2 Cronica 25 - Ing Mayap a Balita Biblia

Ing Aring Amazia ning Juda

¹ Adua yang pulu't limang banua i Amazia inyang meging ari ya, at mig-ari ya king Jerusalem kilub ding aduang pulu't siam a banua. I ima na ya i Jeoadin ning Jerusalem.

² Depat na itang katanggap-tanggap king akakit ning Ginu, oneng e laus king lub na.

³ Inyang matatag na ing pamamahala na, pepapate na la ding pamuntuk a mekamate king ari a tata na.

⁴ Oneng e na la pepapate ding anak da, uling ing batayan na ya ing makasulat king Kautusan nang Moises. Anti ya kaniti: E la sukat papaten ding pengaring lalaki uli da ring kasalanan ding anak ni e la papaten ding anak uli da ring kasalanan da ring tata. Ing paten ya mismu ing dinapat king kasalanan na.

Ing Gera laban king Seir

⁵ Kanita tinipun na lang Aring Amazia ding sablang lalaki da ring tribu na ning Juda at Benjamin. Inayus na la at dininan pamuntuk agpang king bilang a tia dinalan, tia libu, kayabe la kareti ding sablang lalaking idad aduang pulung banua at paitas. Atlu lang dalan a libu heganagana ding sundalus a makasadiang makilaban, at magaling la king pamangamit sibat ampon kalasag.

⁶ Menupa ya namang dinalan a libung sundalus a ibat king Israel king alagang apat a toneladang pilak.

⁷ Oneng dinatang ya ing metung a talasuyu ning Dios at ngana, Makamal a Ari, e yu la sukat tutuki ding sundalus a ibat king Israel uling e ya panig ing Ginu king Israel o king ninumang menibatan king Efraim.

⁸ Agyang pang kayabe yu la o makilaban kayung mitmung tapang king labanan, makanyan man pasambut na kayu ning Dios karing kalaban uling ya ing mamie tagumpe o pangasambut kekayu.

⁹ Nganang mengutang Amazia king talasuyu ning Ginu, Nanung malyari karing apat a toneladang pilak a binayad ku karing sundalus ning Israel? Pekibat ning talasuyu ning Dios, Maygit pa kareta ing malyari nang ibie keka ning Ginu.

¹⁰ Inya pepaulian na lang Amazia ding sundalus a ibat king Efraim. Minuli lang mua at mititigis a ipan karing tau Juda.

¹¹ Kaybat na nita, siniknangan nang Amazia ing lub na at penimunan na la ding sarili nang sundalus papunta king Kapatagan ning Asin. Mekapate lang apulung libung kalaban karin a taga Seir.

¹² Mekabihag la pang apulung libung sundalus. Dela da la king taluktuk ning Sela; tinulak da la karin at mete la karing batung atyu lalam.

¹³ Kanita ding upahang sundalus a pepaulian nang Amazia at e na peintulutan makiabe king pamakilaban linusub la karing siudad ning Juda, magumpisa king Samaria angga king Bet Horon. Mekapate lang atlung libung tau at menguang dakal a pibandian.

¹⁴ Kaybat na lang simbut at pete Amazia at ding sundalus na ding Edomita, minuli la at dela na lang Amazia ding rebultu ra; simban na la at dinuluk yang insenso para karela.

¹⁵ Inya mimua ya ing Ginu kang Amazia. Tinubud ne ning Ginu ing metung a propeta kang Amazia. Ngana ning propeta, Obat sasamba ka karing kikilalanan dang dios ding dayuan a e naman makapagligtas karela king kekang upaya?

¹⁶ Nganang Amazia, kabang magsalita ya pa ing propeta, Kapilan ka pa mitulduan tagapayu ning ari? Patugut ka, nung ali papate ra ka! Tinuknang ya ing propeta oneng ikua nang asabi ing anti kaniti, Balu ku king migpasya ne ing Dios ban papate na ka king depat mu at king e mu pamakiramdam king payu ku.

Ing Gera laban king Israel

¹⁷ Pinulung na lang Amazia ding tagapayu na, at kaybat pepadala yang tubud kang Aring Jeoas ning Israel, ing anak nang Jeoahaz at apu nang Jehu, ban amunan king labanan.

¹⁸ Nganang peparalang pakibat Jeoas kang Amazia, Ing tanaman a suksuk king Bunduk ning Lebanon peparala yang amanu king tanaman a sedro ning Lebanon. Ngana, Ibie me ing anak mung dalaga king anak kung baintau ban maging asawa ne. Oneng ating malyap a animal a dinalan at demusak ne ing tanaman a suksuk.

¹⁹ Sasabian mu king simbut me ing Edom at pagmaragul mu iti ampon pagmayabang. Mayap pa ing manatili na ka mu king bale mu! Obat manintun kang basaggulu a munie mung kapahamakan keka at king Juda?

²⁰ Oneng e ya mekiramdam i Amazia; kaburian na ning Dios ing masambut ya kang Jeoas uling sinamba ya karing idolong kikilalanan dang dios ding Edomita.

²¹ Inya linusub ya i Jeoas, ing ari ning Israel, kang Amazia, ing ari ning Juda. Mitagpu la at milaban kayabe ding sundalus da karin king Bet Semes ning Juda.

²² Simbut ne ning Israel ing Juda at tinakas lang minuli ding sundalus na.

²³ Abihag neng Jeoas ning Israel i Amazia ning Juda at dela ne king Jerusalem, at lesak ne ing pader ning Jerusalem magumpisa king Pasbul dalan ning Efraim angga king Pasbul dalan ning Suluk a ating sukad aduang dalan a yarda.

²⁴ Kinua na ing sablang gintu at pilak at ding kasangkapan king Templo ning Dios a ingatan da ring lahi nang Obed Edom, at pati na ing pibandian ning palasyu. Dela na la ngan at ding bihag king Samaria.

²⁵ Inyang mete ya i Aring Jeoas ning Israel, mebie ya pang labing limang banua i Aring Amazia ning Juda.

²⁶ Ing aliwa pang mengapalyari king panaun na ning pamag-ari nang Amazia, manibat king kapupurmeruan angga na king kawakasan ning bie na, makasulat king Istoria da ring Ari ning Juda at Israel.

²⁷ E tinuknang ing pangimut king Jerusalem laban kang Amazia manibat na kanitang linabag ya king Ginu, inya tinakas yang minta king Lakis. Oneng tekikian de at pete de karin.

²⁸ Seke re king kabayu ing bangke na ban ibalik king Jerusalem. King kutkutan da ring makatua na king Siudad nang David karin de kitkut.