2 Samuel 13 - Ing Mayap a Balita Biblia

I Amnon at i Tamar

¹ Atin yang kapatad a dalaga i Absalom a anak nang David. Malagu ya at ing lagyu na Tamar. Milsinta ya kang Tamar i Amnon, ing aliwa na pang anak a lalaking David king aliwang babai.

² Mesakit ya uling milalu ing sinta na kang Tamar a kasing-ibpa na; birhen ya inya e ne malyaring alapitan. E na balu ing gawan na.

³ Atin yang kakaluguran a mautak i Amnon; i Jonadab. Pisan ne i Jonadab uling anak neng Simea a kapatad nang David.

⁴ Nganang Jonadab kang Amnon, O pisan kung prinsipi, apansinan ku king aldo-aldo malungkut ka. Nanu ing sangkan? Pekibat na, Malsinta ku kang Tamar a kapatad nang Absalom at kasing-ibpa ku.

⁵ Nganang Jonadab, Magkunwari kang masakit at magkera. At potang dalawan na kang tata mu ipakisabi mung mayap king i Tamar a kapatad mu ya ing buri mung akit maglutu at munie pamangan keka.

⁶ Inya migkunwari yang masakit i Amnon at migkera ya. Dinatang ya i David ba neng dalawan at nganang Amnon, Sabian yu sana kang Tamar a kapatad ku king ya na ing magbante at maglutu at munie pamangan kanaku.

⁷ Inya pepayaus ne king palasyu i Tamar at ngana, Tamar, puntalan me king bale na i Amnon a kapatad mu at paglutu meng pamangan na.

⁸ Inya minta ya i Tamar king bale na ning kapatad nang i Amnon; disan neng makakera. Kinangwa yang arina i Tamar at ginawa yang masa, at king akakit nang Amnon miglutu yang tinape.

⁹ Inyang lutu na la binili na la king pinggan at dela na la kang Amnon ba neng mangan. Oneng e ya bisang mangan. Sinabi na, Palakuan mu la ding sablang atyu keti. Inya meko la ding sabla.

¹⁰ Kaybat nganang Amnon kang Tamar, Idala mu la kening pagkeran ku ding tinape at subuanan mu ku. Kinua na lang Tamar ding tinape linutu na at dela na la king pagkeran nang Amnon.

¹¹ Inyang subuanan na neng Tamar, kinaul ne at ngana, Magkera ka siping ku, kapatad ko!

¹² Nganang Tamar, E ku bisa, kapatad ko. E mu ku sana pipilitan. E sukat marapat ing bage makanyan king Israel. E ustu yan!

¹³ Nanung lupa ku pang makiarap karing tau nung paintulutan da ka? Lumual kang makarine king mabilug a Israel. Pakisabian me ing ari at paniwalan ku king paintulut na ing maging asawa mu ku.

¹⁴ Oneng e ne pekiramdaman Amnon at uling mas masikan ya pinuersa ne at ikua na ing buri na kang Tamar.

¹⁵ Kaybat nang arapat Amnon ita, mimua yang e mu nanu kang Tamar. Mas matindi ing mua na kesa king pamalsinta na kang Tamar. Ngana, Mabating na ka!

¹⁶ Nganang Tamar, E ku bisa! Lalung e ustu ing pamanabi mu kanaku kesa king depat mu kanaku. Oneng e ne pekiramdaman Amnon;

¹⁷ inaus ne ing talasuyu nang ipus at sinabi na, Ilual me ing babaing yan at ikabat me ing pasbul. E ke buring akakit!

¹⁸ Linual ne ning ipus at kebat ne ing pasbul. Maka-imalan ya kanitang bata a ating makabang takde i Tamar; makanyan la susulud kanitang panaun a ita ding prinsesang e talasawa.

¹⁹ Mibili yang abu king buntuk na at ginabak ne ing susulud nang imalan at tikpan ne ing lupa na karing gamat na at kikiak yang masikan kabang lalakad ya.

²⁰ Kitnan neng Absalom inyang ikit ne. Ngana, Sipingnan na ka waring Amnon a kasing-ibpa mo? E na ka sana mag-iskandalu uling kasing-ibpa me. E mu na pakadibdiban yan. At king bale nang Absalom ne menuknangan i Tamar; magdili-dili ya at malungkut.

²¹ Mikasbu ya i Aring David inyang abalitan na ing milyari.

²² Ala yang binggitan nanuman i Absalom kang Amnon, oneng pikasaman ne uli na ning depat nang kalapastanganan kang Tamar a kapatad na.

Minablas ya i Absalom

²³ Kalabas da ring aduang banua, inagkat na lang Absalom ding sablang anak nang lalaki ning ari. King panaun a ita atyu la king Baal Hazor ding tupa nang Absalom at paurud na la ding tupa na. Malapit ya ing lugal a ita king balen ning Efraim at karin la mikit-ikit ding kumbiradu.

²⁴ Pintalan neng Absalom i Aring David at ngana, Makamal a Ari, paurud ku la pu karing tauan ku ding kanakung tupa. Malyari kayu pung tuki at ding opisyal yu king katatagan karin?

²⁵ Pekibat ning ari, E ku malyari, anak. Maragul a pangabala keka nung tumagun ke ngan. Pemilit neng Absalom, makanyan man e ya mu rin mebisa ing ari, oneng binendisyunan ne i Absalom.

²⁶ Nganang Absalom, Nung e kayu talagang malyari, ing kapatad kung i Amnon na mu pu ing patagunan yu. Ngana ning ari, Obat patagunan me?

²⁷ King kapipilit nang Absalom pepatukian ne i Amnon at ding aliwa pang anak nang lalaki ning ari. Migtau yang maragul i Absalom a karapatdapat king ari.

²⁸ At nganang minie panabilin Absalom karing ipus na, Banten ye i Amnon at potang malasing ne at binie ku ne ing senias, paten ye. E ko sukat mitatakutan; aku ing ating pakibatan king kamatayan na. E yu painan ing lub yu; magpakatatag kayu.

²⁹ Memintu la ring ipus king utus nang Absalom, at pete re i Amnon. Inya tinalakad la ring aliwang anak nang lalaking David; seken da la ring karelang mula at tinakas la.

³⁰ Kabang atyu la pa king dalan miras na kang David ing balita tungkul king milyari. Ngana ning mibalita: Pete no ngang Absalom ding sablang anak nang lalaking David; alang mitagan.

³¹ Tinalakad ya ing ari; ginabak na ing imalan na uli na ning sakit nang lub at migkasat ya king gabun. Ginabak da naman ing imalan da ring talasuyu nang atyu karin a pakatalakad.

³² Nganang Jonadab a pangunakan nang David, Makamal a Ari, e ro ngan pu pete ding anak yung lalaki; i Amnon mu pu ing pete ra. Misimpan yang mua i Absalom manibat na kanitang sinira ne puring Amnon ing kapatad nang i Tamar.

³³ Inya e yu pu isipan ing pete da la ngan ding anak yu; i Amnon mu pu ing pete ra.

³⁴ Samantala, tinakas ne man i Absalom.

³⁵ Kanita ing metung a mag-guardiang sundalus menakit yang dakal a taung daratang ibat king dalan ning Horonaim; kukuldas la king bunduk-bundukan. Linapit ya king ari iting guardia at belita na ing ikit na. Nganang migsalitang Jonadab kang Aring David, Antimo ing asabi ku na kekayu, ding anak yu pung lalaki ila ring daratang.

³⁶ Kayari nang migsalita, dinatang la ring anak nang lalaki ning ari; manangis la. Menangis ya naman ing ari at ding opisyal na.

^37-38 Tinakas ya i Absalom at minta ya kang Talmai, ing ari ning Gesur a anak nang Amiud, at menatili ya karin kilub ding atlung banua. Maluat nia mu ring penangisan David ing pangamate nang Amnon.

³⁹ Akabiusan nang David ing pamagmalun na kang Amnon, at sabik ne ngening buring akit i Absalom.