1 Samuel 25 - Ing Mayap a Balita Biblia

Ing Kamatayan nang Samuel

¹ Mete ya i Samuel. Mitipun ya ing mabilug a Israel at pigpaldasan ne. Kitkut de king bale na karin king Rama. Kaybat na nita, minta ne man i David king ilang ning Paran.

I David at i Abigail

² Ating metung a taung mabandi karin Maon; atyu king Carmel ing pibandian na. Atlu lang libu ding tupa na at libu no man ding kambing na. Ururan na la ding tupa na karin Carmel.

³ Nabal ya lagyu ing tau at i Abigail ya ing asawa na. Biasa ya at malagu ing babai, oneng masungit ya at matsura ugali iting lalaking lahi nang Caleb.

⁴ Abalitan nang David a atyu king ilang king ururan na lang Nabal ding tupa na.

⁵ Inya mitubud yang apulung kayanakan kang Nabal at nganang minie bilin David kareti, Munta kayu Carmel at puntalan ye i Nabal; pugayan ye king lagyu ku.

⁶ Makanyan yeng pugayan, Kapayapan keka, kapayapan king kekang pibalebale; kapayapan king sablang atyu keka.

⁷ Abalitan kung ururan mu la ding tupa mu; kayabe mi la ding magpastul mu at e mi la ninanan at ala lang keilanganan kabang atyu la king Carmel.

⁸ Pangutnan mu la at patunayan da iti keka. Inya matula mo sanang tanggapan ding kanakung tubud. Ipakisabi ku sana nung malyari ngeni mu mang piesta yu, dinan mu ke sanang apangan mi, deting talasuyu mu at ing kaluguran mung i David.

⁹ Inyang miras na la ding kayanakan a tiburan nang David, sinabi ra kang Nabal itang pasabi nang David, at menenaya lang pakibat.

¹⁰ Nganang Nabal karing tubud nang David, Ninu wari i David? Ninu ya wari ing anak nang Jese? Dakal la ngeni ding ipus a tatakas karing panginuan da!

¹¹ Kuanan ku naman wari ing tinape ampon inuman at karning sidia ku para karing manurud kung tupa, at kaybat ibie ku mu karing taung e ku man balu penibatan?

¹² Meko la ding kayanakan a tubud nang David, at mibalik la at belita ra iti kang David.

¹³ Kanita nganang David karing tauan na, Dalan yu la ding espada yu! Dela ne ning balang metung at metung ing espada na. Dela nia namang David ing espada na. Ating apat a ralan a katau karing tinuki kang David kabang melakuan lang magbante king karelang karga ding aduang dalan.

¹⁴ Oneng minta ya ing metung karing magobra nang Nabal kang Abigail at nganang sinabi, Pepatubud ya pu ibat king ilang i David ban pugayan ne ing kekaming panginuan, oneng kemuanan na la pu ding tubud.

¹⁵ Maganaka no man kekami ding taung deta. E ra ke ninanan at ala lang kinua nanuman kekami kabang kayabe mi la king marangle.

¹⁶ Binten da kami aldo at bengi kabang kayabe mi la king pamagpastul mi.

¹⁷ Isipan yu pung masalese nung nanung agawa yu, uling mibili ya king panganib ing panginuan mi at antimu rin ing mabilug nang pibalebale. Masiadu yang masungit, inya alang mangangas makipagsalita king asawa yu.

¹⁸ Kanita i Abigail memalagua yang migsadiang aduang dalan a tinape, alak karing aduang lulanan, limang tupang mekatat na, at limang takal a trigung sing-le, dinalan a kasapunggul a pasas, at aduang dalan a bibingkang higera, at pepasake na iti karing asno.

¹⁹ Ngana karing ipus, Sulung; muna na kayu kanaku; tuki ku kagulutan yu. Linihim na iting bage kang Nabal a asawa na.

²⁰ Kabang maglakbe yang makasake king asno at tutuntun king metung a gasgas king bunduk-bundukan, kanita ne man datang i David at ding kayabe na. Ikua rang misalubung.

²¹ Nganang David king lub na, Sayang mu pala ing depat ming pamagbante king pibandian na ning taung i Nabal king ilang; e ya kebatingan nanuman king uli mi. Oyni pa ing apala mi.

²² Parusan na ku sana ning Dios nung sakaling bukas atin kung itagan mabie metung mu man karing lalaki king pibalebale na.

²³ Panakit nang Abigail kang David agad-agad yang kinuldas king asno na at dinuku ya angga king gabun arapan nang David.

²⁴ Migsakab ya lele nang bitis at ngana, Kanaku yu na pu ipagpa ing mua yu, oneng ipakisabi kung mayap king pakiramdaman yu pa mu ing sabian ku.

²⁵ E ye sana papansinan ing asawa kung i Nabal. Ala yang kwentang tau. Bage ne pin ing lagyu na: luse ya. At luse ya pin. E ku la pu ikit ding kayanakan a tiburan yu kekami.

²⁶ Ngeni pu, makamal, ing Ginu at ikayu na ing saksi ngening e na peintulut ning Ginu ing patulu kayung daya at mablas karing sarili yung gamat. Mananu na sanang miras karing kalaban yu at karing bisang manampalasan kekayu ing miras kang Nabal.

²⁷ At ngeni paintulut yung ing dela ku kekayu tanggapan da ring kayanakan a kayabe yu.

²⁸ Patawaran yu sana ing nanumang kasalanan ning talasuyu yu; siguradung gawan na kayung ari ning Ginu uling para king Ginu kayu makilaban at alang nanumang dewakan kekayu.

²⁹ Nung sakaling atin taung bisang makamate kekayu, e na paintulut ning Ginu ing milako kayu karing taung ingatan na bie. Nune ing bie ra ding kekayung kalaban maging kalupa lang batung paniradol.

³⁰ Keng tuparan na ning Ginu ing sablang sinabi nang mayap tungkul kekayu at tilduan na na kayung maging pamuntuk ning Israel,

³¹ ala kayung sukat ganakan. Ala kayung sukat ikabalisa uling e na ko man pepatulung daya king alang sangkan at migbengansa karing kekayung kalaban. Nung sakaling dinan na na kayung masanting a kabilian ning Ginu, e yu ku sana kakalinguan.

³² Kanita nganang David kang Abigail, Purian ya ing Ginu, ing Dios ning Israel, ing mitubud keka kanaku king aldong iti!

³³ Mayap a oras king masanting mung pamisip; mayap a oras keka uling e mu peintulut ing patulu kung daya king aldong iti at mablas king kapamilatan da ring gamat ku!

³⁴ Saksi ya ing Ginung Dios ning Israel; e na peintulut ing apanasakit da ka. Nung e ka memalaguang migsaria kanaku tabalu ta nung itang kabukasan atin pang metung mang lalaki a mitagan king pibalebale nang Nabal.

³⁵ Kanita tinggap nang David itang dela nang Abigail. Ngana, Abigail, muli na kang payapa; lawan mu, pekiramdaman da ka at binie ku ing aduan mu.

Mete ya i Nabal

³⁶ Migbalik ne kang Nabal i Abigail; lipat ne pa ning piestang sidia ra para king metung a ari ing pepasadia nang Nabal king bale na. Masaya yang e mu nanu i Nabal uling tutu neng malasing. Inya ala yang sinabi nanuman i Abigail kang Nabal angga na inyang miras na ing abak.

³⁷ Pangayabak e ne malasing i Nabal at belita na la ning asawa na deting bage. Meyataki ya at e ne makagalo.

³⁸ Kaybat da ring apulung aldo lakuas yang melala kabilian at melaus yang mete.

³⁹ Nganang David inyang abalitan nang mete ne i Nabal, Purian ya ing Dios uling ya ing minablas king insultu a tinggap ku kang Nabal at e na peintulut kanaku ing gawang e ustu; pepagpa na ning Ginu kang Nabal itang e mayap nang dapat. Kanita mitubud ya i David kang Abigail at pepasabi na king buri neng maging asawa na.

⁴⁰ Miras la ding tiburan nang David kang Abigail karin Carmel. Ngara, Tiburan na kaming David keka ban ituki ra ka at ban maging asawa na ka.

⁴¹ Tinalakad ya i Abigail at dinuku ya angga king gabun. Ngana, Talasuyu na ku at makasadia kung manos karing bitis da ring talasuyu na ning kanakung panginuan.

⁴² Memalagua yang tinalakad i Abigail at sinake ya king metung a asno. Kayabe na la ding limang babaing katulung na at tikian da la ring tubud, at meging asawa neng David.

⁴³ Asawa na nia namang David kanita i Ahinoam ning Jezreel; ilang adua ding meging asawa na.

⁴⁴ Binie na ne mang Saul ing anak nang i Mikal a asawa nang David kang Palti a anak nang Lais a tau Galim.