1 Samuel 7 - Ing Mayap a Balita Biblia

¹ Dinatang la ding memalen na ning siudad ning Kiriat Jearim at kinua re ing Kaban ning Ginu, at dela re king bale nang Abinadab a atyu babo ning metung a bunduk-bundukan. Pinili re ing anak nang i Eleazar ban ya ing sikasu king Kaban ning Ginu.

Ing Pamanimuna nang Samuel king Israel

² Malambat ya king Kiriat Jearim ing Kaban ning Ginu; manga adua yang pulung banua karin. Sinisi ya ing mabilug a Israel at mignasang migbalik lub king Ginu.

³ Nganang Samuel karing memalen na ning Israel, Nung talagang bisa kayung magbalik king Ginu king mabilug yung pusu, sukat yu lang ilako ding dios a dayuan at pati na i Astarte. Italaga yu ing sarili yu king Ginu at ya mung bukud ing suyuan yu. Kanita iligtas na kayu karing Filisteo.

⁴ Inya leko da la ring dios a dayuan at pati na i Astarte, at ing bukud da mung simban ya ing Ginu.

⁵ Kaybat nganang Samuel, Tipunan yu la ding sablang Israelita karin Mizpa at panalangin da kayu king Ginu.

⁶ Mitipun la karin Mizpa at sinaklu lang danum at saka ra bilus iti arapan na ning Ginu. Mig-ayunu la king aldong ita at sinabi ra, Mikasala kami king Ginu. (At i Samuel ya ing meging pamuntuk da ring Israelita karin Mizpa.)

⁷ Migsadia la ding ari da ring Filisteo ban makilaban king Israel inyang abalitan da king mitipun la ding Israelita karin Mizpa. Mitakutan la ding Israelita karing Filisteo inyang abalitan da iti,

⁸ at sinabi ra kang Samuel, E yu ke sana paburen. Maus kayung alang tuknang king Ginung kekatamung Dios ban iligtas na katamu karing Filisteo.

⁹ Kanita kinangwa yang metung a sususu pang tupa i Samuel at saka ne inain kabilugan bilang ain-a-durulukan king Ginu. Menalangin ya i Samuel king Ginu para king Israel at pekibatan na ne man ning Ginu.

¹⁰ Kabang yayain neng Samuel ing ain-a-durulukan dinatang la ring Filisteo ban lusuban de ing Israel, oneng menuldul masikan at makanyan na lang beligon ning Ginu ding Filisteo king aldong ita. E ra balu ing daptan da at memulayi la king akakit da ring Israelita.

¹¹ Linual la Mizpa ding sundalus na ning Israel at saka ra la tegal ding Filisteo angga king Betcar at pete da la.

¹² Kaybat na nita, kinangwa yang metung a batu i Samuel at binili ne iti pilatan na ning Mizpa at Sen at inaus neng Ebenezer. Ngana wari: Angga ngeni seupan na katamu ning Ginu.

¹³ Makanyan lang mesambut ding Filisteo, at manibat na kanita e ra ne liban pa ing bansang sakup na ning Israel. Kabang mabie ya i Samuel pepakit na ning Ginu ing laban ya karing Filisteo.

¹⁴ Ikua ra lang abalik king Israel detang balen a sekupan da ring Filisteo manibat king Ekron angga Gat; ikua na ning Israel ing sablang gabun a kimkam da ring Filisteo. Mekipagkasundu la ding Amoreo king Israel.

¹⁵ Meging pamuntuk ne ning Israel i Samuel kabang mabie ya.

¹⁶ Balang banua lipat-lipat ya king Betel, Gilgal, at Mizpa ban ayusan na ing problema da ring tau kareting lugal.

¹⁷ Kaybat magbalik ya Rama, uling karin ya manuknangan at manungkulan bilang ukum na ning Israel. Karin ya naman mitalakad metung a altar para king Ginu.