1 Cronica 22 - Ing Mayap a Balita Biblia

¹ Nganang David, Sukat yang keti ing bale ning Ginung Dios at ing altar a pidurulukan karing ain da ring Israelita.

Ing Pamagsadia para king Pangatalakad na ning Bale ning Ginu

² Inya inutus nang Aring David ing mitipun la ding sablang dayuan a manuknangan king Israel, at kaybat mamili yang manabas batu a gamitan king pangatalakad na ning Bale ning Dios.

³ Migsadia yang dakal a bakal ban gawan paku at bisagra para karing pasbul. Migsadia ya namang tangsu a e mu atimbang uling tutung dakal.

⁴ E munaman abilang ing dakal a tablang sedro a dela da ring tau Tiro at Sidon.

⁵ Ngana king lub na, Anak ya pamu at ala pang sibukan ing anak kung i Solomon. Ing bale a italakad para king Ginu sukat yang maging pikabaluan, marangal, at alang kasing santing ampon kislap king akakit da ring sablang bansa. Inya kailangan kung isadia ing sablang kailangan para kaniti. Inya bayu ya mete i David sidia na na ngan ing dakal a materialis.

⁶ Pepayaus neng David i Solomon a anak na at inutus na ing ipatalakad ne ing bale para king Ginu, ing Dios ning Israel.

⁷ Nganang David, Anak, buri keng ipanalakad metung a bale ing Ginung kanakung Dios bilang parangal.

⁸ Oneng sinabi na ning Ginu kanaku, Dakal la ding taung pete mu at dakal la ding gerang kekang leukan. Inya aliwa ika ing patalakad bale para kanaku, uling misna king karakal ing pepatulu mung daya king gabun.

⁹ Makanyan man, mikayanak kang lalaki a mamahala king kapayapan at e de guluan ding kalaban na. Solomon ing maging lagyu na, uling dininan keng kapayapan at katahimikan king panaun na ning pamag-ari na king Israel.

¹⁰ Ya ing mitalakad king bale para kanaku. Ya ing maging anak ku, at aku ing maging tata na. Gawan keng matatag ing tronu na king Israel king kapilan pa man.

¹¹ Ngana pang sinabing David, Anak ku, mananu na sanang saupan na ka ning Ginung kekang Dios. Magtagumpe ka sana king pamitalakad mung bale para king Ginu antimo ing pengaku na.

¹² At mananu na sanang dinan na kang beluan at kabiasnan ban apamahalan me ing Israel karing kautusan na.

¹³ Magtagumpe ka nung pamintuan mu la ring sablang kautusan a binie na ning Ginu kang Moises para king Israel. Magpakatatag ka at e ka tatakut o painan man ing lub mu.

¹⁴ King pamagkapilit ku atipun ku la deting bage para king pangatalakad na ning bale ning Ginu: manga-apat a libung toneladang gintu at halus apat apulung libung toneladang pilak. Subali pa kareti mekatipun kung dakal a tangsu at bakal. Sidia ku na naman ing dutung at batu. Ika na ing mangalap, nung magkulang iti.

¹⁵ Atin kang dakal a taung magobra bilang manabas batu, kanteru, kalpinteru, at aliwa pang mangagaling a pangamat

¹⁶ king obrang gintu, pilak, tangsu, at king bakal. Pagumpisan mu na ing obra at mananu na sanang patnubayan na ka ning Ginu.

¹⁷ Kaybat na nita, inutus nang David karing sablang manimuna na ning Israel ing saupan de i Solomon.

¹⁸ Ngana karela, E ye wari kayabe ing Ginung kekayung Dios? Ya ing minie kapayapan kekayu nu man karin. Peintulutan na ing sambutan ku la ding sablang taung sadiang manuknangan keti, at ngeni atyu la king lalam yung upaya at ning Ginu.

¹⁹ Ngeni, suyuan ye ing Ginung kekayung Dios king mabilug yung kaisipan at pusu. Pagumpisan yu neng italakad ing bale, ban abili yu ne karin ing Kaban ning Kasunduan ning Ginu at ding aliwa pang sagradung kasangkapan a magagamit king pamanyamba king Ginu.