1 Cronica 9 - Ing Mayap a Balita Biblia

Ding Mibalik ibat king Pangayugse

¹ Milista la ngan ding sablang memalen na ning Israel agpang king tribung kayayaniban da. Misulat iti king Istoria da ring Ari ning Israel at ding memalen na ning Juda a miyugse king Babilonia uli na ning keyalan dang katapatan king Dios.

² Ding minunang mibalik karing karelang siudad at tuknangan ila ding lalaki na ning Israel, ding pari, ding Levita, at ding susuyu king Templo ning Dios.

³ Ating karing tribu nang Juda, Benjamin, Efraim, at Manase ding menuknangan king Jerusalem.

⁴ I Utai, ing metung karing lahi nang Juda king anak nang i Perez, ya ing manimuna king pamilya ra. I Utai anak neng Amiud at apu neng Omri. I Omri anak neng Imri at apu neng Bani.

⁵ I Asaia, ing metung munaman karing lahi nang Juda king anak nang i Sela, ya ing manimuna king pamilya ra.

⁶ I Jeuel, ing metung pang lahi nang Juda king anak nang i Zera, ya ing manimuna king pamilya ra. Anam a ralan siam apulu la ding pamilya na ning tribu nang Juda ding menuknangan king Jerusalem.

⁷ I Sallu a anak nang Mesullam ya ing metung karing lahi nang Benjamin a menuknangan king Jerusalem. Tata neng Mesullam i Hodavia, at tata neng Hodavia i Hasenua.

⁸ Ing aliwa pang menuknangan karin ya i Ibneia, ing anak nang Jeroham. Tata neng Ela i Uzzi. Tata neng Uzzi i Mikri. Tata neng Mesullam i Sefatia, at tata neng Sefatia i Reuel. Tata neng Reuel i Ibnia.

⁹ Siam lang dalan limang pulu't anam ding pamilya na ning tribu ding menuknangan karin. Ding sablang lalaking mebanggit pekapun la ngan karing sarasarili dang pamilya.

Ding Pari a Menuknangan king Jerusalem

¹⁰ Ding pari a menuknangan king Jerusalem ila ri Jedaia, Jeoiarib, at i Jakin.

¹¹ I Azaria a anak nang Hilkia at apu nang Mesullam ya ing pekapamuntuk karing opisyal na ning Bale ning Dios. Ding makatua na ila di Mesullam a anak nang Zadok. Tata neng Zadok i Meraiot, at tata neng Meraiot i Ahitub.

¹² Menuknangan ya naman karin i Adaia a anak nang Jeroham. Tata neng Jeroham i Pasur, at tata neng Pasur i Malkia. Tata neng Maasai i Adiel. Tata neng Adiel i Jasera, at tata neng Jasera i Mesullam. Tata neng Mesullam i Mesilemit, at tata neng Mesilemit i Immer.

¹³ Libu pitung dalan anam apulu la heganagana deting paring pekapun karing sarasarili dang pamilya. Mayagyu la ngan king obra na ning Bale ning Dios.

Ding Levita a Menuknangan king Jerusalem

¹⁴ Ding Levitang menuknangan king Jerusalem ila deti: i Semaia a anak nang Hasub, at tata neng Hasub i Azrikam, at tata neng Azrikam i Hasabia, a lahi na ngan Merari;

¹⁵ i Bakbakar, Heres, Galal, at i Matania a anak nang Mika, at tata neng Mika i Zikri, at tata neng Zikri i Asaf;

¹⁶ i Obadias a anak nang Semaia, at i Semaia anak neng Galal, at tata neng Galal i Jedutun, at tata neng Jedutun i Berekia, at tata neng Berekia i Asa, at tata neng Asa i Elkana a menuknangan karing baryu da ring Netofatiteo.

Ding Guardia ning Bale ning Dios a Menuknangan king Jerusalem

¹⁷ Ding guardia karing pasbul-dalan ning Bale ning Dios a menuknangan king Jerusalem ila di Sallum, Akub, Talmon, Ahiman, at ding karelang kamaganak. I Sallum ya ing manimuna da.

¹⁸ Ila ding makatutuk magguardia king dalan palub king dane aslagan na ning Pasbul Dalan ning Ari. King misan a panaun, ila ding migguardia karing pasbul dalan da ring kampu da ring Levita.

¹⁹ Menuknangan ya naman karin i Sallum at ding kamaganak na. I Sallum anak neng Kore at apu neng Ebiasaf at apu ne king tud Kora. Ila ding guguardia king dalan palub king Toldang tuknangan ning Ginu antimo ding karelang makatua a migguardia king kampu ning Ginu.

²⁰ Menuknangan ya naman karin i Fineas a anak nang Eleazar, at metung ya karing meging manimuna da. Sana matnube ya ing Ginu kang Fineas.

²¹ Menuknangan ya naman karin i Zacarias a anak nang Meselemia. Guardia ya naman king dalan palub king Toldang tuknangan ning Ginu.

²² Adua lang dalan labing adua ding mepiling magguardia karing pidadalanan at pasbul dalan. Makalista la ngan agpang karing baryung karelang tuknangan. I Aring David at i propeta Samuel ila ding mibili karing karelang makatua kareting obra da.

²³ Ila at ding meging anak da at kayapu-apuan ding menatiling guguardia karing pasbul dalan na ning Bale ning Ginu.

²⁴ Ating guardia king balang metung at metung karing apat a pasbul dalan dane aslagan, albugan, mauli, at norti.

²⁵ Kasaup da la reting guardia ding karelang kamaganak a manuknangan karing baryu, at liwas-liwas lang magguardia kilub ding tuki-tuking pitung aldo.

²⁶ Levita la ding apat a manimuna da ring guardia at pagkatiwalan la uling ila ding ating pakibatan at mamahala karing kuartu at karing pisisinupan pibandian na ning Bale ning Dios.

²⁷ Menuknangan la lele na ning Bale ning Dios, uling katungkulan da ing guardian de iti at ibuklat ding pasbul dalan neng abak.

Ding Aliwa pang Levita

²⁸ Ding aliwa karing Levita ila ding ating pakibatan karing kasangkapan a magagamit king pamanyamba. Ila ding milulual kareting kasangkapan at kaybat isikap da la.

²⁹ Ding aliwa pang Levita ila ring ating pakibatan karing sagradung kasangkapan, king arina, alak, larung olibo, insenso, at ding pabanglu.

³⁰ Ding ating pakibatan king pamangawang pabanglu ila ding pari.

³¹ I Matitia, ing metung karing Levita a anak nang pangane Sallum ning lahi nang Kora, ya ing mangawa karing tinape maimpis.

³² Ating mapilan karing lahi nang Kora a ating pakibatan king pangasadia da ring tinape para king Bale ning Dios neng Aldo ning Sabbath.

³³ Ding aliwa karing pamilyang Levita ila ding ating pakibatan king pamagkanta. Manuknangan la ding pekapun da reting pamilya karing gusali na ning Bale ning Dios, at ala na lang aliwa pang pakibatan, uling aldo't bengi iti ing katungkulan da.

³⁴ Deting lalaking mesambitla ila ding buntuk da ring pamilya ding Levita. Ila ding manimuna a menuknangan king Jerusalem.

Ding Makatua nang Aring Saul

³⁵ I Jeiel ya ing mitatag king siudad ning Gibeon at karin ya menuknangan. Maaca ya lagyu ing asawa na.

³⁶ I Abdon ya ing pangane nang anak; ding aliwa nang anak ila di Zur, Kis, Baal, Ner, Nadab,

³⁷ Gedor, Ahio, Zacarias, at i Miklot

³⁸ a tata nang Simea. Menuknangan la ding lahi ra king Jerusalem at siping da ring kamaganak da.

³⁹ I Ner ya i tata nang Kis, at i Kis ya i tata nang Saul. I Saul ya i tata da ri Jonatan, Malkisua, Abinadab, at i Esbaal.

⁴⁰ I Jonatan ya i tata nang Meribaal, at i Meribaal ya i tata nang Mikeas.

⁴¹ Ding anak nang Mikeas ila ri Piton, Melek, Tarea, at i Ahaz.

⁴² I Ahaz ya i tata nang Jara, at i Jara ya i tata da ri Alemet, Azmavet, at i Zimri. I Zimri ya i tata nang Moza.

⁴³ I Moza ya i tata nang Binea, at i Binea ya i tata nang Refaia. I Refaia ya i tata nang Eleasa, at i Eleasa ya i tata nang Azel.

⁴⁴ Atin yang anam a anak i Azel; ila di Azrikam, Bokeru, Ismael, Searia, Obadias, at i Hanan.