1 Cronica 11 - Ing Mayap a Balita Biblia

Meging Ari ne ning Israel at Juda i David

¹ Pintalan de ring sablang memalen na ning Israel i David karin king Hebron at ngara, Laman mu kami at daya.

² King milabas a panaun, agyang i Saul ya ing ari, ika ing menimuna king Israel king pamakilaban, at ing Ginung kekang Dios ya ing mengaku kekang ika ing manimuna karing memalen na at ika ing maging pamuntuk da.

³ Inya pintalan de ring sablang manimuna na ning Israel i Aring David king Hebron. Ginawa yang metung a taimtim a kasunduan karela. Linian deng laru at gewang ari na ning Israel, antimo ing pengaku ning Ginu king kapamilatan nang Samuel.

⁴ Minta ya i Aring David at ding sablang Israelita king Jerusalem ban lusuban de iti. Jebus ya lagyu kanita ing Jerusalem, at ding Jebuseo ila ding manuknangan karin.

⁵ Ngara ding Jebuseo kang David, E ka malyaring lungub keti. Oneng abihag neng David ing kuta ning Zion, at ngeni ya meging pikabaluan a Siudad nang David.

⁶ Nganang David, Gawan keng pekapun da ring sundalus ing mumunang makapate Jebuseo. I Joab ya ing menimuna king pamaglusub at ya ing meging pekapun da. I ima nang Joab ya i Zeruia.

⁷ Karin ya menuknangan king kuta ning Zion i David, inya inaus de iting Siudad nang David.

⁸ Pepalarin ne ing siudad manibat king Milo a timbakan gabun, at i Joab naman ya ing miglarin king mitagan a sira king siudad.

⁹ Meging masikan ya aldo-aldo i David, uling ing Ginung Mayupaya mamantabe ya kang David.

Ding Pikabaluan a Sundalus nang David

¹⁰ Atin yang pikabaluan a sundalus i David at deti ampon ding memalen na ning Israel seupan deng meging ari, antimo ing pengaku ning Ginu. Ila ding minie saup kang David ban maging matatag ya ing kayarian na. Ila deti:

¹¹ Ing mumuna ya i Jasobeam ning pamilya ning Hakmon. Ya ing manimuna da ring Atlu. Ya ing mekilaban karing atlung dalan a kalaban, at apate na la ngan king uli namu ning tandus na.

¹² Ing kadua kareting pikabaluan a Atlu ya i Eleazar a anak nang Dodo ning pamilya nang Aho.

¹³ Kayabe neng David inyang mekilaban ya karing Filisteo king Pas Damim. Atyu kanita king marangle da ring sebada inyang tinakas la ding Israelita.

¹⁴ Kanita linage ya i Eleazar libutad na ning marangle at lebanan na la ding Filisteo at apate na la. Dininan neng maragul a tagumpe ning Ginu.

¹⁵ Misan a aldo, inyang migkampu la ding Filisteo king Kapatagan ning Refaim, ding atlu karing atlung pulung manimuna da ring sundalus na ning Israel minta la keting batung maragul nung nukarin ya karin i David lele ning Kueba ning Adulam.

¹⁶ Atyu kanita i David king metung a kuta, at asakup na ne ning metung dang grupu ding Filisteo ing Betlehem.

¹⁷ King kasabikan nang David asabi na ing anti kaniti: Sana makainum ku king danum a ibat king talaga lele ning pasbul dalan ning Betlehem!

¹⁸ Kanita ginawa lang paralan ding atlung matapang nang sundalus ba lang milub king kampu da ring Filisteo. At menikua lang danum king talaga lele ning pasbul dalan ning Betlehem. Binie ra iti kang David, oneng e na ininum nune bilus na iti bilang ain king Ginu.

¹⁹ Nganang David, E ku ainum iti, uling anti ku nang ininum ing daya da reting lalaking teya ra ing bie ra! Inya e na ininum. Makanyan mekilala ing depat dang katapatan ding atlung matapang a sundalus nang David.

²⁰ I Abisai a kapatad nang Joab ya ing manimuna da ring Atlung Pulu. Ya ing mekilaban karing atlung dalan a kalaban at apate na la ngan king uli na ning tandus na. Meging pikabaluan ya karing Atlung Pulu a panimunan na.

²¹ Ya ing pikabaluan kareting Atlung Pulu at ya ing meging manimuna da, oneng e ya lubus pikabaluan a antimo ding Atlu.

²² Pikabaluan ya namang sundalus i Benaia a anak nang Jeoiada ning Kabzeel. Dakal ya depat a katapangan. Ya ing mekapate karing aduang matapang nang sundalus ning Moab. Misan a aldo a mumuran yelu, dinulung ya king metung a kulkul a malalam at pete ne ing leon.

²³ Ya munaman ing mekapate king metung a lalaking maragul a tau Ehipto a pitu at kapitnang talampakan king katas, at atin yang maragul a tandus. Atin yang palupalu i Benaia at delusungan ne iting lalaki, at ikua neng asamsam ing tandus na niting tau Ehipto. Kaybat pete ne king tandus na.

²⁴ Ila deti ring depat nang katapangan Benaia, ing metung karing pikabaluan a Atlung Pulu.

²⁵ Maygit ya karela ngan, mu pin e ya maygit pikabaluan karing Atlu. Ya ing gewa nang David a mamahala karing sundalung guardia na.

²⁶ Ila deti ring aliwa na pang matapang a sundalus David: i Asael a kapatad nang Joab, at i Elhanan a anak nang Dodo ning Betlehem,

²⁷ i Samot ning Harod, at i Helez ning Pelet,

²⁸ i Ira a anak nang Ikes ning Tekoa, at i Abiezer ning Anatot,

²⁹ i Sibecai ning Husa, at i Ilai ning Aho,

³⁰ i Maharai ning Netofa, at i Heled a anak nang Baana a tau munaman Netofa,

³¹ i Itai a anak nang Ribai ning Gibea ning Benjamin, at i Benaia ning Piraton,

³² i Hurai da ring kapatagan ning Gaas, at i Abiel ning Arba,

³³ i Azmavet ning Bahurum, at i Eliaba ning Saalbon,

³⁴ i Hasem ning Gizon, at i Jonatan a anak nang Sage ning Arar,

³⁵ i Ahiam a anak nang Sakar a tau munaman king Arar at i Elifal a anak nang Ur,

³⁶ i Hefer ning Mekera, at i Ahiya ning Pelon,

³⁷ i Hezro ning Carmel, at i Naarai a anak nang Ezbai,

³⁸ i Joel a kapatad nang Natan, at i Mibhar a anak nang Hagri,

³⁹ i Zelek ning Ammon, i Naarai ning Beerot a talapagdala nang armas Joab a anak nang Zeruia,

⁴⁰ i Ira at i Gareb ning Jatir,

⁴¹ i Uria a Hiteo, at i Zabad a anak nang Ahlai,

⁴² i Adina a anak nang Siza a manimuna na ning lahi nang Ruben at ating sariling atlung pulung tauan,

⁴³ i Hanan a anak nang Maaca, at i Josafat ning Mitan,

⁴⁴ i Uzia ning Astera, at di Samma at Jeiel, ding anak nang Hotam ning Aroer,

⁴⁵ i Jediael at i Joha, ding anak nang Simri ning Tiz,

⁴⁶ i Eliel ning Mahava, at di Jeribai at Josavia, ding anak nang Elnaam, i Itma ning Moab,

⁴⁷ i Eliel, Obed, at i Jaasiel a tau Zoba.