2 Cronica 14 - Ing Mayap a Balita Biblia

Ing Pamagtagumpe nang Aring Asa karing Tau Etiopia

¹ Mete ya i Aring Abiya at mikutkut ya king kutkutan da ring ari king Siudad nang David. I Asa, ing anak na, ya ing menalili bilang ari. Mapayapa king Juda kilub ding apulung banuang pamag-ari nang Asa.

² Metula ya ing Ginung Dios uling depat na itang mayap at matulid.

³ Pepalako na la ding altar da ring dayuan at ding lugal a mangatas nung nu la sasamba; pepalasak na la naman ding sagradung asias at ding simbulu ning diosang i Asera.

⁴ Inutus na karing memalen na ning Juda ing daptan da ing kaburian na ning Ginu, ing Dios da ring makatua da, at tuparan ding utus na at tuntun karing tuntunan na.

⁵ Uling pepalako na la ding lugal a pisasamban da ring dayuan at ding lugal nung nu la duruluk insenso karing sablang siudad ning Juda, mika kapayapan king kayarian king panaun na ning pamag-ari na.

⁶ Pepatalakad yang mangatibe pader para karing siudad ning Juda king kapanaunan na at e mika gera, uling dininan neng kapayapan ning Ginu.

⁷ Ngana karing tau Juda, Pakatibe ta la ding siudad tamu king kapamilatan da ring mangatibe pader at tore, at pasbul dalan a malyaring ibuklat at ikandadu. Atyu ya king gamat tamu iting bansa uling buri tamung gawan ing kaburian na ning Ginung kekatamung Dios. Pigdipensa na katamu at dininan na katamung kapanatagan nu man karin. Inya megobra la at meging manawa ing bie ra.

⁸ Atin yang atlung dalan a libung sundalus a tau Judea a pakasandatang kalasag at tandus, at aduang dalan walung pulung libu a tau Benjamin a pakasandatang kalasag at pana. Mangatapang la ngan ding sundalus at masibukan king labanan.

⁹ E miglambat i Zera a tau Etiopia linusub ya laban karela. Atin yang metung a milyung sundalus at atin yang atlung dalan a karung panggera, at king panyulung da miras la angga Maresa.

¹⁰ Inya linage ya i Asa ban labanan ne i Zera, at mitagpu la king Kapatagan ning Zefata lele ning Maresa.

¹¹ Nganang menalangin Asa king Ginung Dios, Ginu, ala metung man a anti ika ing makasaup king metung a maina king pamakilaban king metung a mayupaya. Saupan mu kami, O Ginung kekaming Dios, uling manalig kami keka, at king lagyu mu linual kaming makilaban kareting dakal a kalaban. O Ginu, ika ing kekaming Dios; e mu ipaintulut ing sambutan da kami.

¹² King saup ning Ginu, simbut na lang Asa at ding sundalus na ding kalaban a tau Cus at tinakas la.

¹³ Penagal na lang Asa at ding sundalus na angga king Gerar. King saup ning Ginu, gisan da la ngan pete ding dakal a kalaban, at dakal ing pibandian a karelang ikua.

¹⁴ Lesak da la ngan ding siudad a makapadurut king Gerar, uli na ning takut da ring memalen da reti king Ginu. Liban da la ngan ding siudad at dakal ing ikua rang pibandian.

¹⁵ Lisuban da la naman ding paglugalan da ring pastul kawan, at kaybat inuli da la Jerusalem ding ikua rang tupa at kamelyu.