1 Corinto 6 - Ing Mayap a Balita Biblia

Ing Piamanuan Laban karing Kapatad a Cristianu

¹ Nung atin yang reklamu ing metung kekayu king kapatad na king iglesia, munta ya wari karing hues a paganu lugal king munta ya karing pinili na ning Dios?

² E yu wari balu king ding pinili na ning Dios ilang matul king yatu? Nung atulan ye ing yatu, e yu la wari agyung atulan ding mangalating bage?

³ E yu wari balu king itamu ding matul karing anghel? E kasi lalu ta lang ayatulan ding bage keti king yatu!

⁴ Nung deting bage lalto la, idala yu la waring pasalese karing taung e na kikilalanan ning iglesia?

⁵ Dumine na kayu man! Ala na waring metung mu mang biasa kekayu a makasalese king kaguluan da ring mikakapatad king iglesia?

⁶ Kailangan pa wari ing midaluman la ding mikakapatad king iglesia king ukuman da ring alang kasalpantayanan?

⁷ Ing mismung pamidaluman laban king metung at metung, mangabaldugan king mabibigu ing kekayung pamikakapatad kang Cristo. Baket e yu atanggap ing meargabiadu kayu? Baket e yu atanggap ing mepirait kayu?

⁸ King kamatutuanan, ikayu mismu maniugat kayung kapanamdaman at manako, at ding maging biktima yu ila mismu ding kapatad king iglesia!

⁹ Balu yung masalese king e re malyaring kamtan ding marawak ing Kayarian ning Dios. E yu pipiraitnan ing kekayung sarili! Uling ding taung imoral, ding sasambang idolo, ding makipangalugud, ding makipangatawan king kalupa rang babai o lalaki,

¹⁰ ding mapanako, sakim, lasenggu, mapanagkas, at ding tulisan e re kamtan ing Kayarian ning Dios.

¹¹ Anti la kareting mebanggit ding mapilan kekayu. Oneng mewas na ing kasalanan yu; mitalaga na kayu king Dios at meging banal uli na ning lagyu ning Ginung Jesu-Cristo, at uli na ning Espiritu ning kekatamung Dios.

Templo na la ning Dios ding Katawan Yu

¹² Malyaring ing metung kekayu sabian na, Atin kung matulid gawa king sablang bage buri ku. Wa, tutu ita; oneng e ing sablang bage makakayap keka. Asabi ku munaman ing Atin kung matulid gawa king sablang bage buri ku. Oneng e ku paintulutan ing ipusan na ku ning nanuman.

¹³ Mapalyaring ing metung munaman kekayu sabian na, Ing pamangan para king atian ya at ing atian para king pamangan ya. Wa, tutu ita; oneng deti parehu na lang dinan angganan ning Dios. E ya para king imoralidad ing katawan na ning tau, nune para king Ginu ya, at ing Ginu para king katawan ya.

¹⁴ Pepasublian neng mie ning Dios ing Ginu ibat king kamatayan, at pasublian na katamu namang mie king kapamilatan na ning upaya na.

¹⁵ E yu wari balu king ding kekayung katawan dake na la ning katawan nang Cristo? Paintulutan ku kaya ing kuanan ke ing metung nang dake ning katawan nang Cristo at gawan keng dake na ning katawan ning babaing magtinda king katawan na? Ali, e malyari!

¹⁶ E yu wari balu king ing lalaking makiabe king babaing magtinda king katawan na makisanmetung ya keya king laman? Ing kasulatan malino nang sasabian, Ilang adua maging metung na la mung katawan.

¹⁷ Oneng itang makisanmetung king Ginu makisanmetung ya keya king Espiritu.

¹⁸ E kayu makipangalugud. Ing kasalanan a daraptan na ning tau makalual king katawan na; oneng ing darapat king pamakipangalugud mikakasala ya king mismung sarili nang katawan.

¹⁹ E yu wari balu king ding katawan yu templo na la ning Banal a Espiritu a atyu kekayu at tinggap yung ibat king Dios? E yu bandi ing sarili yu, nune bandi ne ning Dios.

²⁰ Seli na kayu ning Dios at mal ing binayad na para kekayu. Inya gamitan yu la ding kekayung katawan para king ikaligaya na ning Dios.