1 Cronica 10 - Ing Mayap a Balita Biblia

Ing Kamatayan nang Aring Saul

¹ Mekilaban la ding Filisteo karing Israelita king Bunduk ning Gilboa. Dakal la ding mete karing Israelita. Tinakas la ding mitagan at pati na i Aring Saul at ding anak na.

² Oneng tinagal la ding Filisteo at atagal da la at pete ding anak nang Saul: i Jonatan, Abinadab, at i Malkisua.

³ Mabagsik ing labanan at tiran ne ning paslu ning kalaban i Saul at grabi ya ing sugat na.

⁴ Nganang Saul king talapagdala nang armas, Bagutan me ing espada mu at paten mu ku ban kanita e ra ku akuang gawang pikaylian deting paganung Filisteo. Oneng e mebisa ing talapagdala nang armas uli na ning tatakut ya. Inya kinua neng Saul ing sarili nang espada at sikban ne iti.

⁵ Inyang ikit neng mete i Saul, sikban nia naman ing espada na at mete ya.

⁶ Mete ya i Saul at ding atlu nang anak, at ala neng lahi a mig-ari pa.

⁷ Inyang ikit da ring Israelitang atyu king kasumangid ning Kapatagan ning Jezreel king memulayi lang tinakas ding sundalus na ning Israel at king mete ne i Saul at ding anak na, likuan da la ring balen da at tinakas na la naman. Dinatang la ding Filisteo at ila ding sinakup karin.

⁸ Kabukasan, kaybat ning labanan, minta la ding Filisteo ban kuanan da ing nanumang bage akua ra karing mete Israelita, at atagpuan de ing bangke nang Saul at ding anak na a makapase king Bunduk ning Gilboa.

⁹ Tibtab de batal i Saul at leko re ing baluti na. Kaybat na nita, mitubud lang tau ban ibalita king mabilug a Filistia ing mayap a balita karing kikilalanan dang dios at karing karelang kabalen.

¹⁰ Dela re king metung karing karelang templo ing baluti nang Saul, at sinabit de ing buntuk na king templo na ning dios dang i Dagon.

¹¹ Inyang abalitan da ring memalen na ning Jabes ning Gilead ing depat da ring Filisteo kang Saul,

¹² meko la ding matapang dili karing lalaki ban kuanan de ing katawan nang Saul at ding anak na. Dela da la king Jabes. Kitkut da la karin king lalam ning tanaman a ensina at mig-ayunu la kilub ding pitung aldo.

¹³ Mete ya i Saul uli na ning e ya meging tapat king Ginu. Lebagan na la ding utus na ning Ginu, at uling meniawad yang payu karing espiritu da ring mete

¹⁴ lugal king Ginu ya maniawad payu. Inya pete ne ning Ginu at linipat ne ing kayarian kang David a anak nang Jese.