2 Ari 21 - Ing Mayap a Balita BibliaIng Aring Manase ning Juda (2 Cronica 33:1-20) 1 Labi yang aduang banua i Manase inyang meging ari ya, at mig-ari ya king Jerusalem kilub ding limang pulu't limang banua. I ima na ya i Hefziba. 2 E mayap ing gewa na king akakit na ning Ginu, uling tikian na ing makasumaming ugali da ring taung tinabi na ning Ginu kanitang lulub la ding Israelita king gabun a mipangaku. 3 Pepatalakad na lang pasibayu ding pisasamban da ring paganu a pepalasak nang Hezekia a tata na. Pepagawa na la ring altar para kang Baal at pepagawa ya namang larawan na ning diosang i Asera antimo ing gewa nang Aring Ahab ning Israel, at sinamba ya karing batuin. 4 Pepagawa yang altar a paganu king Templo ning Ginu, king lugal a sinabi na ning Ginu a karin ya samban king kapilan pa man. 5 Pepagawa ya namang aduang altar para karing aduang asias na ning patyu ning Templo ning Ginu ban samban la karin ding batuin. 6 Silaban ne ing anak nang lalaki bilang ain-sakripisyu. Mewili ya king pamangulam, king pamamanula, king pamanialamangka, at meniawad kausukan karing mamamag-espiritista. Milalu king e mayap ing gewa na king akakit na ning Ginu. Inya pepamua ne ing Ginu. 7 Binili ne king Templo ing larawan nang Asera a pepagawa na, king mismung Templo nung nu na sinabi ning Ginu kang David at king anak nang i Solomon: Keti king Jerusalem, ing Templo, ya ing lugal a pinili ku karing heganaganang sakup dang gabun ding labing aduang tribu ban ken ku misamban. 8 E ku la itabi ding Israelita keting gabun a binie ku karing makatua da, nung pamintuan da lang mitmung katapatan ding kautusan a binie ku king talasuyu kung i Moises. 9 Oneng e la mekiramdam kanaku ding memalen na ning Juda. Linili na lang Manase. Lalung e mayap ing gewa da kesa king gewa da karing taung tinabi na ning Ginu kanitang lulub na la king gabun a mipangaku. 10 Migsalita ya karela ing Ginu king kapamilatan da ring talasuyu nang propeta. Ngana, 11 Gewa na lang Aring Manase ning Juda ding makasumaming bage. Lalung e mayap ing gewa na kesa king gewa da ring Cananeo, at tinake na la king pamikasala ding memalen na ning Juda king kapamilatan da ring idolo na. 12 Inya aku, ing Ginu Dios ning Israel, parala kung kapahamakan king Jerusalem at king Juda, at mangilabut ya king takut ing ninumang makaramdam. 13 Nung makananu keng perusan ing Samaria, makanyan kia namang parusan ing Jerusalem, antimo ing gewa ku kang Aring Ahab ning Israel at karing lahi na. Ilako ke tau ing Jerusalem antimo nung makananu yang lalako dinat ing pinggan at kaybat isakub ya. 14 Lakuan ku la ding taung mitagan at ibie karing karelang kalaban. Sakupan da la at panakawanan 15 uling e mayap ing gagawan da king akakit ku, ing Ginu. Yan ing sangkan nung inya mimua ku manibat na karing makatua da inyang liwal ku la king Ehipto at angga na ngeni. 16 Subali pa kanyan, dakal ya pepapate taung alang kasalanan i Manase; minagus ing daya karing dalan na ning Jerusalem. E pa kayabe ing gewa nang pamanimuna king pangababad na king kasalanan ning Juda king kapamilatan na ning pamanyambang idolo. 17 Makasulat king Istoria da ring Ari ning Juda ing heganaganang gewa nang Manase at ing kasalanan a gewa na. 18 Mete ya i Manase at mikutkut ya king hardin ning palasyu, ing hardin nang Uza, at ing anak nang i Amon ya ing menalili bilang ari. Ing Aring Amon ning Juda (2 Cronica 33:21-25) 19 Adua yang pulu't aduang banua i Amon inyang meging ari ya king Juda, at mig-ari ya king Jerusalem kilub ding aduang banua. I ima na ya i Mesulemet, ing anak nang Haruz ning balen ning Jotba. 20 E mayap ing gewa na king akakit na ning Ginu; tikian na ing e mayap nang gewang Manase a tata na. 21 Tikian ne bakas i tata na king heganaganang gewa na, at sinamba ya karing idolong simban nang tata na. 22 Sikuil ne ing Ginu, ing Dios da ring makatua na; e ya memintu karing utus na ning Ginu. 23 Misasapakat la ring opisyal na at pete re king palasyu na. 24 Kaybat na nita, ding memalen na ning Juda pete da la ring mekamate king Aring Amon, at kaybat gewa reng ari da ing anak nang i Josias. 25 Makasulat king Istoria da ring Ari ning Juda ing heganaganang gewa nang Amon. 26 Mikutkut ya i Amon king patyu ning hardin nang Uza, at ing anak nang i Josias ya ing menalili bilang ari. |
Philippine Bible Society New Testament © 1981, Bible © 1994
Philippine Bible Society