1 Cronica 29 - Ing Mayap a Balita Biblia

Ding Ambag para king Pangatalakad na ning Bale ning Ginu

¹ Kaybat na nita, nganang Aring David king kapulungan, Ing anak kung i Solomon ya ing pinili na ning Dios, oneng anak ya pamu at ala ya pang sibukan. Maragul ing obra uling ing patalakad tamu e ya palasyu para karing tau nune para king Ginung Dios ya.

² Depatan ku ngan ing sablang agyu ku ban asadia ku ing sablang kailangan para king pangatalakad na ning bale ning Dios antimo ing kailangan a gintu, pilak, tangsu, bakal, at dutung. Dakal na mu rin ing atipun kung batung onyx at aliwa pang mangamal a batu at marmol ampon palamuti.

³ Subali pa kareti, babie ku ing sarili kung atipun a gintu at pilak uli na ning maragul kung kapagnasan a mitalakad ya ing bale ning Dios.

⁴ Atin kung dinalan labing limang toneladang gintung puru a ibat king Ofir at aduang dalan anam apulu't limang toneladang pilak a puru para gamitan karing dingding na ning bale ning Dios,

⁵ at para karing aliwa pang bage a gawan da ring mangagaling a pangamat a plateru. Ninu ngeni kekayu ing makasadiang italaga na ing sarili na para kaniting obra na ning Ginu?

⁶ Mebisa la ngan ding pekapun da ring balang pamilya, ding manimuna da ring tribu na ning Israel, ding pekapun da ring sundalus, at ding katiwala na ning ari.

⁷ Minie lang dinalan siam apulung toneladang gintu, atlung dalan walung pulung toneladang pilak, anam a ralan pitung pulu't limang toneladang tangsu, at atlung libu pitung dalan at limang pulung toneladang bakal.

⁸ Minie la detang ating mal a batu para king kaban pibandian na ning bale ning Ginu a ingatan nang Jehiel a lahi nang Gerson.

⁹ Masaya la ding tau uling kusang lub ing pamamie da king Ginu. Masaya yang masaya munaman i Aring David.

Pinuri ne at Pepasalamatan David ing Dios

¹⁰ King arapan da ring tau pinuri ne at pepasalamatan David ing Ginu. Ngana, O Ginung Dios na ning Israel a ibpa mi, karapatdapat kang purian at pasalamatan king kapilan pa man.

¹¹ Keka, O Ginu, ing dangalan, ing kayupayan, ing ligaya, ing tagumpe, at ing kamalan uling ing sablang atyu king banua at yatu keka ngan. Keka, O Ginu, ing pamag-ari; ika ing pekamatas at ari ning sabla.

¹² Keka ibat ing pibandian at ing dangalan, ika ing sasakup king sablang bage. Atyu karing gamat mu ing sikanan at ing upaya ban itas ya at dinan sikanan ing metung at metung.

¹³ Ngeni, O kekaming Dios, pasalamatan da ka at pupurian ing maligaya mung lagyu.

¹⁴ Ninu mo aku at deting kabalen ku ban mamie keng kusang lub keka, uling ing sabla ibat ngan keka, at itang binie mi tune ibat keka.

¹⁵ Dayuan kami ngan king kekang arapan a antimo ding kekaming makatua. Anti la mu king anino ding aldo mi keti king yatu at ala metung mang manatili.

¹⁶ O Ginung kekaming Dios, babie mi iting sablang pibandian para king pangatalakad na ning metung a bale para king banal mung lagyu, oneng iti ngan ibat keka at ing sabla keka.

¹⁷ Balu ku, O Dios, king sasalugsugan me ing pusu at tutula ka karing taung matulid. Iyain ku ngan iti king kusang lub. Ikit kung matula ing kalausan dang lub minie deting taung kekang memalen.

¹⁸ O Ginung Dios da ring kekaming makatuang i Abraham, Isaac, at Israel, papanatilian mu sana iting nasa karing pusu da ring kekang memalen at manatili la sanang tapat keka.

¹⁹ At ibie me sa king anak kung i Solomon ing pusung tapat a bisang tupad karing kekang utus ampon tuntunan at italakad ne ing bale mu a kanaku nang sidia.

²⁰ Kaybat, nganang David king kapulungan da ring tau, Bendisyunan ye at pasalamatan ing Ginung kekayung Dios! At pinuri ne't pepasalamatan ning kapulungan ing Ginu, ing Dios da ring karelang makatua. Siniklaud la at migsakab king gabun arapan na ning Ginu at ning ari.

²¹ Kabukasan, pete da la ring animal bilang ain-a-durulukan para king Ginu, at kaybat dininan da la ring tau ba rang kanan. Libu la ding toro a pete ra, libu la ding lalaking tupa, at libu la naman ding tupang pabanua tua. Subali pa kareti, miyain la pang ain-a-inuman.

²² Masaya la ngan king aldong ita kabang mamangan la at miminum king arapan na ning Ginu. Kaybat, pasibayu deng pepatibayan ari da i Solomon a anak nang David. Linian deng larung olibo king lagyu na ning Ginu, at linian dia naman i Zadok bilang pari.

²³ Inya i Solomon ya ing linukluk king luklukan na ning Ginu bilang kayalili nang Aring David a tata na. Meging matagumpe yang ari at pemintuan de ngan ding sablang memalen na ning Israel.

²⁴ Mengaku lang maging tapat kang Aring Solomon ding sablang manimuna at magaling a lalaki at ding aliwa na pang anak a lalaking David.

²⁵ Gewa neng marangal ning Ginu i Solomon king mabilug a Israel, at meging maningning ing panga-ari na kesa karing ari a minunang mig-ari king Israel.

Ing Suma na ning Pamag-ari nang David

²⁶ Mig-ari ya king mabilug a Israel i David a anak nang Jese.

²⁷ Mig-ari ya kilub ding apat apulung banua; pitung banua king Hebron at atlung pulu't atlu king Jerusalem.

²⁸ Matua ne inyang mete ya. Tikman na ing makabang bie, ing mabandi, at ing dangalan. Ing menalili kang David bilang ari ya i Solomon a anak na.

²⁹ Ing istoria na ning bie at depat nang Aring David manibat king kapupurmeruan angga king kawakasan makasulat king listahan da ring propetang i Samuel, Natan, at i Gad.

³⁰ Sasalita na niting listahan ing marakal nang pamamahala, ing upaya na, at ing sablang milyari king bie na ning bansang Israel, at ding aliwa pang kayarian karing aliwang lugal.