2 Cronica 8 - Ing Mayap a Balita Biblia

Ing Obrang Ayari nang Solomon

¹ Aduang pulung banua ing megugul bayu ne apayaring Solomon ing Templo ning Ginu at ing palasyu ning ari.

² Pepalarin na la namang pasibayu ding siudad a binie nang Aring Huram, at mitubud yang Israelita ban karin na manuknangan.

³ Kaybat na nita, lisuban ne at sekupan Solomon ing Hamat at ing Zoba

⁴ at pepalarin ne ing Palmyra a atyu king disyerto, at ding sablang siudad ning Hamat a pipagponduan king nanumang kailangan.

⁵ Pepalarin na la namang pasibayung Solomon deting siudad: Bet Horon Babo at ing Bet Horon Lalam (ding mangatibe siudad a ating pasbul dalan a malyaring ikandadu),

⁶ ing siudad ning Baalat, ding sablang siudad a pipagponduan na king nanumang kailangan, at ding siudad para karing kabayu na at karwahe. Pepagawa na ing sabla nang buring magawa king Jerusalem, king Lebanon, at king sablang lugal a sakup na.

⁷ Kinua na la at pinilit pepagobran Solomon ding taung mitagan antimo ding Hiteo, Amoreo, Perezeo, Heveo, at Jebuseo.

⁸ E la Israelita at ila ring e ra pete inyang lisuban de ring Israelita ing Canaan. Pinilit na lang magobra at angga na king panaun ngeni.

⁹ Oneng ala yang pinilit magobra karing kalupa nang Israelita; gewa na lang sundalus, opisyal, pekapun da ring karung panggera, at sundalus a pakasake kabayu.

¹⁰ Ating aduang dalan limang pulung opisyal a manibala king sapilitang pamagobra para karing pagawa nang Solomon.

¹¹ Ibat king Siudad nang David, linipat neng Solomon king palasyung pepagawa na ing asawa na a anak ning ari ning Ehipto. Ngana, E ya sukat manuknangan ing asawa ku king palasyu nang David a ari ning Israel uling sagradu ya ing lugal a pagkabilian ning Kaban ning Ginu.

¹² Kaybat na nita, i Solomon minain yang ain-a-durulukan king Ginu ketang altar a pepagawa na king arap ning Templo.

¹³ Ila deti ring ain-a-durulukan a sukat miyain agpang king inutus nang Moises neng Aldo ning Sabbath, neng Piesta ning Bayung Bulan, at ding atlung piesta kilub ning pabanua: ing Piesta ning Tinape Alang Lebadura, ing Piesta ning Pamamupul, at ing Piesta da ring Dalungdung.

¹⁴ Sindu na ing kaayusan a pegumpisan nang David a tata na tungkul king kasuyuan da ring pari at ding Levita a sumaup karela king pamagkanta at king nanumang obra da aldo-aldo. Mibili ya namang grupu-grupung a guardia para karing pasbul dalan uling iti ing inutus nang David, ing talasuyu ning Dios.

¹⁵ Tiparan da ngan deting pari at Levita ing sablang tituk nang obra karelang Solomon, at pati na itang karing bale pipagponduan king nanumang pamangailangan.

¹⁶ Apayari na mu ring Solomon ing sablang buri nang pagawa, magumpisa king pangatalakad ning pundasyun ning Templo ning Ginu angga na inyang mayari ya.

¹⁷ Kaybat na nita, minta ya i Solomon king Eziongeber at king Elat, ding sanglaran king lele ning Edom.

¹⁸ Pepadalan neng mapilan a barku nang Aring Huram i Solomon. Ding mismung tauan nang Huram a sane king pamaglayag ilang mamahala. Miglayag lang kayabe da ring opisyal nang Solomon at miras la king sakup ning Ofir. Kaybat na nita, mibalik la at pigdala reng maygit labing anam a toneladang gintu i Solomon.