1 Samuel 19 - Ing Mayap a Balita Biblia

Ligaligan neng Saul i David

¹ Misan sinabi nang Saul kang Jonatan a anak na at karing opisyal na king buri neng paten i David. Oneng kaluguran neng Jonatan i David.

² Nganang Jonatan kang David, Buri na kang paten tata ku; mingat ka bukas abak. Munta ka king metung a lugal a alang makibalu at karin ka salikut.

³ Munta ke karin tata ku at pakisabian ke tungkul keka. Sabian ku keka nung atin yang sabian kanaku.

⁴ Mayap ing sinabi nang Jonatan kang Saul a tata na tungkul kang David. Ngana, Tatang, e me sana daraptanan e ustu ing talasuyu mung i David uling ala ne mang gewang e ustu keka. King kamatutuanan, pekinabangan yu ing sabla nang depatan.

⁵ Teya na pati ing bie na at pete ne ing Filisteong i Goliat, at dininan neng maragul a tagumpe ning Ginu ing mabilug a Israel. Ikit yu iti at ketula yu. Nung sakaling paten ye i David king alang matulid a kasangkanan, patuluan yu kanita ing daya na ning taung ala namang kasalanan.

⁶ Pekiramdaman neng Saul i Jonatan. Nganang sinumpang Saul, King daramdaman na ning Ginu, susumpa kung e ku ne paten i David.

⁷ Inya inaus neng Jonatan i David at belita na ing milyari. Kaybat tiki neng Jonatan i David kang Saul, at antimo ing sadia sinuyu ya i David kang Aring Saul.

Linigtas neng Mikal i David

⁸ Misan milaban la ding Israelita at ding Filisteo. Sinugud ya king labanan i David at dakal la ding apate na karela. Tinakas la detang mitagan.

⁹ Misan liban ne ning marawak a espiritung ibat king Ginu i Saul kabang atyu ya king bale na at tatalnan ne ing sibat na. Manigtigan yang lira kanita i David.

¹⁰ Sibatan ne i David, oneng mekapangilag ya iti. Mitarak ya ing sibat king pader. Mikapulayi yang tinakas i David.

¹¹ Ketang benging ita mitubud yang tauan na i Saul king bale nang David ba reng banten at paten tutuking abak. Inya nganang Mikal a asawa nang David, Nung e ka pa tumakas ngening bengi, bukas paten da ka ren.

¹² Pepadalanan ne i David king awang at memulayi yang tinakas.

¹³ Kaybat kinua neng Mikal ing dios-diosan a pangbale at kinera ne iti king pagkeran at saka ne inulasan. Mibili yang ulunan a bulbul kambing king buntuk na niti.

¹⁴ Inyang datang la ring tubud nang Saul ban dakpan de i David, sinabi nang Mikal king masakit ya.

¹⁵ Pepagbalikan na lang Saul ding tiburan na kang David. Ngana, Ibuat ye pati pagkeran na at idala ye kanaku. Aku ing makamate kang David.

¹⁶ Inyang magbalik la ding tiburan na, atyu ing dios-diosan king pagkeran at atyu ing ulunan a bulbul kambing king buntuk na.

¹⁷ Nganang kinutang Saul kang Mikal, Obat lininlang mu ku at pepaburen meng mekatakas ing kanakung kalaban? Pekibat nang Mikal kang Saul, Kasi sinabi na kanaku king paten na ku, nung e ke paburen makatakas!

¹⁸ Tinakas ya pin i David at sinalikut ya kang Samuel karin Rama. Belita na kang Samuel ing sablang depat nang Saul. Minta ya i Samuel at i David king Nayot at karin la migdatun.

¹⁹ Atin mekasumbung kang Saul king i David atyu Nayot karin Rama.

²⁰ Inya mitubud yang tauan na ban dakpan de i David. Ikit da la ring tiburan nang Saul ding propeta; panimunan na lang Samuel. Kukulisak la reti at teterak. Liban na la ning espiritu na ning Dios ding tiburan nang Saul at mekiabe la kareting propeta.

²¹ Inyang mibalita iti kang Saul, mitubud yang aliwa. Makanyan munaman ing gewa ra: mekiabe la karing propeta. Pasibayu yang mitubud tauan na, oneng mekiabe la naman deti karing propeta.

²² Kanita ya na mismu ing minta king Rama, at miras ya king metung a maragul a talaga karin king Seku. Karin ya mengutang. Ngana, Nukarin ya i Samuel at i David? Ngana ning mekibat, Atyu la king Nayot karin Rama.

²³ Meko ya Seku i Saul at minta ya Nayot karin Rama. Liban nia naman ning espiritu ning Dios; kinulisak ya naman at tinerak kalupa ra ding propeta angga king miras ya Nayot karin Rama.

²⁴ Miglubas ya naman at saka ya kinulisak at tinerak arapan nang Samuel. Patingapun at kabukas yang lubas. Makanyan ya pegumpisan ing kutang: Mekiabe nia naman wari i Saul karing propeta?