1 Cronica 26 - Ing Mayap a Balita Biblia

Ding Guardia ning Bale ning Ginu

¹ Oreni ding Levita a mitulduan guardia karing pasbul ning Bale ning Ginu: king pamilya nang Kora, i Meselemia a anak nang Kore. Anak neng Asaf i Kore.

² Ding anak nang Meselemia, agpang king pamidalandalan da, ila di Zacarias, Jediael, Zebadia, Jatniel,

³ Elam, Jeohanan, at i Elieoenai.

⁴ Kayabe ya naman i Obed Edom at ding anak nang di Semaia, ing pangane, Jeozabad, ing kaduang pangane, Joa, Sakar, Netanel,

⁵ Amiel, Isacar, at i Peuletai.

⁶ Atin yang anak i Semaia a meging pamuntuk da ring pamilya ra; mangagaling la. Ila deti:

⁷ Otni, Refael, Obed, Elzabad at ding adua nang anak a mangagaling munaman. Ila deti ri Elihu at Semakia.

⁸ Anam lang pulu't adua ding anak nang Obed Edom at ding apu na a karapatdapat para king kasuyuan.

⁹ Labi no mang walu ding king pamilya nang Meselemia.

¹⁰ Ding king pamilya nang Merari kang Hosa ila deti: Simri (ing gewa nang pamuntuk tata na agyang aliwa ya ing pangane),

¹¹ Hilkia, Tebalia, at i Zacarias. Labi lang atlu ding king pamilya nang Hosa a guardia king Bale ning Ginu.

¹² Pigrupu-grupu da la reting guardia agpang king pamilyang ibatan da, at midinan lang katungkulan king Bale ning Ginu a antimo ding aliwang Levita.

¹³ Mibagutan la ban abalu de ing pasbul a karelang guardian. Kaniting mesabing bagutan e meging pisasabian ing bilang ning pamilya, nung dakal la man o ditak.

¹⁴ Ing miras kang Selemia ya ing pasbul king dane aslagan. Ing anak nang i Zacarias, ing lalaking biasang munie payu, tinggap ne ing king dane norti.

¹⁵ Ing king dane mauli kang Obed Edom ya, at ding anak na ilang mitulduan mag-guardia karing kamalig.

¹⁶ I Supim at i Hosa ila ding king pasbul dane albugan at king Pasbul Dalan ning Salleket king dalan a paukiat. Liwas-liwas lang mag-guardia,

¹⁷ king dane aslagan anam la reng guardia neng aldo; king dane norti, apat la; at apat la naman king dane mauli. Apat la ding mag-guardia aldo-aldo karing kamalig, adua karing balang kamalig.

¹⁸ Apat la ding guardia ketang dane albugan ning pavilion, at adua la detang king lele ning dalan a malapit king pavilion.

¹⁹ Ya iti ing kaayusan na ning pamag-guardia da ring pamilya nang Kora at Merari.

Ding Aliwa pang Katungkulan king Bale ning Ginu

²⁰ King pamanimuna nang Ahiya mitulduan lang katungkulan ding kalupa rang Levita bilang talaingat pibandian na ning Bale ning Dios at karing kamalig a pisisinupan karing ain a mitalaga.

²¹ I Ladan, ing metung karing anak nang Gerson, ya ing makatua da ring dakal a pamilya pati na ing pamilya nang Jehiel.

²² Ding aliwa na pang anak Ladan ila di Zetam at Joel. Ila ding ating pakibatan king pibandian na ning bale ning Ginu.

²³ Mirinan la namang katungkulan ding lahi nang Amram, Izar, Hebron, at Uziel.

²⁴ I Sebuel, ing anak nang Gersom at apu nang Moises, ya ing meging pamuntuk da ring mamahala king pibandian na ning Bale ning Ginu at karing kamalig.

²⁵ Ila deti ring kamaganak na king uli nang Eliezer: i Rehabia a anak na, i Jesia a anak nang Rehabia, i Joram a anak nang Jesia, i Zikri a anak nang Joram, at i Selomit a anak nang Zikri.

²⁶ I Selomit at ding kamaganak na ila ding ating pakibatan karing regalung telaga nang Aring David para king Dios at ding pekapun da ring pamilya at manimuna da ring grupu-grupung pamilya, at ding opisyal da ring sundalus.

²⁷ Telaga ra para gamitan king Bale ning Ginu ing mapilan karing bage a ikua ra karing kalaban a simbut da king labanan.

²⁸ I Selomit at ing pamilya na ila ding ating pakibatan king sablang bage mitalagang gamitan king bale ning Ginu pati na ding binie nang propeta Samuel, i Aring Saul, at i Abner a anak nang Ner, at i Joab a anak nang Zeruia.

Ding Katungkulan da ring Aliwang Levita

²⁹ Karing lahi nang Izar, i Kenania at ding anak na ila ding mitulduan talapaglista at ukum ning Israel.

³⁰ Karing lahi nang Hebron, i Hasabia at ding libu at pitung dalan a mangagaling a kamaganak na ila ding mitulduan mangasiwa king Israel dane albugan ning Jordan. Ila ding mamahala king obra ning Ginu at ning ari.

³¹ Agpang king listahan da ring lahi nang Hebron, i Jeria ya ing manimuna. King apat apulung banua nang pamag-aring David ating megawang pamanialiksik king lahi nang Hebron, at meyakit king ding pekamagaling a sundalus keting lahi manuknangan la king Jazer a sakup ning Gilead.

³² Pinili na lang Aring David ding aduang libu pitung dalan a mangagaling at pekapun pamilya a kamaganak nang Jeria ban mamahala karing Rubenita, Gadaita, at ing tribu nang Manase dane Aslagan. Ila ding pemahalan nang David ban tupad king obrang panrelihiun at pambalen.