1 Cronica 12 - Ing Mayap a Balita Biblia

Ding Minuna nang Talatuking David a ibat king Lahi nang Benjamin

¹ Ating lalaking minta kang David inyang atyu ya king Ziklag; kanitang sasalikut ya kang Aring Saul a anak nang Kis. Mekiabe la kang David deting lalaki a masibukan at pikabaluan king gelingan king pamakilaban.

² Atin lang pana at paslu ampon tiradol. Kayli at wanan lang mamana o maniradol. Ibat la king lahi nang Benjamin nung nu ya kabilang i Saul. Ila deti:

³ i Ahiezer, ing manimuna, at i Joas, ing kaduang manimuna. Anak na lang Semaa ning Gibea. Di Jeziel at Pelet a anak nang Azmavet; i Beraka, at i Jehu a tau Anatot,

⁴ i Ismaia ning Gibeon, ing metung karing sundalus at metung karing manimuna da ring Atlung Pulu; i Jeremias, Jahaziel, Johanan, at i Jozabad a tau Gedera;

⁵ i Eluzai, Jerimot, Bealia, Semaria, at i Sefatia a tau Harif;

⁶ i Elkana, Issia, Azarel, Joezer, at i Jasobeam na ning pamilya nang Kora;

⁷ i Joela at Zebadia a anak nang Jeroham ning Gedor.

Ding Talatuki nang David a ibat king Tribu nang Gad

⁸ Atin munaman masibukan at pikabaluan a sundalus a ibat king tribu nang Gad a mekiabe kang David inyang atyu ya king kuta na king ilang. Biasa la ngang gumamit kalasag at tandus, mabagsik la ngang anti ding leon at maliksing anti ding usa king bunduk.

⁹ Ila deti, agpang king pamitukituki ning karelang katungkulan: Ezer, ing pamuntuk da, Obadias, Eliab,

¹⁰ Mismana, Jeremias,

¹¹ Atai, Eliel,

¹² Johanan, Elzabad,

¹³ Jeremias, at i Makbanai.

¹⁴ Opisyal la deting mesabing lalaki karing tia dinalan o tia libung sundalus.

¹⁵ Ila ding dinalakit king Ilug ning Jordan inyang miglapo ya king mumunang bulan na ning banua, at iti ing meging sangkan ning pamaglako da ring taung manuknangan karing kapatagan banda aslagan at albugan.

Ding Talatuki nang David a ibat king Tribu nang Benjamin at Juda

¹⁶ Ating karing lahi nang Benjamin at Juda ing minta king kuta nung nu ya karin i David.

¹⁷ Linual ya i David ba na lang saganan. Ngana karela, Malaus kayu, nung dinatang kayu bilang kakaluguran a sumaup kanaku. Makiabe kayu kekami! Nung ing buri yu ya ing panganiaya yu ku karing kanakung kalaban, agyang ala kung gewang e ustu kekayu, makanyan man abalu na iti ning Dios da ring kekatamung makatua at ya ing bala kekayu.

¹⁸ Kanita ing upaya na ning Dios linub ya kang Amasai, ing metung kareti. I Amasai ya ing meging pekapun da ring Atlung Pulu, at nganang migsalita: David anak nang Jese, kakampi mu kami! Kapayapan keka, kapayapan munaman karing kekang katambayan! Uling ing Dios saupan na ka. Tinggap na lang matulang David at gewa na lang opisyal da ring sundalus na.

Ding Talatuki nang David a ibat king Tribu nang Manase

¹⁹ Ating mapilan a sundalus na ning tribu nang Manase ding mekiabe kang David inyang kayabe na lang linual ding Filisteo ban labanan ya i Aring Saul. E na la sinaupan David ding Filisteo, uling e la tiwala ding ari da ring Filisteo. Pepalakuan de i David at ngara king metung at metung, Mibili mu king panganib ing bie tamu king taung yan, uling makapanig ya pa mu rin king panginuan nang i Saul.

²⁰ Inyang mekapagbalik ne i David king Ziklag, kanita la dinatang ding sundalus a ibat king tribu nang Manase at mekiabe la kang David. Ila deti: Adna, Jozabad, Jediael, Mikael, Jozabad, Elihu, at i Ziletai. Pekapun la at atin yang metung a libung sundalus ing balang metung karela.

²¹ Seupan de i David at ding sundalus na. Ila ding meging opisyal da ring sundalus nang David uling masibukan la king pamakilaban.

²² Daratang la aldo-aldo ding lalaki ban makiabe la at saupan ya i David. Uli na niti, mika marakal yang sundalus a pakasandata i David.

Ing Listahan na ning Puersa nang David

²³ Oyni ing bilang da ring sundalus a minta kang David king Hebron ban ilipat da ing panga-ari nang Saul, agpang king pengaku ning Ginu:

²⁴ ding king lahi nang Juda, anam lang libu walung dalan. Magdala la ngang sibat at kalasag.

²⁵ Ding king lahi nang Simeon, pitu lang libu at dinalan. Pikabaluan la ngan king tepangan at sikanan.

²⁶ Ding king lahi nang Levi, apat lang libu at anam a ralan.

²⁷ Ding king lahi nang Aaron a panimunan nang Jeoiada, atlu lang libu at pitung dalan;

²⁸ kayabe ya kareti ing pikabaluan a matapang a kayanakan a i Zadok at ding aduang pulu't aduang manimuna na ning karelang pamilya.

²⁹ Ding king lahi nang Benjamin, king pamilya nang Saul, atlu lang libu agyang tapat la pa mu rin kang Saul ding keraklan karing pamilya ra.

³⁰ Ding king lahi nang Efraim, adua lang pulung libu walung dalan a mangatapang at pikabaluan karing karelang lahi.

³¹ Ding king tribu nang Manase dane Albugan, labi lang walung libu ding pepapuntan da ban gawan yang ari i David.

³² Ding king lahi nang Isacar, adua lang dalan ding manimuna a kayabe da ring pamilyang karelang panimunan. Balu da lang dinan kabaldugan ding panaun at biasang gawang lakbang a gawan na ning bansang Israel.

³³ Ding king lahi nang Zebulun, lima lang pulung libung masibukan a sundalus at tapat ampon makasadiang makilaban nanumang oras. Biasa lang gumamit nanumang sandata ban asaupan de i David.

³⁴ Ding king lahi nang Neftali, libu la ding manimuna subali pa karetang atlung pulu't pitung libung sundalus a ating kalasag at tandus.

³⁵ Ding king lahi nang Dan, adua lang pulu't walung libu at anam a ralan a sundalus a pakasandata at makasadiang makilaban nanumang oras.

³⁶ Ding king lahi nang Aser, apat lang pulung libu a makasadiang makilaban nanumang oras.

³⁷ Ding king lahi da ri Ruben, Gad, at ing tribu nang Manase dane Aslagan sumangid na ning Ilug ning Jordan, dinalan aduang pulung libu la a ating miyayaliwang uring sandata.

³⁸ Makasadia la ngang makilaban nanumang oras deting sundalus, at metung mu ing karelang buri inyang minta la king Hebronya pin ing gawan yang ari ning Israel i David. Makanyan ing panamdam da ring aliwang Israelita.

³⁹ Kayabe de i David kilub ding atlung aldo; mamangan la at miminum king sidia da ring karelang kabalen para karela.

⁴⁰ Pepadala lang pamangan pati ding atyu karing marayung lugal a antimo ding kang Isacar, Zebulun, at Neftali. Makasake karing asno, kamelyu, mula, at baka ing miyayaliwang darala dang pamangan: arina, higos, pasas, alak, larung olibo, baka, at tupa. Iti ngan ya ing tanda ning tula na ning mabilug a bansang Israel.