2 Cronica 10 - Ing Mayap a Balita Biblia

Ing Pamag-rebeldi da ring Tribu ning Dane Norti

¹ Minta ya i Rehoboam king Sikem uling karin la minta ding memalen na ning Israel ban gawan deng ari.

² Abalitan na iting Jeroboam a anak nang Nebat (atyu ya kanita king Ehipto uling tinakas ya kang Aring Solomon) at mibalik yang ibat Ehipto.

³ Pepayaus de ring tribu na ning dane norti i Jeroboam, at miyabe-abe lang minta kang Rehoboam at ngara,

⁴ Aring Rehoboam, pepasakitan na kaming Aring Solomon a tata mu king obrang mangabayat. Nung gawan mung mayan ing obra mi at ing bie mi, kanita maging tapat kaming memalen mu.

⁵ Nganang mekibat Rehoboam, Magbalik kayu keti kaybat ning atlung aldo, at kanita ku na ibie ing pakibat ku. Inya meko na la.

⁶ Kaybat na nita, kitnan na lang Rehoboam ding makatuang sinuyu bilang tagapayu nang Solomon a tata na. Ngana karela, Nanu ing masanting kung ibie pakibat karing taung deta?

⁷ Ngarang mekibat, Nung maging maganaka ka karela at buri mu lang pamatulan king karelang kayaduanan, manatili lang susuyu keka king mitmung katapatan.

⁸ Oneng e na pekiramdaman ing payu da ring makatua bagkus minta ya karing kayanakan a akayabe nang meragul at ngeni tagapayu na.

⁹ Nganang mengutang karela, Nanu ing payu a aibie yu ban yung ipakibat ku karing taung makisabing gawan kung mayan ing obrang pepapusan na karelang tata ku?

¹⁰ Ngarang mekibat, Oyni ing sabian mu karela: Mas maragul ya ing malati kung taliri kesa king awakan nang tata ku.

¹¹ Dininan na kayung mabayat a obrang tata ku; lalu keng gawan mabayat ing obrang pepapusan na kekayu. Berug na kayu, oneng aku pamalupaluan da kayu!

¹² Kalabas da ring atlung aldo, mibalik ya kang Aring Rehoboam i Jeroboam at ding kayabe na uling ita ing sinabi na karela.

¹³ Magaspang yang minie pakibat i Rehoboam karela; e na tikian ing payu da ring makatua.

¹⁴ Ing tikian na ya ing payu da ring kayanakan, inya ngana karing memalen, Dininan na kayung mabayat a obrang tata ku; lalu keng gawan mabayat ing obrang papusan ku kekayu. Berug na kayu, oneng aku pamalupaluan da kayu!

¹⁵ E na pekiramdaman ing kayaduanan da ring memalen. Ing milyaring iti makayagpang king kaburian ning Ginu ban matupad itang sinabi na kang Jeroboam, ing anak nang Nebat, king kapamilatan nang propeta Ahiya ning Silo.

¹⁶ Inyang ikit da ring memalen na ning Israel ing e na buring pakiramdaman ning ari ing kayaduanan da, sinabi ra, Nanu pamu ing kaugnayan tamu kang David? Ala ta nang pangataid king anak nang Jese. Balen Israel, tara, muli ta na karing bale tamu! Rehoboam, bahala na ka king sarili mu manibat ngeni! Inya minuli la ding memalen na ning Israel karing bale ra,

¹⁷ at i Rehoboam ya ing meging ari da ring Israelitang sakup ning Juda.

¹⁸ Kaybat na nita, pepayaus neng Aring Rehoboam i Adoniram, ing manibala king sapilitang pamagobra, at tiburan ne karing memalen na ning Israel, oneng pemasibas deng batu angga king mete ya. Inya memalagua yang sinake i Rehoboam king karwahe na at tinakas ya at minta king Jerusalem.

¹⁹ Manibat na kanita angga na ngeni mag-rebeldi la ding memalen na ning Israel laban king pamilya nang David.