1 Samuel 18 - Ing Mayap a Balita Biblia

I David at i Jonatan

¹ Inyang meyari lang mipagsalita di David at Saul, tiblan ne ning lugud i Jonatan kang David. Ing lugud a penamdaman na kalupa na ning lugud na para king sarili na.

² Manibat na kanita e na ne pepaulian Saul i David.

³ Uling tune neng kaluguran Jonatan i David, sinumpa na king manatili lang mikaluguran.

⁴ Likas neng Jonatan ing balabal na at ing susulud nang imalan neng makilaban ya, at binie na iti kang David at pati na ing espada, pana, at ing sinturun na.

⁵ Magtagumpe ya i David nukarin mang labanan a papuntalan neng Saul; makanyan neng gewang pekapun da ring sundalus na. Ketula ra iti ding sablang sundalus at pati na ding opisyal nang Saul.

Keririan neng Saul i David

⁶ Minuli ne i Saul at i David, kaybat neng pete niti ing Filisteo, kayabe ra ding sundalus. Lulual la ding babai king balang siudad ning Israel a daralanan da ban sagana kang Aring Saul; magkanta la at teterak. Manigtigan lang pandereta, magkanta lang masaya at babagayan dang alpa.

⁷ Menigtigan la ding babai at ngarang magkanta: Libu-libu la ding pete nang Saul, oneng laksa-laksa la ring pete nang David.

⁸ E ya matula i Saul kaniting dimdam na, inya mimua ya. Ngana king lub na, Laksa-laksa la ring sasabian dang pete nang David samantalang aku libu-libu la mu. Kulang na mu ing ya na ing kilalanan dang ari.

⁹ Meriria ya i Saul kang David manibat na kanita.

¹⁰ Tinuking aldo ing marawak a espiritung ibat king Dios liban ne i Saul king bale na, at balamu murit ya. Manigtigan yang lira i David antimo ing gagawan na aldo-aldo at tatalnan na ne mang Saul ing tandus na.

¹¹ At sibatan neng mekatadua i David king tandus na uling isipan nang atarak ne i David king pader. Oneng apangilagan neng David.

¹² Manibat na kanita ketakutan na neng Saul i David, at aliwa na ya ing antabayanan na ning Ginu.

¹³ Ban midayu ya i David king arapan na gewa neng pamuntuk da ring libung sundalus at pepadala ne king lugal ning labanan. Penimunan na no man David ding sundalus king pamakilaban da.

¹⁴ Parati yang magtagumpe i David king nanumang gagawan na uling mamantabe ya kang David ing Ginu.

¹⁵ Inyang ikit nang Saul iti, lalu neng ketakutan i David.

¹⁶ Lalu ra ne mang aluguran i David king mabilug a Israel at king Juda uling ya ing manimuna king pamakilaban da.

Ayasawa neng David ing Anak nang Saul

¹⁷ Kanita nganang Saul kang David, Ipakasal ke keka i Merab a pangane karing anak kung babai. Ing aduan ku mu keka ya ing tapat ka sanang sumuyu kanaku at manimuna ka karing pamakilaban ning Ginu. Inisip nang Saul king aliwa ya ing makamate kang David nune ding Filisteo.

¹⁸ Nganang David kang Saul, Ninu wari aku? Ninu ring kamaganak ku at pamilya nang tata ku? E ku karapatdapat maging manuyang na ning ari!

¹⁹ Oneng inyang malapit na nia mung ikasal David i Merab, pepakasal neng Saul i Merab kang Adriel a tau Meholat.

²⁰ Milsinta ya i Mikal a anak nang Saul kang David. Mibalita iti kang Saul. Matula ne mang mekabalita

²¹ uling inisip na king gawan neng patibung ban kanita apate re ding Filisteo i David. Inya ngana kang David, Talagang ngeni maging manuyang da na ka.

²² Kanita inutus nang Saul karing tauan na king sarilinan de i David at sabian da king kaluguran ne ning ari at ding tauan na; nung inya sukat neng mabisang maging manuyang na.

²³ Sinabi ra iti ding tauan nang Saul kang David. Nganang David, Malyari ku waring maging manuyang na ning ari ngening kalulu ku mu at ala kung sasabian?

²⁴ Belita ra kang Saul ing sinabi nang David.

²⁵ Kanita nganang Saul, Sabian yu kang David king ala kung buring nanumang duru nune mu ring dinalan a sepu ding balat a pipagsirkunsisyunan da ring Filisteo anting ablas karing kalaban. Inisip nang Saul iti ban paten de ring Filisteo i David.

²⁶ Inyang sinabi ra iti ding tauan ning ari kang David, metula yang maging manuyang ne ning ari. Bayu dinatang ing mituldung aldo,

²⁷ lisuban na lang David at ding sundalus na ding Filisteo, at mekapate yang aduang dalan a katau karela. Dela na lang David ding pipagsirkunsisyunan da at pepabie na lang alang bawas king ari ban kanita maging manuyang na ne ning ari. Kanita pepakasal na neng Saul kang David ing anak nang i Mikal.

^28-29 Lakuas neng ketakutan at kesaman i David inyang ikit nang Saul king antabayanan ne ning Ginu i David at king kaluguran ne ning anak nang i Mikal.

³⁰ Parati yang magtagumpe i David neng makilaban ya karing Filisteo. Dakal ya labanan a simbut kesa karing aliwa nang opisyal Saul. Inya lalu yang mibantug.