1 Samuel 14 - Ing Mayap a Balita Biblia

Ing Tagumpe nang Jonatan karin Mikmas

¹ Misan a aldo nganang Jonatan a anak nang Saul king talapagdala na karing armas na, Tara, lumipat kata at munta king kampu da ring Filisteo. E na pepabalu iti kang tata na.

² Atyu kanita i Saul lual na ning Gibea lalam na ning tanaman a pomegranate karin king Migron; kayabe na la ding manga anam a ralan karing sundalus na.

³ (Atyu naman karin ing paring i Ahiya a anak nang Ahitob; kapatad neng Ahitob i Ikabod at apu neng Fineas a anak na namang Eli a pari ning Ginu karin king Silo.) Susulud neng Ahiya ing efod. E ra balu ding tau nung nu ya minta i Jonatan at ing abe na.

⁴ Pilatan de ring matas a batu ing lugal a delanan nang Jonatan at ing abe na ban makadalakit la king kampu da ring Filisteo. Mayayaus yang Boses ing metung a dane samantalang itang metung naman mayayaus yang Sene.

⁵ Atyu ing metung king dane norti king arapan na ning Mikmas at ita namang metung atyu king dane mauli arapan na ning Geba.

⁶ Nganang Jonatan king talapagdala nang armas, Tara, munta kata king kampu da reting Filisteo; siguru naman saupan na katamu ning Ginu. Malyari yang magligtas ing Ginu king kapamilatan da ring dakal o ding ditak.

⁷ Ngana ning talapagdala karing armas na, Gawan yu itang buri yu. Muna kayu at tukian da kayu nanuman itang burian yung daptan.

⁸ Nganang Jonatan, Nung makanyan, puntalan ta la ding Filisteo at pakit kata karela.

⁹ Nung sakaling sabian da, Panayan yung ikami ing lumapit kekayu, kanita talakad katang matulid king lugal ta at e kata pupunta karela.

¹⁰ Nung sabian da, Munta kayu keni, kanita lumapit kata; uling tanda ya iti king binie na na la ning Ginu kekata.

¹¹ Makanyan lang pepakit ilang adua karing Filisteo. Ngara naman deti, Oyan lulual na la ring mapilan karing Hebreo karing lungga ra.

¹² Kinulait la ding sundalus king kampu kang Jonatan at king talapagdala nang armas. Ngara, Meko keni at atin kaming ipakit kekayu. Nganang Jonatan king talapagdala nang armas, Tukian mu ku, uling binie na na la ning Ginu king gamat na ning Israel.

¹³ Kanita minukiat yang pagapang karing gamat na at bitis i Jonatan at tikian ne ning talapagdala nang armas. Miragsa la ding balang ayarapan na ning talapagdala nang armas at pete na la.

¹⁴ Mekapate yang aduang pulu katau i Jonatan at ing talapagdala nang armas ketang mumuna rang pamanialakeng ita kilub ning sukad a kapitnang hektarya.

¹⁵ Megulu yang e mu nanu ing kampu da ring Filisteo at pati na ding atyu king marangle at ding sablang tau; mitakutan lang e mu nanu ding bante at pati na ding karelang talasalake. Minayun munaman at tutung maragul ing kaguluan da.

Ing Labanan king Betaven

¹⁶ Ikit da ring guardia nang Saul karin Gibea a sakup ning Benjamin king ating labanan.

¹⁷ Kanita nganang Saul, Lawan yu nung ninung ala karing sundalus tamu. Memilang la at atuklasan da king alayu i Jonatan at ing talapagdala nang armas.

¹⁸ Kanita nganang Saul kang Ahiya, Idala me keni ing efod. (Darala neng Ahiya king oras a ita ing efod.)

¹⁹ Kabang pakisabian neng Saul ing pari, lalung daragul ing gulu king kampu da ring Filisteo. Ilako mu ne ing gamat mu king efod, nganang Saul king pari.

²⁰ Kanita linusub ne i Saul at ding sundalus na; disnan da lang milabulabu ding Filisteo.

²¹ Mekiabe na la naman detang Hebreong kayabe da ring Filisteo king karelang kampu karing Israelitang kayabe ra di Saul at Jonatan.

²² Tinagal na la naman ding sablang Israelitang sinalikut karing kabundukan ning Efraim inyang dimdam da king memulayi la ding Filisteo.

²³ Makanyan neng linigtas ning Ginu ing Israel king aldong ita. Misundu ing labanan lagpus na pa ning Betaven.

Ing Sumpa nang Saul

²⁴ Kanitang aldong ita meranup la ding sundalus na ning Israel uling sinabi nang Saul king misumpa ya ing taung mangan bayu miras ing bengi at bayu ya mekayablas karing kalaban na. Makanyan lang e mengan ding sundalus na.

²⁵ Miras la king gubat nung nu ra atagpuan ing dakal a pulut-panilan.

²⁶ Alang mengan kaniti agyang mananabu na king gabun ing pulut-panilan uling tutu lang mitakutan king sumpa nang Saul.

²⁷ Oneng e na dimdam Jonatan ing sinabi nang tata na, inya tiniltil ne king pulut-panilan itang punta na ning tukud na at pengan na. At mesala ya panimanman.

²⁸ Oneng ngana ning metung karing sundalus, Maigpit nang penabilin tata mu karing sundalus king ala metung mang mangan king aldong iti. Tutu na lang maranup ding sundalus.

²⁹ Nganang Jonatan, Pasakitan na lang tata ku ding tau. Lawan mu na ko. Mesalese ku akakit uling mengan kung ditak kaniting pulut-panilan.

³⁰ Nung pepaburen ta lang mengan ding sundalus king ikua da karing kalaban da, e kasi lalu lang dakal ding apate dang Filisteo!

³¹ King aldong ita apate da la ring Filisteo king labanan manibat king Mikmas angga na king Ahilon, oneng tutu lang meranup ding Israelita.

³² E no mekapanaguanta ding sundalus. Mengasubsub la king banding ikua ra. Dinakap lang tupa, baka, at biserung baka at saka ra la kinatat. Pengan da la; e ra no peparayan man.

³³ Kanita ating sinumbung kang Saul. Ngana, Lawan yu, mikakasala la ding tau laban king Ginu; mamangan lang karning ating daya. Nganang Saul, Karagul na ning kataksilan a gewa yo! Idala ye kanaku at iparugang kening lele ku ing metung a maragul a batu.

³⁴ Sabian yu karing tau ing magdala lang baka o tupa at keti da la katatan at kanan ban e la mikakasala king Ginu. E la sukat mamangan karning ating daya. Ketang benging ita migdala lang baka ding tau at karin da la kinatat.

³⁵ Mitalakad yang altar i Saul para king Ginu; iti ya ing minunang diling altar a telakad na para king Ginu.

³⁶ Kaybat, nganang Saul, Lusuban ta la ngening bengi ding Filisteo at kabukas tamung kuanan ing bandi ra. Ala tamung lalakuan metung mang mabie karela. Ing kaburian yu pu ya ing matupad, ngarang mekibat. Oneng ngana ning pari, Mangutang ta pa mu king Dios.

³⁷ Oyni ing kitang nang Saul king Dios, Lusuban mi na la ding Filisteo? Pasambut yu ke kaya? Oneng king aldong ita e ne pekibatan ning Dios.

³⁸ Inya nganang Saul, Mitipun ko keni, ikayung sablang manimuna da ring tau; pakibaluan yu nung makananu at nung ninu ing makipasari king kasalanan a yan king aldong iti.

³⁹ Ing Ginu a babie tagumpe king Israel ya ing saksi ku: ninu ya man, maging ya ing anak kung i Jonatan, siguradung paten ta ya! Oneng e re pekibatan ding tau.

⁴⁰ Kanita nganang Saul king mabilug a Israel, Munta kayu king kasumangid at ikaming Jonatan king kasumangid na ke man. Pekibat da ring tau kang Saul, Ing kaburian yu pu ya ing matupad.

⁴¹ Nganang Saul, Ginu, Dios ning Israel, obat e mu ku pekibatan king aldong iti? Nung aku ing mikasala o ing anak kung i Jonatan, pabagut me kekaming Jonatan ing Urim; oneng nung ing balen yung Israel ya ing mikasala, pabagut ye ing Tumim. Inyang meyari ing bagutan linto king atyu kari Saul at Jonatan ing mikasala; alayu karing tau.

⁴² Kanita nganang Saul, Pibagutan yu kami ning anak kung i Jonatan. Linto king i Jonatan ya ing mikasala.

⁴³ Kanita kitnan neng Saul i Jonatan, Sabian mu kanaku nung nanu ing depat mu? Pekibat nang Jonatan, Tiniltil ke ing punta na ning tukud ku king pulut-panilan at saka ku tikman. Makasadia kung mate uli ning gewa ku.

⁴⁴ At nganang Saul, Parusan na kata ning Dios; sukat kang mate, Jonatan.

⁴⁵ Oneng ngara ding tau, Sukat ne man waring mate i Jonatan a migtagumpe para king Israel. E malyari iti! King daramdaman na ning Ginu, alang manabu king gabun metung mang buak king buntuk na uling migtagumpe tamu king aldong iti king saup na ning Dios. Makanyan deng linigtas ding tau i Jonatan king kamatayan.

⁴⁶ Kaybat na nita, e na no tegal Saul ding Filisteo at minuli no man deti keta karela.

Ing Tagumpe nang Saul at ning Pamilya na

⁴⁷ Manibat inyang meging ari ya king mabilug a Israel i Saul mekilaban ya karing sablang kalaban a makapadurut king Israel; antimo ding tau Moab, Ammon, Edom, ing ari na ning Soba, at ding Filisteo. Magtagumpe ya king ninumang akalaban na.

⁴⁸ King mitmung tepangan simbut na la ding Amalekita, at linigtas ne ing Israel karing sablang kalaban na.

⁴⁹ Oreni ding anak nang Saul: ding anak nang lalaki ila di Jonatan, Isvi, at Melkishua; ding anak nang babai ila di Merab at Mikal.

⁵⁰ Ahinoam ne man lagyu ing asawa na; anak neng Ahimaaz. Ing pekapun da ring sundalus na ya i Abner a anak nang Ner a bapa na.

⁵¹ I Ner a tata nang Abner anak neng Abiel, at i tata na namang Saul ya i Kis.

⁵² Kabang ari ya i Saul parati yang makilaban karing Filisteo; yayabe ne karing sundalus na ing ninumang akit nang taung masikan o matapang.