1 Cronica 24 - Ing Mayap a Balita Biblia

Ing Obra da ring Pari

¹ Oreni ding grupu da ring lahi nang Aaron. Apat la ding anak nang Aaron; ila di Nadab, Abihu, Eleazar, at i Itamar.

² Mete la di Nadab at Abihu bayu ya mete i tata ra, at ala lang anak. Inya i Eleazar at i Itamar ilang sinuyu bilang pari.

³ King saup nang Zadok a lahi nang Eleazar at Ahimelek a lahi nang Itamar, pipitna-pitna na lang Aring David ding lahi nang Aaron para king kaayusan na ning karelang kasuyuan.

⁴ Mas dakal la ding pekapun king lahi nang Eleazar kesa king lahi nang Itamar. Inya pipitna-pitna da la agpang king bilang da. Labi lang anam a grupu ding king lahi nang Eleazar, at walu lang grupu ding king lahi nang Itamar.

⁵ Ing tutuk da king obra merapat king uli na ning bagutan uling agyang king lahi nang Eleazar at king lahi nang Itamar ating pekapun da ring pari at ating manimuna a mamahala king bale na ning Dios.

⁶ I Semaia, ing anak ning Levitang i Netanel, ya ing milista karing lagyu ra, at merapat iti king arap na ning ari, at ding opisyal na, ing paring i Zadok, i Ahimelek a anak nang Abiatar, at ding pekapun da ring lahi da ring paring Levita. Metung yang pamilya da ring pari ing misulat para kang Eleazar at metung munaman para kang Itamar.

⁷ Oyni ing kaayusan na ning karelang kasuyuan magumpisa king mumuna angga king kaduang pulu't apat a grupu: ing mumuna ya i Jeoiarib, ing kadua ya i Jedaia,

⁸ ing katlu ya i Harim, ing kapat ya i Seorim,

⁹ ing kalima ya i Malkia, ing kanam ya i Miyamin,

¹⁰ ing kapitu ya i Hakkos, ing kawalu ya i Abiya,

¹¹ ing kasiam ya i Jesua, ing kapulu ya i Sekania,

¹² ing kalabing metung ya i Eliasib, ing kalabing adua ya i Jakim,

¹³ ing kalabing atlu ya i Hupa, ing kalabing apat ya i Jesebeab,

¹⁴ ing kalabing lima ya i Bilga, ing kalabing anam ya i Immer,

¹⁵ ing kalabing pitu ya i Hezir, ing kalabing walu ya i Hapizez,

¹⁶ ing kalabing siam ya i Petaia, ing kaduang pulu ya i Jehezkel,

¹⁷ ing kaduang pulu't metung ya i Jakin, ing kaduang pulu't adua ya i Gamul,

¹⁸ ing kaduang pulu't atlu ya i Delaia, ing kaduang pulu't apat ya i Maazia.

¹⁹ Ila deti ring lalaking mitulduan sumuyu king Bale ning Ginu agpang karing tuntunan a tikda na ning makatua dang i Aaron a makabasi king utus ning Ginu, ing Dios ning Israel.

Ing Listahan da ring Aliwa pang Levita

²⁰ Oreni pa ding aliwa nang lahing Levi: i Sebuel ning pamilya nang Amram, i Jehedia ning pamilya nang Sebuel,

²¹ i Issia ning pamilya nang Rehabia, ya ing pekapun,

²² i Selomit king pamilya nang Izar, i Jahat ning pamilya nang Selomit,

²³ I Jeria ya ing pekapun king pamilya nang Hebron at i Amaria ing kadua, i Jehaziel ing katlu, at i Jekameam ing kapat,

²⁴ i Mikeas king pamilya nang Uziel, i Samir king pamilya na namang Mikeas,

²⁵ i Issia a kapatad nang Mikeas, at i Zacarias king pamilya nang Issia,

²⁶ di Mahli at Musi king pamilya nang Merari, i Beno king pamilya nang Jaazia,

²⁷ di Beno, Soham, Zacur, at i Ibri a anak nang Jaazia ning pamilya nang Merari.

²⁸ Atin yang aduang anak i Mahli; ila di Eleazar at Kis. Ala yang anak a lalaki i Eleazar,

²⁹ oneng atin ya i Kis. Ing lagyu na Jerameel.

³⁰ Atin yang atlung anak a lalaki i Musi; ila di Mahli, Eder, at i Jeremot. Ila deti ring pamilya da ring Levita.

³¹ Antimo ing depat da ring pamilya nang Aaron, mibagutan la naman deting lalaki king durungutan nang Aring David, Zadok, Ahimelek ampon ding pekapun da ring pari at ding Levita.