1 Cronica 23 - Ing Mayap a Balita Biblia

¹ Inyang matua ne i David, likluk ne king tronu i Solomon a anak na bilang kayalili nang ari ning Israel.

Ing Obra da ring Levita

² Pepatipun na la ngang David ding manimuna na ning Israel at ding sablang pari at Levita.

³ Ding mebilang a Levita a ating idad a atlung pulung banua at maygit atlu lang pulu't walung libu.

⁴ Nganang David, Ding aduang pulu't apat a libu kareti ila ding mamahala king pangatalakad na ning bale ning Ginu, at ding anam a libu ila ding maging manimuna at manayus king nanumang problema,

⁵ at ding apat a libu ila ding mag-guardia karing pasbul, at ding apat a libung mitagan ila ding munie kapurian king Ginu kabang babagayan da lang tigtigan karing instrumentong musika a sidia ku para kaniti.

⁶ Gewa na lang atlung grupung David agpang karing atlu nang anak Levi: i Gerson, i Kohat, at i Merari.

⁷ Adua la ding anak nang Gerson; ila di Ladan at Simei.

⁸ Atlu la ding anak nang Ladan; ila di Jehiel, ing pekapun, Zetam, at i Joel.

⁹ Atlu la naman ding anak nang Simei; ila di Selomot, Haziel, at i Haran. Ila ding pekapun karing pamilyang ibat king grupu nang Ladan.

¹⁰ Apat la ding anak nang Simei; ila di Jahat, Zina, Jeus, at i Beria.

¹¹ Ing pekapun da ya i Jahat, at i Zina ya ing kaduang pekapun. E ya mikayanak dakal i Jeus at i Beria, inya mebilang lang metung mung pamilya.

¹² Apat la ding anak nang Kohat; ila di Amram, Izar, Hebron, at i Uziel.

¹³ Ding anak nang Amram ila di Aaron at Moises. Mitalaga ya i Aaron at ding anak na king pamaningat karing bage sagradu king kapilan pa man. Ila ding duluk king insenso king altar ning Ginu at sumuyu ampon mamendisyun karing tau king lagyu na ning Ginu.

¹⁴ Mibilang la ding anak nang Moises, ing talasuyu ning Ginu, karing Levita.

¹⁵ Atin yang aduang anak i Moises; ila di Gersom at Eliezer.

¹⁶ Ing anak nang Gersom ya i Sebuel, at ya ing manimuna.

¹⁷ Metung ya mu ing anak nang Eliezer; i Rehabia, oneng dakal ya lahi i Rehabia.

¹⁸ I Izar, ing kadua karing anak nang Kohat, atin yang metung a anak, i Selomit, ing pekapun na ning pamilya.

¹⁹ I Hebron, ing katlu karing anak nang Kohat, atin yang apat a anak; ila di Jeria, Amaria, Jehaziel, at i Jekameam.

²⁰ I Uziel, ing kapat karing anak nang Kohat, atin yang aduang anak; ila di Mikeas at Issia.

²¹ Atin yang aduang anak i Merari; ila di Mahli at Musi. Atin yang aduang anak i Mahli; ila di Eleazar at Kis,

²² oneng mete yang alang anak a lalaki i Eleazar. Babai la ding anak na. Mekapakiasawa la ding anak na karing pisan dang anak nang Kis.

²³ I Musi, ing kadua karing anak nang Merari, atin yang atlung anak; ila di Mahli, Eder, at i Jeremot.

²⁴ Ila deti ring lahi nang Levi agpang karing pamilya ra. Makalista ya ing balang metung karela a ating idad a aduang pulung banua at maygit at atin parti king obra na ning bale ning Ginu.

²⁵ Nganang David, Dininan neng kapayapan ning Ginung Dios ning Israel ing balen na, at ya mismu manuknangan ya king Jerusalem king kapilan pa man.

²⁶ E na kailangan pa ing ibuat de ring Levita ing Toldang tuknangan ning Ginu at ding sagradung kasangkapan na a magagamit king pamanyamba.

²⁷ Agpang king tauling panabilin nang David, binilang da la ring sablang Levita a ating idad a aduang pulung banua at maygit.

²⁸ Ing obra da ring Levita ya ing saupan la ring paring ibat king lahi nang Aaron neng susuyu la king bale ning Ginu. Ila ding mamahala karing patyu, karing kuartu, king pamaglinis karing sagradung kasangkapan, at king aliwa pang obra king bale na ning Dios.

²⁹ Ila mu rin ding ating pakibatan karing tinape iyain, king arinang isamut karing ain a iyain, karing tinape maimpis a alang lebadura. Ila munaman ding maglutu king tinape alang lebadura, king arinang singkapan larung olibo, at mamahala king pamanimbang at pamanyukad karing ain para king Bale ning Dios.

³⁰ Ila ding talakad neng abak ban munie kapurian at kapasalamatan king Ginu. Makanyan munaman ing daptan da neng bengi,

³¹ at neng babie ain-a-durulukan para king Ginu neng Aldo ning Sabbath, neng Piesta ning Bayung Bulan, at karing aliwa pang piesta. Ila ding sumuyu king altar na ning Ginu king sablang panaun, agpang king mepikayari at bilang ding Levita.

³² Ila ding ating pakibatan king pangaingat na ning Toldang tuknangan ning Ginu at king altar, at sumaup karing paring ibat king lahi nang Aaron king bale na ning Ginu.