1 Samuel 21 - Ing Mayap a Balita Biblia

Minta ya Nob i David

¹ Kanita minta ya Nob i David at pekikitan ne i Ahimelek a pari. Gagalgal yang sinalubung kang David i Ahimelek at nganang mengutang, Obat ikang dili mu? Ala kang kayabe?

² Pekibat nang David, Atin yang inutus kanaku ing ari at penabilin na ing e ku paniabian kaninu man ing parapat na kanaku. Pepapanaya na ku mu karing kayabe ku king metung a lugal.

³ Nanu ing pamangan yu ken? Dinan yu kung limang tinape o kaya nanumang pamangan a atyu keti.

⁴ Ngana ning pari, Alang aliwang tinapeng atyu keni subali mu ing sagradung tinape. Nung sakaling e la siniping ding kekang sundalus karing babai malyari lang mangan kaniting tinape.

⁵ Nganang David king pari, Ing tutu na niti, malaut la kekami ding babai neng atin keng lakad agyamang pangkaraniwan yang lakad. O ngeni pa mong maselan ing lakad mi!

⁶ Uli na niti, dininan ne ning pari king sagradung tinape; uling alang tinape karin nune mu itang tinape a miyain king altar na ning Ginu. Lalako re iting tinape king altar ning Ginu at alilan deng tinape kakid-akid potang miras ne ing aldo a sukat deng alilan.

⁷ Mipaintagun ing atyu ya kanita karin i Doeg a tau Edom, ing metung karing tauan nang Saul at pekapun da ring pastul na. Atyu ya karin ban samba king Ginu.

⁸ Nganang David kang Ahimelek, Atin kayung tandus o kaya espada? E ke dela ing espada ku o nanumang sandata uling pamalaguanan na ku ning ari tungkul king utus na kanaku.

⁹ Pekibat na ning pari, Atyu ya keni ing espada nang Goliat, ing Filisteo a pete mu karin king Kapatagan ning Ela; atyu keta king kagulutan na ning efod; makabalut yang imalan. Nung buri me, kuanan me; alang aliwang sandata keti nune mu ita. Nganang David, Ala yang kalupa ing sandatang ita; ibie ye kanaku.

¹⁰ King aldong ita meko ya i David ban takasan ne i Saul. Minta ya kang Akis a ari ning Gat.

¹¹ Ngara ding tauan nang Akis, Aliwa i David a ari na ning Israel ine? Ya ing pagkanta da ring babai kabang teterak la, Libu-libu la ding pete nang Saul, oneng laksa-laksa la ring pete nang David.

¹² Meligalig ya i David king sinabi ra at mitakutan ya kang Aring Akis ning Gat.

¹³ Inya king akakit da migkunwari yang murit; memanyulat ya karing pasbul dalan na ning siudad at pepaburen nang tinaluntun ing wawa na king balbas na.

¹⁴ Kanita nganang Akis karing tauan na, Murit ya ing tau; obat dela ye pa kanaku?

¹⁵ Dakal na la ring taung murit keti. Buri yung asaksian ku ing kamuritan na? Pabalausnan ke kaya king pibalebale ko?