1 Samuel 6 - Ing Mayap a Balita Biblia

Binalik de ing Kaban ning Ginu

¹ Pitu yang bulan atyu ing Kaban ning Ginu king bansa ding Filisteo.

² Kanita pepayaus da la ring Filisteo ding karelang pari at mamamanula at ngarang kinutang, Nanung gawan tamu king Kaban ning Ginu? Nanu ing parala tamu potang pabalik ta ya king sarili nang lugal?

³ Ngara, Nung pabalik ye ing Kaban ning Dios king Israel, papagdalan yeng regalu bilang bayad kasalanan. Kanita kumayap kayu, at akilala yu nung baket paparusan na kayu.

⁴ Nanu ne man ing regalu a padala tamu bilang bayad king kasalanan? ngarang kinutang ding tau. Pekibat da, Limang gintung tumor at limang gintung dagis agpang king kabilangan da ring ari da ring Filisteo, uling metung ya mu ing salut a digpa kekayu at karing ari yu.

⁵ Pakilupa yu la ding gintu karetang tumor at dagis a penibatan na ning salut yu; parangalan ye ing Dios ning Israel, pota ituknang na na ing parusa na kekayu, karing kikilalanan yung dios, at king bansa yu.

⁶ E yu apusan ing kesiasan dang buntuk ding tau Ehipto at ning ari da. E wari inyang parusan na nong e makanyan-kanyan pepaburen da lang meko ding Israelita?

⁷ Inya ngeni, magsadia kayung metung a bayung gareta at aduang bakang pasusu a e pa mirinan paud; ikulung yu la ding biserung pasusuan da at ding pakulyutan yu king gareta ila deting gaindung baka.

⁸ Kuanan ye ing Kaban ning Ginu at ibili ye king gareta, at ibili yu la lele na, kilub ning metung a baul, ding gintung bage a parala yu bilang pamayad king kasalanan yu. Kaybat palakaran yu lang dili ra ding baka; e yu la pataid kaninu man.

⁹ Kaybat magumasid kayu: nung taglus-taglus lang munta king Bet Semes a tuknangan da, kanita ing Ginu pin ing memarusa kekatamu; nung e la taglus-taglus karin, mipaintagun mu ita.

¹⁰ Makanyan ing gewa ra. Kinangwa lang aduang bakang pasusu ban mangulyut karing gareta, at saka ra la kilung ding karelang biseru.

¹¹ Binili re ing Kaban ning Ginu king gareta at itang baul nung nu la karin ding gintung tumor at dagis.

¹² Taglus-taglus lang minta Bet Semes ding baka. Tikian de ing matulid a dalan papunta karin, at e la man migliku-liku bandang wanan o kayli; gagaga la kabang dalan. Tikian da la ring ari da ring Filisteo angga king angganan na ning Bet Semes.

¹³ Papalutan da ring tau Bet Semes ing trigu ra king kapatagan. Inyang mipayatna la ikit de ing Kaban at metula la.

¹⁴ Miras ya ing gareta ketang asikan nang Josue ning Bet Semes. Ating metung a maragul a batu karin; pemakli ra ing dutung na ning gareta at inain da la bilang ain-a-durulukan ding baka king Ginu.

¹⁵ Kildas de ring Levita ing Kaban ning Ginu at ing baul a atyu siping na nung nu la karin ding gintung bage, at binili da la babo na ning maragul a batu. Minain lang ain-a-durulukan at aliwa pang ain-sakripisyu king Ginu ding memalen na ning Bet Semes king aldo mu ring ita.

¹⁶ Panakit da kaniti ding lima rang ari ding Filisteo, migbalik la king aldo mu ring ita karin Ekron.

¹⁷ Makanyan da lang pipartian ding gintung tumor a pepadala da ring Filisteo bilang bayad king Ginu tungkul king karelang kasalanan: ing metung para king Asdod ya, ing metung para king Gaza ya, ing metung para king Askelon ya, Gat, at Ekron.

¹⁸ Kasing dakal da la ring gintung dagis ding sablang siudad a sakup da ring limang ari a Filisteo; kayabe no kareti ding lugal a pakabakud pader at ding alang pader. Angga man king aldong iti atyu king asikan nang Josue karin Bet Semes itang batung maragul nung nu re timpak ing Kaban ning Ginu.

¹⁹ At pete no ning Ginu ding pitung pulung katau karing memalen na ning Bet Semes uling sinilip de ing Kaban ning Ginu. Menangis la ding tau panakit da king mete la ding kabalen da.

Dela re Kiriat Jearim ing Kaban ning Ginu

²⁰ Ngara ding memalen na ning Bet Semes, Ninu ing malyaring marap king Ginu, ing banal a Dios? Nukarin ta ya malyaring padala ing kaban ban milaut ya kekatamu?

²¹ Mitubud la king siudad na ning Kiriat Jearim. Pepasabi ra king binalik da ne ring Filisteo ing Kaban ning Ginu; inya malyari da neng kuanan.