2 Samuel 19 - Ing Mayap a Balita Biblia

Pengamanuan neng Joab i David

¹ Ngana ning balitang miras kang Joab: Manangis ya at migpaldas i Aring David uling mete ya i Absalom.

² Inya ing tagumpe king aldong ita meging aldo ne ning kalungkutan, uling abalitan da ring tau king tune nang kelungkut ning ari ing pangamate nang Absalom a anak na.

³ Inya pasalikut lang minuli at linub ding sundalus king siudad. Marine lang mayakit uling balamu mo mesambut la king pamakilaban.

⁴ Tikpan ne ning ari ing lupa na at nganang menangis, O ing anak kong i Absalom! O Absalom, ing anak ko!

⁵ Pintalan neng Joab ing ari king bale na at ngana, Makamal a Ari, pemakarine yu la ngening aldong iti ding sabla yung tauan a migligtas kekayu at karing anak yung lalaki ampon babai, at migligtas munaman karing asawa yu at karing babaing kasese yu,

⁶ uling itang masama kekayu ya ing kaluguran yu at detang malugud kekayu ilang kasaman yu. Pepakit yu ngeni kekami king ikaming opisyal at talasuyu yu, ala keng kabaldugan kekayu. Ing akakit ku ngeni kekayu ya ing tumula kayu nung akit yeng mabie i Absalom at mete na ke man.

⁷ Lumual na kayu, Makamal a Ari, at pasiknangan yu la lub ding tauan tamu. Oyni daramdaman na ku ning Ginu, nung e yu daptan yan ngeni mu ring bengi ala nang manatili kekayu. Ing maging e mayap diling dugpa king bie yu ya ing lakuan da kayu kesa karing mabayat a problemang delanan yu inyang kayanakan kayu at angga na ngeni.

⁸ Inya tinalakad ya ing ari at linukluk lele ning pasbul dalan ning siudad. Lepitan de ring tauan na inyang abalitan dang atyu ya karin. Samantala, tinakas la at minuli ing metung at metung karing Israelita.

Mibalik ya Jerusalem i David

⁹ At mika pamipate karing sablang tribu ning Israel. Ngara, Linigtas na katamung Aring David karing gamat da ring kalaban tamu; ya munaman ing migligtas kekatamu karing gamat da ring Filisteo. Oneng ngeni, likuan ne ing bansa tamu uling tekasan ne i Absalom.

¹⁰ Oneng i Absalom, ing gewa tamung ari, mete ya king labanan. Ngeni, obat e tamu pikayarian ing papagbalikan ta ya i Aring David?

¹¹ Ing pisasabian a iti mikalat king mabilug a Israel at abalitan na namang David. Inya tinubud na la ring paring di Zadok at Abiatar ban ikutang karing manimuna ning Juda ing anti kaniti: Obat ikayu ing tauling diling mignasang ibalik ya ing ari king palasyu?

¹² Kamaganak da kayu, laman da kayu at daya; obat ikayu ing tauling diling mignasang ibalik yu ku?

¹³ Sinabi na namang David karing tubud king sabian da kang Amasa ing anti kaniti: Kamaganak da ka naman, Amasa. Manibat ngeni ika na ing pekapun da ring sablang sundalus at aliwa na i Joab. Paten na ku ning Dios, nung e tutu yan.

¹⁴ Ikua na la ngan pilubluban David ding sablang lalaki na ning Juda, at pepayabut da kang David ing anti kaniti: Mibalik na ka at ding sabla mung opisyal.

¹⁵ Inya mibalik ya i David. Inyang miras ne king Ilug ning Jordan seganan de ring lalaki na ning Juda a dinatang king Gilgal ban antabayanan de lipat ning ilug.

¹⁶ King oras mu ring ita memalagua yang minta king Jordan i Simei, ing Benjaminitang anak nang Gera ning Bahurim, ban sagana munaman kang Aring David;

¹⁷ kayabe na la ring metung a libung lalaki na ning tribu nang Benjamin. Dinatang ya naman i Ziba, ing ipus na ning pamilya nang Saul; kayabe na la ring labing limang anak nang lalaki at aduang pulung ipus. Atyu na la king Jordan bayu ya miras karin ing ari.

¹⁸ Lipatan de ing ilug ban antabayanan de ing ari at ding kayabe na, at tupad king nanumang iyutus na karela ning ari. Inyang malapit neng lumipat king ilug ing ari, migsakab ya arapan na i Simei a anak nang Gera

Pepakit yang Ganaka i David kang Simei

¹⁹ at nganang sinabi king ari, Makamal a Ari, kalinguan yu na pu sana ing e ustung gewa ku kekayu kanitang mamako kayu king Jerusalem. Ilako yu na pu sana king lub yu ing milyaring ita at e yu na bibilang pang kasalanan ku.

²⁰ Tatanggapan ku pu ing mikasala ku kekayu. Inya naman pu pekikuanan ku ing aku ing munang dili karing lahi nang Jose ban sagana kekayu.

²¹ Nganang Abisai a anak nang Zeruia, E ya wari sukat mate i Simei uling penagkasan ne ing linian na ning Ginu?

²² Pekibat nang David, Ikayung anak nang Zeruia, nanung matulid yu kaniting pisasabian? Ba't balu yu pa kanaku? Aku ing ari na ning Israel at alang sukat mate a Israelita king aldong iti.

²³ Kaybat ngana kang Simei, Pangaku ku keka king e ka mate.

Pepakit yang Ganaka i David kang Mefiboset

²⁴ Sinagana ya naman kang Aring David i Mefiboset a apu nang Saul. Manibat na inyang meko ya ing ari angga na ngening mekapagbalik yang ligtas, e ya menos bitis o memalbas o menaliling piblas i Mefiboset.

²⁵ Inyang meko ya Jerusalem ban sagana king ari, kitnan ne. Nganang mengutang ning ari, Mefiboset, obat e ka tinuki kanaku?

²⁶ Nganang mekibat, Makamal a Ari, e makalingad ing pile ku. Pekisabian ke pu ing ipus ku ban isadia ne ing asnong saken ku ban atukian da kayu, oneng lininlang na ku.

²⁷ Sinira na ku pa pangatau kekayu. Mengari kayu king anghel ning Dios, inya ikayu pung bala king buri yung daptan kanaku.

²⁸ Karapatdapat ing paten la arapan yu ding miembru ning pamilya nang tata ku, makanyan man dininan yu kung oportunidad a maging kasulu yu king kekayung lamesa. Inya ala na ku pung matulid manigapu kekayu.

²⁹ Ngana ning ari, E na kailangan ing magsalita ka pa. Inari ku na king lub ku king pipitnan yu ikong aduang Ziba ing gabun nang Saul a ingkung mu.

³⁰ Nganang Mefiboset, Ibie yu na ngan pu kang Ziba. Makagyu na pu kanaku ing mekapagbalik kayung alang kasasagkulan.

Pepakit yang Ganaka i David kang Barzilai

³¹ Meko ya naman king Rogelim i Barzilai a tau Gilead ban saganan ne ing ari at antabayanan king pamandalakit na king Jordan.

³² Matua ne i Barzilai; walung pulung banua ne at dakal ya pibandian. Ya ing minie king sablang kailangan na ning ari inyang atyu ya Mahanaim.

³³ Ngana ning ari, Barzilai, tuki na ka kanaku king Jerusalem at e ra ka paburen karin.

³⁴ Nganang Barzilai, Matua na ku pu, Makamal a Ari, e na kailangan ing manuknangan ku Jerusalem.

³⁵ Walung pulung banua na ku; balu ku pa kaya ing mayap at ing e mayap? Apilasan ku pa kaya ing kakung kakanan ampon inuman? Damdaman ku pa kaya ing kanta da ring lalaki at babai? Maging pangabala ku mu pu kekayu, Makamal a Ari.

³⁶ Iyatad da na kayu mu pu angga king Jordan. E na kailangan ing ablasan yu ku pa.

³⁷ Paburen yu na ku mung muli ku keta kekami at karin na ku mate at mikutkut lele da ring kutkutan da ring pengari ku. Oyni pu ing anak kung i Kimham, ya pu ing sumuyu kekayu. Ya pu ing ituki yu, Makamal a Ari, at ikayu nang bala kang Kimham.

³⁸ Ngana ning ari, Nung makanyan, i Kimham ya ing ituki ku. E me pigaganakan, e ke paburen. Ibie ku ing nanumang aduan mu.

³⁹ Kanita dinalakit la king Jordan ding sabla at antimu rin ing ari. Kinaul ne i Barzilai at kaybat binendisyunan ne. At minuli ne keta karela i Barzilai.

Ing E na Pamikakaintindi ning Juda at ning Israel tungkul king Ari

⁴⁰ Dinalakit ya king Ilug ning Jordan ing ari at i Kimham. Kayabe na la namang dinalakit ding sundalus na ning Juda at ding kapitna karing sundalus na ning Israel. Tinaglus la king Gilgal.

⁴¹ Kaybat na nita, lepitan de ring sablang Israelita ing ari at ngara, Makamal a Ari, obat inunan da kami ring kamaganak ming taga Juda king pamanantabe king pamandalakit kekayu, karing tauan yu, at king pamilya yu king ilug?

⁴² Pekibat da ring tau Juda, Depat mi ita uling malapit kaming kamaganak ning ari. Ba't ikakamua yu ita? E na na ke man pakanan o upahan ning ari.

⁴³ Sinabi ra ding Israelita karing tau Juda, Maygit apulung besis ing karapatan mi king ari kesa kekayu. Obat maninsultu kayu ngeni kekami? Aliwa wari ikami ing minunang ginawang lakbang ban mibalik ya ing kekaming ari? Oneng maygit lang mataram magsalita ding tau Juda kesa karing tau Israel.