1 Samuel 22 - Ing Mayap a Balita Biblia

Tinakas ya i David at Minta ya king Adulam

¹ Ibat Gat tinakas ya i David at sinalikut ya king kueba ning Adulam. Inyang abalitan da iti pintalan de ring kapatad na at ding sabla nang kamaganak.

² Mekiabe la kang David ding sablang taung daralan maragul a kasakitan at makakutkut king utang; antimu rin detang e masaya king malilyari king bansa. Meging pamuntuk de ring e maygit o kumulang a apat a ralan a lalaki.

³ Manibat karin minta ya i David king Mizpa ning Moab. Ngana king ari na ning Moab, Ipakisabi ku sanang mayap kekayu king tulutan yu lang manatiling kayabe yu i tata ku at ima ku anggang e ku pa balu ing kaburian na ning Dios para kanaku.

⁴ Likuan na la king ari na ning Moab at menatili lang kayabe na kabang atyu ya i David king kuta king bunduk.

⁵ Kanita sinabi na ning propetang i Gad kang David, E ka manatili king kuta mu king bunduk; mako ka ken at munta ka king sakup ning Juda. Makanyan yang meko i David at minta ya king gubat na ning Heret.

⁶ Abalitan nang Saul nung nu ya sasalikut i David at ding tauan na. Makalukluk ya i Saul king Gibea lalam ning tanaman a tamarisko a atyu king metung a bunduk-bundukan. Tatalnan ne ing tandus na king metung a gamat at abe na la ngan ding tauan na.

⁷ Nganang Saul karing tauan na, Makiramdam kayu, ikayung lahi nang Benjamin; dinan na kayu waring marangle at gabun pitatamnan ubas David a anak nang Jese? Gawan na kayu waring pamuntuk da ring libu-libu o dina-dinalan a sundalus?

⁸ Obat makisapakat kayu kang David laban kanaku? Obat metung man alang memalita kanaku king mekikasundu ya pala ing anak ku kang David a anak nang Jese? Metung man alang migmalasakit kanaku at mekasabi king ing anak ku silsulan ne pang lumaban kanaku ing talasuyu kung i David a ngeni manaya ba na kung tambangan.

⁹ Kanita pekibat nang Doeg a tau Edom a makatalakad kayabe ding tauan nang Saul, Ikit keng papunta Nob i David a anak nang Jese; pintalan ne i Ahimelek a anak nang Ahitub karin Nob.

¹⁰ Mengutang ya pa i Ahimelek king Ginu para kang David. Dininan ne pang pamangan at saka ne binie kang David itang espada na ning Filisteong i Goliat.

Pepapate na lang Saul ding Pari

¹¹ Kanita pepayaus ne ning ari i Ahimelek, ing pari a anak nang Ahitub, at ding sabla nang pamilya a pari karin king Nob. Minta la ngan deti king ari.

¹² Nganang Saul, Makiramdam ka, anak nang Ahitub. Pekibat na, Makiramdam ku pu, Makamal a Ari!

¹³ Nganang Saul, Ahimelek, obat mekisabuatan ka laban kanaku? Obat mekisapakat ka kang David a anak nang Jese? Dininan mu neng tinape, dininan me pang espada. Mengutang ka pa king Dios para kang David, inya mig-rebeldi ya laban kanaku at manaya ya ngeni ba na kung tambangan.

¹⁴ Kanita pekibat nang Ahimelek king ari, Ninu mo pu karing sabla yung tauan ing kasing tapat nang David a manuyang yu at pekapun da ring bante-sundalus yu, at gagalang da king mabilug yung kayarian?

¹⁵ Ngeni ku pa wari mengutang king Dios para kang David? Ali! E yu ku sana bibintanganan nanumang kasalanan at ing mabilug ming pamilya. Ala ku pung balu ditak man o dakal tungkul king bage a iti.

¹⁶ Kanita ngana ning ari, Mate ka ngeni, Ahimelek, at pati na ing mabilug mung pamilya!

¹⁷ Nganang minie utus ning ari karing guardia na, Paten yu la ding pari na ning Ginu uling kasabuat na lang David. Balu rang tinakas ya i David oneng e ra pepabalu iti kanaku. Oneng mikakunu la ding guardia a buatananan da lang gamat ding pari na ning Ginu.

¹⁸ Kanita ngana ning ari kang Doeg, Ika nang makamate karing pari na ning Ginu. At pete na lang Doeg a tau Edom ding pari; walu lang pulu't lima ding pete nang pakasulud efod.

¹⁹ Pepapate na la naman ding sablang makatuknang king Nob a siudad da ring pari; lalaki't babai, anak at pati na ding pasusuan, baka, asno, at tupa.

²⁰ Oneng i Abiatar, ing metung karing anak nang Ahimelek at apu nang Ahitub, mekatakas ya at pintalan ne i David.

²¹ Belita nang Abiatar kang David king pepapate na lang Saul ding pari na ning Ginu.

²² Nganang David kang Abiatar, Balu ku na kanitang atyu ya i Doeg a tau Edom ing sumbung ya kang Saul. Aku ing maki pakibatan king pangamate na ning mabilug mung pamilya.

²³ Manatili kang kayabe ku; e ka tatakut. Ing bisang makamate keka ya naman ing bisang makamate kanaku. Ligtas ka ngening kayabe mu ku.