2 Cronica 24 - Ing Mayap a Balita Biblia

Ing Aring Joas ning Juda

¹ Pitu yang banua i Joas inyang meging ari ya, at mig-ari ya Jerusalem kilub ding apat apulung banua. I ima na ya i Zibia a tau Beerseba.

² Pawang katanggap-tanggap king akakit na ning Ginu ing depat nang Aring Joas inyang i Jeoiada ya ing pari.

³ Memili yang aduang babai i Jeoiada ban maging asawa na ning ari, at mikayanak yang lalaki at babai.

⁴ E migluat, inari na king lub nang Joas ing larinan ya ing Templo ning Ginu.

⁵ Inaus na la ding pari at ding Levita at ngana karela, Munta kayu karing balang siudad ning Juda at kuanan yu la ding salaping sukat ibayad dang buis balang banua ding memalen ban ating gastusan king pangalarin na ning Templo ning Dios. Oneng e la agad kinimut ding Levita.

⁶ Inya pepayaus ne ning ari i Jeoiada, ing manimuna da, at sinabi na, Obat e mu iyutus pasibayu karing Levita ing kuanan da la at idala Jerusalem ding buis a manibat king Juda a tikda nang Moises, ing talasuyu ning Ginu, karing memalen para king Toldang tuknangan ning Ginu? (

⁷ Ding talatuki na ning e mayap a babaing i Atalia sinira de ing Templo ning Dios at selaula da la ring kagamitan king pamanyamba ra kang Baal.)

⁸ Inutus na ning ari ing gawa lang metung a baul a maragul para pibaldugan ain at ibili ya king pasbul palub king Templo ning Ginu.

⁹ Inya linual ya ing metung a utus king Juda at Jerusalem king sukat da lang idala karin ding memalen ding buis a tikda nang Moises a talasuyu ning Ginu inyang atyu la king disyerto.

¹⁰ Matula da lang dela ding sablang manimuna at ding tau ding karelang buis, at bildug da la king baul a maragul at kinatmu ya.

¹¹ Darala de aldo-aldo ding Levita iting baul king pekakatawan ning palasyu a mamahala kaniti. Neng mitmu ne iti ing kalihim at ing pekakatawan ning Pekapun da ring Pari kuanan da la ring salapi, at kaybat ibalik ketang pibibilianan na. Inya mekatipun lang dakal a salapi.

¹² Ila deti ring salapi a pemayad da ri Aring Joas at Jeoiada karing taung mamahala king pangalarin na ning Templo ning Ginu, at menupa lang kanteru, kalpinteru, at platerung bakal at tangsu para king pangalarin na ning Templo ning Ginu.

¹³ Megobra lang masalese ding taung deti, inya agad yang melarin at misubli ing Templo ning Dios king sadia nang kabilian.

¹⁴ Inyang meyari na ing pamaglarin king Templo sibli da la king ari at kang Jeoiada ding mitagan a salapi, at ginamit da la king pamangawang kasangkapan para gamitan king kasuyuan king Templo ning Ginu antimo ding sanduk, silyo, at aliwa pang megawa king gintu at pilak. Maayus at alang tuknang ing pamanain king Templo king kekaban ning bie nang Jeoiada.

Ing E Pamanupad king Patakaran nang Jeoiada

¹⁵ Mete ya inyang idad neng dinalan atlung pulung banua.

¹⁶ Kitkut de king kutkutan da ring ari king Siudad nang David uli na ning kayapan a depat na king Israel, king Dios, at king Templo na.

¹⁷ Kamate nang Jeoiada, dinatang la ding manimuna na ning Juda ban munie galang kang Aring Joas, at inagkat deng makiramdam karing kayaduanan da.

¹⁸ Inya pepaburen da ing kasuyuan king Templo ning Ginu, ing Dios da ring makatua da, at megumpisa lang sinamba karing rebultu at larawan na ning diosang i Asera. Uli na ning kasalanan da, mimua ya ing Dios king Juda at king Jerusalem.

¹⁹ Tinubud na la ning Ginu ding propeta ban agkatan mibalik ding memalen, oneng e da la pekiramdaman ding propeta.

²⁰ Inya ing espiritu na ning Ginu dinatang ya kang Zacarias, ing anak nang Jeoiada a pari. Tinalakad ya i Zacarias king arapan da ring tau at ngana karela, Kukutang na kekayu ning Ginung Dios nung baket lalabagan yu la ding utus na ning Ginu? Buri yu ing miparusan kayo? Uling tinggian ye ing Ginu, isakuil na kayu naman!

²¹ Mekisapakat ya i Aring Joas karing taung laban kang Zacarias, at king utus na pemasibas deng batu karin king patyu ning Templo ning Ginu.

²² Kelinguan nang Aring Joas ing kayapan a depat nang Jeoiada, ing tata nang Zacarias. Ing depat na ya ing pepapate ne i Zacarias. Nganang Zacarias inyang mamamate ne, Sana akit ning Ginu ing daraptan mu at papamayaran na ka!

Ing Kawakasan ning Pamag-ari nang Joas

²³ Inyang mapupus ne ing banua, linusub la ring sundalus ning Siria laban kang Aring Joas. Lisuban de ing Juda at ing Jerusalem at pete da la ring sablang manimuna, at kinua ing sablang buri dang kuanan, at inuli da king ari ning Damasco.

²⁴ Agyang ditak la mu ring sundalus ning Siria a linusub, pepasambut na la karela ning Ginu ding mas dakal a sundalus ning Juda. Makanyan nang bigsak ning Dios ing parusa karing memalen at kang Aring Joas uli na ning tinggian de ing Ginung Dios da ring makatua da.

²⁵ Inyang meko na la ding sundalus ning Siria likuan deng grabi sugat i Aring Joas. Misanmetung la ding opisyal na ban labanan ya at paten ya i Aring Joas uli na ning pepapate ne ing anak nang Jeoiada a pari. Inya pete re i Aring Joas king katri na. Kitkut de king Siudad nang David, oneng e ketang kutkutan da ring ari.

²⁶ Ding misanmetung a opisyal laban kang Joas ila ri Sabad a anak nang Simeat ning Ammon, at Jeosabad a anak nang Simrit ning Moab.

²⁷ Makasulat king librung Ing Istoria da ring Ari ing sablang milyari karing anak nang Joas, ding mesabing ula laban kang Joas, at ing pangalarin nang pasibayu ning Templo ning Ginu. Ing menalili bilang ari ya ing anak nang i Amazia.