2 Ari 8 - Ing Mayap a Balita Biblia

Ing Pamagbalik ning Babaing Tau Sunem

¹ Nganang sinabing Eliseo king babaing tau Sunem a ima na ning anak a lalaking pepasublian nang mebie, Mako na kayu at ing pamilya mu at lumawe aliwang pituknangan yu uling tikda na ning Ginu ing mika maragul a danup king mabilug a bansa kilub ding pitung banua.

² Memintu ya ing babai king sinabi nang Eliseo a talasuyu ning Ginu. Meko ya at ing pamilya na, at menuknangan la king sakup ning Filistia kilub ding pitung banua.

³ Kalabas da ring pitung banua, mibalik ya king sadia rang tuknangan. Pintalan ne ing ari at pasaup ya ban mibalik yang pasibayu king bale na at gabun.

⁴ King oras namang ita, ing ari at i Gehazi, ing kasaup nang propeta Eliseo, mipagsalita la. Ngana ning ari kang Gehazi, Isalita mu no mo kanaku ding bage makapagmulala a gewa nang Eliseo.

⁵ Kabang istoria neng Gehazi itang mete a pepasublian nang mebie Eliseo, dinatang ya ing babaing ima na ning anak a pepasublian nang mebie Eliseo ban aduan ing saup ning ari a mibalik sana ing bale at ing gabun na. Nganang Gehazi king ari, Makamal a Ari, oyni ing babai at ing anak a pepasublian nang mebie Eliseo!

⁶ Kitnan ne ning ari ing babai nung tutu pin ing sinabi nang Gehazi, at pekibat na king iti katutuan. Inya inaus ne ning ari ing metung karing kayaduangan na at ngana, Gawa kang paralan ban mibalik king babai ing bandi na at pati na ing pupul king gabun na manibat na kanitang meko ya angga na king pamagbalik na ngeni.

I Eliseo at i Aring Benhadad ning Siria

⁷ Minta ya i Eliseo king Damasco. Masakit ya kanita i Aring Benhadad ning Siria. Abalitan na ning ari king atyu ya king Damasco i Eliseo, ing talasuyu ning Dios.

⁸ Inya inutusan ne ning ari i Hazael king magdala yang regalu at puntalan ne i Eliseo ban ikutang king Ginu, king kapamilatan nang Eliseo, nung kumayap ya pa.

⁹ Meko ya i Hazael ban makikit kang Eliseo. Migdala yang dakal at miyayaliwang regalu, ing masanting dili king Damasco, at seke na karing apat apulung kamelyu. Inyang akatagpu na ne, ngana kang Eliseo, Tiburan na ku pu ning talasuyu yung i Benhadad a ari ning Siria ban ikutang kekayu nung kumayap ya pa.

¹⁰ Nganang mekibat Eliseo, Mibalik na ka king ari at sabian mu king kumayap ya, oneng pepabalu na kanaku ning Ginu king mate ya mu rin.

¹¹ At linawe neng maratnang Eliseo i Hazael angga king e ya mipaindatun. Kaybat na nita, tinulu ing lua nang Eliseo.

¹² Kitnan neng Hazael, Obat kikiak kayu? Nganang mekibat Eliseo, Uling balu ku ing kasiran a gawan mu karing memalen na ning Israel. Panyilaban mu la ring lugal dang pakakuta, pamaten mu la ring karelang kayanakan a lalaki, ipaspas mu la king gabun ding anak dang mangalati at laslasan a atian ding babaing mabuktut.

¹³ Nganang Hazael, Makananu kung agawa yang bageng yan ngening e na ku man mayupaya? Pekibat nang Eliseo, Pepabalu na kanaku ning Ginu king maging ari na ka ning Siria.

¹⁴ Likuan neng Hazael i Eliseo at mibalik ya king panginuan nang i Aring Benhadad. Nganang mengutang ning ari, Nanu ing sinabi na kekang Eliseo? Pekibat na, Siguradu kayu kanung kumayap.

¹⁵ Kabukasan, kinangwa yang ulas i Hazael at sinoso ne king danum. Kaybat, tekap ne king lupa na ning ari at mete ya. I Hazael ya ing menalili kang Benhadad bilang ari na ning Siria.

Ing Aring Jeoram ning Juda

¹⁶ Inyang lima neng banuang mag-ari king Israel i Joram a anak nang Ahab, i Jeoram a anak nang Jeosafat meging ari ya king Juda.

¹⁷ Atlu yang pulu't aduang banua kanita at mig-ari ya king Jerusalem kilub ding walung banua.

¹⁸ Pekiapusan na ing e mayap dang ugali ring meging ari ning Israel antimo i Ahab a katuangan na uling ayasawa ne ing anak na. Gewa na itang e mayap king akakit na ning Ginu.

¹⁹ Makanyan man, e ne bigsak ning Ginu ing Juda alang-alang king talasuyu nang i David, uling pengaku na king papanatilian neng mag-ari ing pamilya na kabang panaun.

²⁰ King panaun nang Jeoram kanita ya mig-rebeldi ing Edom laban king Israel at mibili yang sarili nang ari.

²¹ Inya minta ya i Jeoram king Zair a kayabe da ring karu nang panggera at ding pekapun da. Oneng ding Edomita peligiran da la, inya tinakas la itang kabengian at minuli la bale ring sundalus na.

²² Manibat na kanita mikawani ne ing Edom king Juda. King panaun mu ring ita ya mig-rebeldi ing Libna.

²³ Makasulat king Istoria da ring Ari ning Juda ing heganaganang depat nang Jeoram.

²⁴ Mete ya i Jeoram at mikutkut ya king kutkutan da ring ari king Siudad nang David. Ing anak nang i Ahazia ya ing menalili bilang ari.

Ing Aring Ahazia ning Juda

²⁵ Inyang labing adua neng banuang mag-ari king Israel i Joram a anak nang Ahab, i Ahazia a anak nang Jeoram meging ari ya king Juda.

²⁶ Adua yang pulu't aduang banua kanita at mig-ari ya king Jerusalem kilub ning pabanua. I ima na ya i Atalia a anak nang Aring Ahab at ingkung ne i Aring Omri ning Israel.

²⁷ Pekiapusan na ing e mayap nang ugali ning pamilya nang Ahab a ingkung na. Gewa na itang e mayap king akakit na ning Ginu antimo ing gewa na ning pamilya nang Ahab a katuangan na uling ayasawa ne ing metung karing anak na.

²⁸ Mekisangga ya i Aring Ahazia kang Aring Joram ning Israel inyang lisuban de i Aring Hazael ning Siria. Milaban la king Ramot Gilead at asugat de ring sundalus ning Siria ing Aring Joram.

²⁹ Mibalik ya king Jezreel ban paulu ne ing sugat na. Delawan neng Ahazia a anak nang Jeoram inyang abalitan neng mika kapanamdaman ya.