2 Cronica 22 - Ing Mayap a Balita Biblia

Ing Aring Ahazia ning Juda

¹ Ing gewa dang ari da ring memalen ning Jerusalem ya i Ahazia, ing bungsu nang anak Aring Jehoram. Ya ing mitagan karing anak nang lalaki inyang linusub la ding taung ating abe tau Arabia at pete da la ring mas matua karing anak nang lalaki.

² Apat yang pulu't aduang banua i Ahazia inyang meging ari ya, at pabanua yang mig-ari king Jerusalem. I ima na ya i Atalia, ing apu nang Omri.

³ Tikian na naman ing e mayap nang pamamahalang Ahab, uling i ima na ya ing minie payu kang Ahab ban dapat e mayap.

⁴ Kalupa na ning depat ding miembru ning pamilya nang Aring Ahab, kasuklam-suklam ing depat na king akakit na ning Ginu uling ila ding meging tagapayu na kamate nang tata na, at migdala king pangabagsak na.

⁵ Ing tikian na ya ing payu da, inya mikiabe ya kang Aring Joram ning Israel ban makigera karin king Ramot Gilead laban king Aring Hazael ning Siria. Mesugat ya i Joram king pamakilaban king Rama,

⁶ at migbalik ya king siudad ning Jezreel ban pakayapan ing sugat na a bunga na ning pamakilaban na kang Aring Hazael ning Siria. Inya minta ya king Jezreel i Aring Ahazia a anak ning meyangu-bie Aring Jehoram ning Juda ban dalawan ne i Aring Joram a anak nang Ahab uli na ning mesugat ya.

⁷ King kapamilatan na niting pamandalo na kang Aring Joram, lesak ne ning Ginu ing kayarian nang Aring Ahazia. Inyang datang ya karin i Ahazia, linual la ilang aduang Joram ban saganan de i Jehu a anak nang Nimsi. I Jehu ya ing telaga ning Ginu ban lasakan ya ing pamilya nang Aring Ahab.

⁸ Kabang sasabian nang Jehu ing kayatulan ning Dios king pamilya nang Ahab, akatagpu na la ding manimuna na ning Juda at ding pangunakan nang Ahazia a kayabe na king pamandalo na kang Aring Joram. Pete na lang ngan Jehu.

⁹ Kaybat na nita, penintun ne i Ahazia, at ikit de at arakap ding tauan na inyang sasalikut ya king Samaria. Dela re kang Jehu i Ahazia at pete re. Oneng kitkut de inyang sinabi ra, Anak neng Aring Jeosafat a sinuyung mitmung katapatan king Ginu. Alang mitagan king pamilya nang Ahazia ban malyaring mamahala king kayarian.

Ing Reyna Atalia ning Juda

¹⁰ Inyang abalitan nang Atalia ing pete re ing anak nang i Aring Ahazia, minie yang utus a paten la ngan ding miembru ning pamilya na ning ari ning Juda.

¹¹ Oneng i Jeoseba, ing babaing anak ning Aring Joram, lihim neng tinakas i Joas a anak nang Aring Ahazia. Selikut ne ing anak at ing maningat king metung a kuartu ning Templo ban e ne apate Atalia. I Jeoseba kapatad neng Aring Ahazia at asawa neng Jeoiada a pari.

¹² Menatili yang makasalikut king Templo ning Dios ing anak kilub ding anam a banua kabang i Atalia ya ing mamahala king kayarian bilang reyna.