2 Samuel 16 - Ing Mayap a Balita Biblia

Sinaupan neng Ziba i David

¹ Mekakuldas neng ditak kanita king bunduk i David inyang akatagpu ne i Ziba, ing ipus nang Mefiboset. I Ziba atin yang tatairan aduang asno a maki aduang dalan a tinape, dinalan a kapunggul a pasas, dinalan a kapunggul a prutas, at metung a balat a lulanan mitmung alak.

² Nganang kinutang David, Obat dela mu keti yan? Nganang mekibat Ziba, Babie ku la pu king pamilya yu deting aduang asno; deni namang pung tinape at prutas para karing tauan yu la, at iting alak para king kenu ya mang kumau king paglakad na king ilang.

³ Kitang ning ari, Nu ya karin i Mefiboset, ing apu ning panginuan mung i Saul? Pekibat nang Ziba, Atyu ya pu Jerusalem, uling ngana pu kanaku: Ngening aldong iti ne ibalik kanaku ning Israel ing kayarian nang ingkung ku.

⁴ Kanita ngana ning ari, Ziba, manibat ngeni keka na ing sablang pibandian nang Mefiboset. Nganang Ziba, Atyu ku pu lalam yung upaya. Mananu na sanang maging karapatdapat ku king kekayung panimanman, O Makamal a Ari.

I David at i Simei

⁵ Inyang miras ya king Bahurim i David, ating metung a lalaking sinalubung at panagkasan ne; ing lagyu na Simei a anak nang Gera at kamaganak neng Saul.

⁶ Besibas ne i David at ding kayabe nang opisyal at tauan a makapadurut king ari.

⁷ Nganang kukulisak, Mabating ka! Mabating ka keti! Metung kang kriminal at taung alang kabaldugan.

⁸ Minablas ya ngeni keka ing Ginu uli na ning pangamate nang Saul at ing pamilya na at pamaniamsam mu king tronu na. Binie ne ngeni ning Ginu ing kayarian kang Absalom a anak mu. Miras mu rin ing kayangganan mu, uling makamate kang kalupang tau!

⁹ Nganang Abisai a anak nang Zeruia, Makamal a Ari, obat paintulutan ye iting asung mete a panagkasan na kayu? Paintulutan yu ku pung puntalan ke at tabtaban a batal.

¹⁰ Ngana ning ari, E me pakialaman. Ala katang parehung matulid nung inutus ning Ginu kang Simei ing panagkasan na ku.

¹¹ Kanita sinabi na pang David kang Abisai at karing sablang kayabe na, Lawan yu, buri na kung paten ning sarili kung anak, e kasi lalu na iting i Simei a Benjaminita. Inya paburen yeng managkas nang managkas, uling inutusan ne ning Ginu.

¹² Pota malunus ya ing Ginu kaniting daralanan kung kasakitan at bendisyunan na ku king kapamilatan ning depat nang Simei.

¹³ Inya tiglus nang David at ding kayabe na ing paglakad da kabang i Simei naman tatagal ya king sumangid ning burul; managkas yang alang patugut at mamasibas batu at dinat karela.

¹⁴ Mapagal yang mapagal ing ari at ding kayabe nang tauan inyang miras la king pupuntalan da. At migpaynawa la karin.

Ing Paglub nang Absalom king Jerusalem

¹⁵ Dinatang ya Jerusalem i Absalom; kayabe ne i Ahitofel at ding sablang kelalakinan na ning Israel.

¹⁶ Kinulisak ya i Husai, ing Arkiteong kakaluguran nang David, inyang akatagpu ne i Absalom. Ngana, Luid ya ing ari! Luid ya ing ari!

¹⁷ At ngana namang Absalom kang Husai, Iti ya ing kapasiagan mung katapatan king kakaluguran mo? Obat e ka mekiabe king kakaluguran mung ari?

¹⁸ Pekibat nang Husai, Ing bukud ku mung pakiabayan ya ing pinili ning Ginu, ning balen a iti, at ding kelalakinan na ning Israel.

¹⁹ Ninu ing suyuan ku? Agyang makananu ing anak ning panginuan ku. Nung makananu keng siyuan i tata mu, makanyan da ka namang suyuan.

²⁰ Kanita nganang Absalom kang Ahitofel, Magsalita na ka man. Nanu ngeni ing aturu mung daptan ta?

²¹ Pekibat nang Ahitofel, Puntalan mu la ring babaing kasese nang tata mung likuan na ban mag-asikasu king palasyu, at sipingnan mu la. Mibalita kanita king mabilug a Israel king tune na kang kalaban tata mu, at sikan la lub ding talatuki mu.

²² Inya mitalakad lang tolda king babo ning palasyu ban akit na ning mabilug a Israel ing pamanyiping nang Absalom karing babaing kasese nang David a tata na.

²³ King panaun a ita, mituturing a payu na ning Dios ing payu a babie nang Ahitofel. Tinggap nang David iti at antimu rin i Absalom.