2 Samuel 23 - Ing Mayap a Balita Biblia

Ding Katataulian a Amanu nang David

¹ Anak neng Jese i David, ing lalaking gewa nang marangal ning Dios, ing lalaking pinili na ning Dios nang Jacob ban maging ari. I David munaman ing sinulat karing mangalagung kanta para king Israel. Ila deti ring katataulian nang amanu:

² Magsalita ya ing espiritu ning Ginu king kapamilatan ku; atyu ya king dila ku ing amanu na.

³ Migsalita ya ing Dios ning Israel; ngana kaku ning mimingat king Israel, Ing ari a mamahalang alang pamangabiran, at ating takut king Dios,

⁴ kawangis ne ing sala ning munag sumala, kalupa ne ing aldo saslag neng panaun a alang ulap, anti ya king uran a patubu karing tanaman.

⁵ Makanyan neng bendisyunan ning Dios ing kakung pamilya, uling kaku ginawa yang kasunduan at iti manatili ya, inayus na ing heganagana at ing sabla pekatibe na. Ita ya ing kakung kapagnasan; kakung tagumpe king Dios manibatan.

⁶ Oneng ding taung alang dios anti lang suksuk a iyugse na kabud; e mo atalan king kekang gamat.

⁷ Ban keka lang atalan kailangan ing gumamit kang kasangkapan a bakal o sundang, kanita keka na lang silaban.

Ding Pikabaluan a Sundalus nang David

⁸ Oreti ding lagyu da ring pikabaluan a sundalus nang David: ing mumuna ya i Joseb Bassebet a tau Takemon; ya ing manimuna da ring Atlu. Misan, mekilaban ya karing walung dalan a kalaban, at apate no ngan kanita mu rin king kapamilatan na mu ning metung a tandus.

⁹ Ing kadua ya i Eleazar, ing anak nang Dodo at apu nang Ahohi. Ya ing kayabe nang David inyang inamunan na la ring Filisteong makasadia nang makilaban. Minatras la ring Israelita,

¹⁰ oneng ya ali ya at lebanan na la ring Filisteo angga king mepata ya ing gamat na, at e na ne abili ing espada na. King aldong ita ikua ning Ginu ing maragul a tagumpe. Mibalik la kanita ding Israelita nung nu ya karin i Eleazar at kinua ra ing nanumang akua ra karing kalaban a apate na.

¹¹ Ing katlu ya i Samma, ing anak nang Agee a tau Harar. Mitipun-tipun la kanita king Lehi ding Filisteo nung nukarin ating marangle a mitmung tanam a bule. Tinakas la ring Israelita karing Filisteo,

¹² oneng i Samma ali ya. Lebanan na la karin king libutad ning marangle, at apate na la ding Filisteo. King aldong ita ikua ning Ginu ing maragul a tagumpe.

¹³ Panaun na kanita ning pamamupul, ding atlu karing Atlung Pulu minta la kang David a atyu kanita king kueba ning Adulam. Makatipun ne man kanita ing tropa da ring Filisteo king Kapatagan ning Refaim.

¹⁴ Atyu ya kanita i David king kutang matibe kabang atyu no man makakampu king Betlehem ding Filisteo.

¹⁵ Uli na ning kasabikan nang makauli keta karela asabi nang David ing anti kaniti: Sana makainum ku king danum a ibat king talaga a atyu lele ning pasbul dalan ning Betlehem!

¹⁶ Inya ginawa lang paralan ding atlung matapang a lalaki ban alusutan da la ring Filisteong kalaban, at menikua lang danum ketang talaga a atyu lele ning pasbul dalan ning Betlehem. Binie ra iti kang David, oneng e na ininum, nune bilus na iti king gabun bilang ain king Ginu.

¹⁷ Nganang David, O Ginu, e ku ainum iti, uling nung inuman ku anti ku nang ininum ing daya da reting lalaki a teya ra ing bie ra! Inya e na ininum. Makanyan mekilala ing depat dang katapatan ding atlung matapang a sundalus nang David.

¹⁸ Ing tutuki ya i Abisai a kapatad neng Joab at i ima ra ya i Zeruia. Ya ing manimuna da ring Ding Atlung Pulung Pikabaluan a Sundalus. Lebanan na la ring atlung dalan a kalaban at apate na la king kapamilatan na mu ning tandus na. Meging pikabaluan ya karing Atlung Pulu a panimunan na.

¹⁹ Ya ing pikabaluan dili karing Atlung Pulu at ya ing meging manimuna ra. Mu pin e ya maygit pikabaluan karing Atlu.

²⁰ Pikabaluan ya namang sundalus i Benaia, ing anak nang Jeoiada ning Kabzeel. Dakal ya depat a katapangan. Ya ing mekapate karing aduang matapang nang sundalus ning Moab. Misan a aldo mumuran yelu, dinulung ya king metung a kulkul at pete ne ing leon.

²¹ Ya naman ing mekapate king metung a lalaking maragul a tau Ehipto. Makasandata yang tandus iting tau Ehipto, at lisuban neng Benaia agyang palupalu ya mu ing tatalnan na. Asamsam ne ing tatalnan nang tandus ning taung maragul, at ya ing ginamit nang Benaia king pamakamate keting tau.

²² Ila deti ring depat nang katapangan Benaia, ing metung karing pikabaluan a Atlung Pulu.

²³ Maygit ya karela ngan, mu pin e ya maygit pikabaluan karing Atlu. Ya ing gewa nang David a mamahala karing sundalung guguardia king ari.

²⁴ Ding aliwang kayabe king grupu da ring Atlung pulu ila reti: i Asael a kapatad nang Joab; i Elhanan a anak nang Dodo ning Betlehem;

²⁵ i Samma at i Elika a parehung tau Harod;

²⁶ i Helez, ing tau Pelet; i Ira, ing anak nang Ikes ning Tekoa;

²⁷ i Abiezer, ing tau Anatot; i Mebunai, ing tau Husa;

²⁸ i Zalmon, ing tau Aho; i Maharai, ing tau Netofa;

²⁹ i Heleb, ing anak nang Baana ning Netofa; i Ittai, ing anak nang Ribai ning Gibea ning Benjamin;

³⁰ i Benaia, ing tau Piraton; i Hidai, ing taung ibat karing kapatagan lele ning Gaas;

³¹ i Abialbon, ing tau Araba; i Azmavet, ing tau Bahurim;

³² i Eliaba, ing tau Saalbon; ding anak nang lalaking Jasen; i Jonatan;

³³ i Samma, ing tau Harar; i Ahiam, ing anak nang Sarar ning Harar;

³⁴ i Elifelet, ing anak nang Ahasbai ning Maaca; i Eliam, ing anak nang Ahitofel ning Gilo;

³⁵ i Hezro, ing tau Carmel; i Paarai, ing tau Arabia;

³⁶ i Igal, ing anak nang Natan ning Zoba; i Bani, ing tau Gad;

³⁷ i Selek, ing tau Ammon; i Naharai, ing talapagdala king baluti nang Joab a anak nang Zeruia; tau ya Beerot;

³⁸ i Ira at i Gareb, ding tau Jatir;

³⁹ at i Uria, ing Hiteo. Atlu lang pulu't pitu heganagana ing bilang da.