutung a gagamitan kung pamandara ampon ding paud a malyari yung gamitan panangab.

²³ Babie ku ngan pu yan kekayu, Makamal a Ari. Mananu na sanang tanggapan na ning Ginung kekayung Dios ing kekayung ain.

²⁴ Nganang Aring David, Bayaran ku ngan yan, Arauna. E ku mamain ain-a-durulukan king Ginung kanakung Dios a e ku ginastus. Inya beyaran neng David ing lugal a pidadaran at ding baka king alagang limang pulung pirasung pilak.

²⁵ Kaybat na nita, pepagawa yang altar para king Ginu, at karin na la inain ding ain-a-durulukan ampon ding ain-pamisulusulu. Inya pekiramdaman na ning Ginu ing panalangin na at mewala ing salut a makamate karing memalen na ning Israel.